KAWKVAHAI BUNG 7

 KAWKVAHAI

        .......  (M. LUSEI PALIAN)  .....

                   BUNG  7   NA

         ...........        .............      ..............

        Chu mitthi hlado meuh chuan khaw mite thin a va ti ṭhawng tehlul em! Tu te nge Mitthi khua pan ta tih lah an hre hauh si lo. Hringnunah hian zawng thil lo thleng mek hriat chakna hian kan khat a, kan han hre ta chenga kan lung erawh a dam zan ngai si lo a ni.  Tlangau in khawchhung mite hriattur a lo au tawh avang chuan an Lal leh pasalṭha te hmuak tur chuan kawtchhuah an pan ta hlawm a. Ṭum dang ang ni lo mahse, nula ho chuan arkeziak te, zu tuitling te kengin zan lam ropuina in a enna a chhuahna hnuaiah chuan mihrang te lam an pan ta. Ṭhenkhat tan zawng zan lungngaihthlak a ni ngei ang le!  Herhzawl lalnu pawh chuan a ropuina inbelin upa ho nen kawtchhuah lam an pan ta.

       Herhzawl lal leh pasalṭha te chuan an khawchhung lam an pan ṭan ta, khawchhung lam mite pawh chuan kawtchhuah an rawn pan ruih ruih a. Zawlbuk tlangval ho pawh silai vanvawr zawnga kap puak chungin kawtchhuah lam an pan ta. Val upa Hnuna zai ngai zelin an chechhuak a, tlangval ho nun mawina hi val upa rorel danah a innghat thui hle a ni. Upa Seia leh lalnu chu mipui hma lamah an awm a, meichher chu han chhi ve bawk mah se, van sanga mawina chhuahtu chu an ring ber zawk.  Mihrangte an hmu pha ta, nula lam chuan arkeziak an chul sek tawh a, Herhzawl lalpa chuan hma a hruai a, an ding dat a. A hmangaih em em Saia nu, a nupui  Ngurpuii chu an melh vabg vang a. Chu veleh Upa Seia chuan, 

    " Kan pasalṭha te u, kan lo lawm a che u, inzarah muangin kan leng thei a, muangin min dah zel ang tih kan ring e. Herhzawl khua mipa fa hian hmabak kan nei reng ṭhin a, kan hmabak hlen zel kan tum ang. Aw le, kan mihrangte chu i tawk ang u hmiang!" 

      tia a sawi zawh chuan Herhzawl lalnu chu nula hmaah kalin a pasal Herhzawl lalpa chu arkeziak a ban ta. Chu veleh nula ho an rawn chim a, meichher pawh a si hi a leng chum chum mai le. Hranghluni chuan zawn a nei ngat a, an hawi kual deuh chu a hmu ta. A mi zawn chu pasalṭha Thangkunga ke bula tal ṭhin Upa Seia fapa Thangliana ngei a ni.Herhzawl nula zingah chuan Hranghluni hi a ṭha fal nalh a, a heh vam ham te hi Vani an rah ang mai a ni a, zan thla eng hnuaiah pawh a puanbih in a khuh kara thui hauh si lova a chawn han lang te chuan pathlawi tam tak rinna a sawh nghing reng a ni. Upa ni mai tura an rin, ramhual ni mek Zamkunga fanu upa ber a ni a, a ṭhat kim dan sawifiah ai chuan Kawkvahai lera kea kal tum a awlsam zawk ngei ang. A arkeziak chu Thangliana a ban ta, Haizang no a, zu thlum ṭha chu an pe nghal zat a. Pasalṭha tuaitir lungphu erawh hriat phak turin a rawn phu ta mai em ni le? Sawi tur tam tak nei mahse mitmeng in a sawi fiah a, a inmelh ta veng veng a, Seifate tual chu a hnim ta raih a, hunbi a chawl em ni le!? Chawl lul lo ve, Kawltea chuan a ṭhian sabeng Thangliana chu a rawn nghawk zeuh a. Chu boruak zawng kan sawifiah thiam bak ni miau hek le.

          Chutih lai chuan le, nu tam tak leh nula ṭhenkhat hnuk no deuh ho chu an ṭapchhuak ṭan ta, an hawi ruai ruai a an lawmpate an hmu zo ve ta si lo. Tawng leh tura ṭhenna ramah hian tawn leh tur awm tawh lote hi ngaih an va na tehlul em! Chhingmitthla ah hlim lai ni leh sulhnu a lo thar a, mitthi te thlah nana ṭha ber mittui a far ta.  Tlangval sawm chuang lai hmelma lakah an chan a ni a, channa nasa tak a ni. Chhak pawih an huatna ava zual ṭhin tak em! 

 

      Herhzawl lalpa chu a rawn ding chhuak ta, meichher hnuaiah chuan a kut dinglam a phar chhuak a, chu veleh mipui chu chu zan rei tawh tak ah chuan thehmeh ang maiin an ngawi ta ṭhap a, hetiang hian thu a sawi ta,

    " Aw le, khua leh tui duhtakte u, hringnunah hian kan tan a kawng sial nan hmelma kan beih hi a ngai reng ṭhin a. Lo dawh tawp pawh ni ila, khua nei lovin min siam thovanga, sal ni in hmelma in min kai darh thung anga, chhungkua intawn a har tawh khawp ang. Kan ram tan, kan khaw tan hmelma kan beih hi a thiang a, kan bei zel ang, awp luih leh sala man kan ni tur a ni lo. Tlangval tam tak an rawn kir ve ta lo, in tan kan tan kan Khaw tan an nun an hlan ta, mipa fa in a tihtheih sang ber a tia, ka va chhuang tehlul em! Tlangval boral ta chhungte hi lal leh upa ten kan ral ang. Naktukah kan hranglam rih lovang a, kan tlangvalte thuahriat hnuaiah zah takin kan zalh ang a, naktip ah kan hrang lam ang. Kan awm danah hian kan chungah khuanu in zah a ngaiin ka ring e. Ṭin darh mai lovin tlangvalte kan zalh fel hma chuan i lenpui ang u!"  

        Lal Thanglura thu chu ava ṭha tehlul em!Herhzawl lalnu lah a pasal bulah a ding paw pheu mai si, khaw mite tan thlir nin an va har tak em! An lal pasalṭha tak thu chu dik an ti a, an pawmin an zawm ngei ang. Lal in thu a sawi zawh chuan tlangval ho chuan an ṭhiante ruang chu an zawn leh nghal a, an ralthuam man kengtute chuan lal in lam an pan zui a. Pasalṭha te leh upa ho chuan lal inlam an pan ta.  Chu zanah zawng tumah mu thei an awm hauh lovang le.  Thangliana te liamna lamah chuan Hranghluni chuan a zui ve ta, a ṭhian Thangpuii nen chuan a zawi sapa inbia in tlangval ho chu an zui ve ta zel a. Val upa khan an kalna tur ṭheuh a ruat ru a ni.  Chu zan chhawrthlapui pawh chuan Herhzawl mihrangte a sun ve ni awm takin a ngui ta raih mai le. Ral kuta thi te hi Sarthi ah chhiar an ni ngai lo va, an ruang chu an lumen ta.  Tlangval hi a hunah chuan zan tam tak an chhing hman lo hial ṭhin a ni.

            Zing khua a lo var a, hun thar leh hun ṭha zawk chuan Herhzawl khua a luah ṭan mek a, lo lam hna la zo chiah lo mahse an hmabak hrang lam hun tur chu an nghak ta ṭhap mai a. Chumi ni chuan tlangval boraltate sunna an nei a, an ruang erawh thuahriat hnuaiah zah takin an zalh ta. Hringchanna tualah chuan an ding tawh ngai lovang a, amah erawh chu an thiltih erawhin rah ṭha a chhuah mawlh ang. Tlangval boral ta te ruang an thlak zawh hnu chuan Lal leh upa te chuan tlangval boraltate ralna an nei a, boral chhungte hnenah an rallak Silai fung khat zel pe in an ral a ni. Rallak Silai an kawl nual tawh a, hei ngawt pawh hi khaw tan  thlamuanna tham a ni tawh a ni.

         Hunbi chhiartute an kal liam ve zel a, zanriah bar hun a ni ta. Upa Seia te inah chuan zanriah bar turin an ṭhu bial ṭhap a, Thangliana nu Mani chuan a fapa te Sarep hawn chu a chhum a, an chiseh neih chuan a tui tawk chauh in a al a. Zanriah an bar ta, upa Seia chuan Sanghal sa thau tak chu a keih mawm hmak a, a fapa Thangliana, an lal putar Vanthangngura hmingsak chu an melh a, 

    " Thanglian, ka zilhna ṭhin che kha hre reng a, upa fa i nihna hi i chhuangin i uanpui tur a ni hauh lo. Dinhmun te hi inthlak thut thei a ni tih hrereng ang ang che! Tlangval in an tihtur thilah kut an kuangkuah ngai lo va, hmasak ber tum tur, nula rim nikhua in Khumpui zawnah ṭhut hauh loh tur. Tin, tlangval dangte dip zawngin emaw an hriat nuam lo tur ang zawngin thu an chhakchhuak ngai lo tih hrereng ang che" tih pah chuan Satui chu mau fian chuan an hawp ri hruih mai a.  A fanu Zaveli chu han melh lehin,

     " Veli, nang pawh hei nula i ni a, inlengte chhawn dan tawk thiam la. Nula tan fimkhur hi hlamchhiah hauh loh tur, uang thei tlangval i khawi chuan i pa hi ka mualpho dawn tih i hrenawn dawn nia. Saw, kan Rodawla, upa Ṭiala fapa te saw a rawn dak lut ang di de a, ka hmu tui lo a nia. Hmanni a a Sanghal kah ni awm a a  sawi pawh kha...Khu kan hmeithai Tuaki fapa Dartawna kah a ni tih an sawi ruk ka hria a nia. Taka, Thanglian, kan hmeithai Tuaki fapa Dartawna khu inzingah tlangnel tir tum ang che, a pa kha kan khaw daingul a ni ṭhin tih hi hre bawk la, Rodawla hian a nek reng an ti a, lo chian ang  che. A ṭul dan dan in hma la rawh u!" tiin a fate zilh pahin upa fa mawhphurhna a bilh tel ta. Hei ngawt pawh hian a fin ruk zia a hril ngei ang.  Buh hmui hiam ka chhunga hnawh khat chuan an han ṭhial leh hlawm a. An tlai hle ang chu...! 

         Thangliana zanriah bar kham chuan pasalṭha Thangkunga te in a pan nghal a. A u Thangkunga hi zawng a thlah hlei thei lo a ni. Thangkunga hi tlangval upa lam a ni dawn ṭan a, thangchhuah hma a nupui neih tum lo a nih avangin to takin ala leng a ni. Thangchhuah tum tawh lailengte hi chu fa lu hloh phah  te pawh an awm ṭhin reng a ni. Pasalṭha Thangkunga nu Kheli chuan a lo chhawn var a, 

    " Taia, ( Thangliana a koh ṭhin dan) kha zanriah i bar tawh em ni? Saw i u Kunga lah hliam a rawn hawn leh nual saw, nang hliam engzatah nge i neih?" a lo ti a. 

     Thangliana chhan hma chuan,  Pasalṭha Thangkunga chuan, " Khaih...ka nu, eng mah a ni lo, kha I Taia zawk kha an phekphelen vak lah ni!" nui kur kur chuan a lo ti a. Chutah Thangliana vaibel chu banin, 

   "Zanin hian Lal in min ko tlat mai, Zawlbuk lam hi Kawltea te ho nen in lo kai mai dawn em ni? Ka rawn peng lo mai a nge, Val upa Hnuna pawh a rawn telve in ka ring!" dam dap chuan a ti a. Herhzawl lal hian pasalṭha leh upa te a ko khawm a ni. Ṭuahzau leh Awhtlang rawn lian thut thei an ni tih a hria a, inven chu thil tih makmawh ni ta in a hria a ni.

       Thangliana chuan, " Aw le, U kung, Zawlbuk ka lo kai a nge, in ro te ka hriat awm a awm chuan ka lo nghak dawn che nia!" tiin a vaibel chu la letin a dingchhuak ta.

      Pasalṭha Thangkunga chuan, " Pa Zamkunga te in lamah ka rawn lam haw dawn che tihna em ni?" an ti chu an nui dun huk mai le. Pasalṭha Thangkunga pawh chuan Lal in a pan ve nghal a.

      Chu zan lam ropuina in Herhzawl a chhun raihna hnuaiah chuan Thangliana chuan Zawlbuk a pan ta. Kawltea leh Hmuaka te chu a hmu thuai a, muangchangin titi pahin zawlbuk an pan ta.  Zawlbuk bawhbel an han bawhliam tur chu Rodawla inhrosa kum kuk thawm an hre ta, 

     " Nang daikil kar a mi hian i duh dan in thu ilo than ve ngawt e lo? Darkual, rawn chhuak teh, kan ṭham teh ang che!"  a lo ti vei kuk kuk mai a. Tumah lo ṭawng chhuak reng an awm lo, Val upa te lah Lal in an lo pan tawh si. An boruak tur chu Thangliana chuan a hrethiam nghal a. Zawlbuk mei engah chuan Darkuala rawn tho chhuak mek chu an hmu ta. Thangliana chu an hawi kual a, chu zan ber kher chuan upa ho leh pavalai lam pawh zawlbukah an awm hauh si lo. Rodawla rawn ding khawh to chu an melh a, mawng hunna pawh ngaihtuah lo chuan,.

   " Dawla....kha engtizia nge ni? Tlangval kan hah hlawm viau awm si a!"  tiin an zawt a.

      Rodawla chu a rawn inher vut a, meng phelh phung hian Thangliana an en a, 

      " Thanglian, i lo inrawlhna tur a awm lo a nia, ral lu in khai ve dek dek a, huaisen ber emaw i inti ta em ni!? Lo ngawi rih teh, kan hmeithai nu fapa hi awm dan kan zirtir teh ang. Min mualpho riau mai!" a ti zui nghal a. 

       Darkuala chu thinrim vang chuan a meng hriam raih mai a, Tlangval ho lah upa Ṭiala fapa an hlauh avang chuan eng mah sawi an tum lo. Upa fate lo hniam chu an hreh hle mai si a. Rodawlan Darkuala a pan ta, chuveleh engtik laia rawn tla zep nge tih hriat loh khawpa rang hian Thangliana chu an inkarah a ding ta tlat mai le. Rodawla pawh a ding ta dat a......

        (Chhunzawm tur)