KAWKVAHAI BUNG 5

 KAWKVAHAI

        .......  (M. LUSEI PALIAN)  .....

                   BUNG-5   NA

         ...........        .............      ..............

           Bullut  Berawchal rah tlan ṭhawn darh hnua rawn bei leh ang hun vel an nghah hnu chuan Chingpirinu chu a hram ta  dut dut  a. Chu veleh hmun tin aṭang chuan Herhzawl lam silai chuan Pawih ho lam chu a tin ta fur mai a. Chutah le, an ralveng an hmuh theihte chu pasalṭha Thangkunga te ho chuan an tin vang vang a, ṭhelh an tum lo hle mai! 

     " Khai le...!" an tih chuan, an silai chu a puak  ta. Ngaw hnuaiah chuan an silai puak ri chu a tawi ta tak mai le.Pawih ralveng chu an " eh!" ṭhawt a, an changel tluk ta dawp dawp a. Chu veleh pawih ral tui taka zan mu lo chhing mek te chu an hmanrua chuhin an rawn ding chhuak ve nghal a. Thangliana te chuan thing bul phen in an silai chu an sawh nghal mial mial a, upa Denga te ho chuan pawih ral tho phang ho chu ngenmu an lo pe ve nghal zat a, an silai a puah zawh hnu chuan thingbul phenin an awm leh ta rih a. An kahhlum sen loh ho chu Herhzawl lal leh a hote chuan an rawn hmatiam ve lehnghal zat a, Awhtlang ram chhunga chulai ruam zawng thisen luanna hmun a ni zo ta! 

      Pawih ral ho an hek hle mai le! Chulai hmuna awm ho chu an rin aiin an tlem tlat mai, Lusei tlangval ho chu an tawm bo nghal zel a, ralrel thiam tak kaihhruai an ni tih chu an hriat hle mai. Pawih la dam chhuak  ho chuan inring fein Silai detna lam chu an rawn pawng kah ve chiam  a, pawi han hawl pha erawh a awm rih lo, an in au khawm a, phen tur an zawng ve nghal zung zung a. Pasalṭha Thangkunga nau te silai chu a puak chhunzawm ve leh nghal zat a, pawih lam chu an hek leh ta hawk a, upa Denga ten an rawn thlak lehnghal zat a, Herhzawl lal leh tlangval ho chuan an rawn ruan zui leh ta zat a. Pawih ho mangang au thawm chu a nasa ta hle mai! Riahbuk an lo sual hnai mah mah a ni, mi sawm bawr vel bak nungdam an awm tawh kher lovang.

     Hetih lai hian Halvung leh Chinhrang chuan hmun tin aṭanga beihna  an tawh avang chuan ruahmanna  siam thiam a har an ti hle a, an naute lah an tlu zo dawn takngial a, hmar lamah chuan an  naute la dam chu an  tlanpui ta! Chu veleh lo khalh hman ngei turin pasalṭha Thangkunga leh a naute an inkhawh chhuak ve nghal zawt a. Pawih ho lo riahna hi khawvar hnaih lam thla eng leh khawvar lam arsi ten a chhun chian avanga an chevel hmu thei an ni reng a. Hei tak hi pawih val hruaitu  Halvung leh Chinhrang thil tihsual a ni. Upa Denga te leh Pasalṭha Thangkunga te inkarah chuan chak fe hian an rawn tlan ta, chutah pasalṭha Thangkunga fei ken leh Thangliana fei chu a thlawkchhuak nghal zat a, boruakah chuan a ri phei fua fua thei hial a, an tum an hlah ta lo, pawih val pahnih chu pialral lamah an tir leh ta! Halvung leh Chinhrang pawh an ding ta chat a.

        Pawih pasalṭha hruaitu te an lai a na ngang mai, an inring lo lai hup thut an ni a, hmun tinah an la chang vei bawk nen, an mahni hualtute hnenah chuan ring fe hian Halvung chuan,

   " Mi inring lo lai hup chiah hi em ni in thiam a, a ngam fa chu rawn chhuak ula lo innuai ang u hmiang, mipa fa in awm na nge...!!" thinrim fe chuan a ti a. 

     Tunah zawng an dinhmun a chhe em bawk a ni. Sal sarih vel chauh hi an ni tawh a, an tan zawng damchhuah beisei chi a ni tawh lo va, a ṭha berah tam fe tlukpui chu an tum a ni tawh mai reng a. Chu chu pasalṭha an nih anga an tih ngei tur a ni.

       Chu veleh Herhzawl lal, mi huaisen thlah thisen zam chu a rawn phu ta det det a, rang fe chuan, 

   " Ni rawh se, tuman thal thlah tawh rih suh u. Pasalṭha te duh dan ang ngei in  ni rawh se!" ring tak chuan an ti chhuak a. 

     Hun rei lote emaw an tih chhungin khua avar dawn ta reng mai, lusei pasalṭha te pawh chuan an hmelma te chu an hual hnai hriau hriau a, inmal beihna an nei dawn ta! Pawih lam pawh chuan an silai dah thla in an mahni rawn hualtute  chu thinrim fe hian an lo melh khawh to mai a. An tan zawng a na em bawk a ni, an ram chhunga muanga an chawlh hahdam laia hup an ni miau mai si! Khawvar lam sava te pawh chuan  an boruak chu hrethiam ni awm tak hian an ngawi ṭhap hlawm a. Ram tana thihngam lu pu te chu an thlir ve ngawt ngawt ta mai chu a ni.

           Hetih mek lai hian Ngunṭhiaua leh a naute chuan la hla deuh tak a, silai han inlawn un un kha an hrechiang ngei mai! An rilru chuan Halvung te ho an ngaihtuah hle a, rang taka insiam nghal zatin hmalam an pan ve ta hum hum mai le! An unaute kal hmasa ho chuan buaina an tawk ngei tih an ring hmiah a, thinrim fe chuan hmalam an pan ta zung zung mai le. Liancheu chuan hma a hruai a, ngaw karah chuan an liam zung zung a, an unaute chhan an ngai a nih ngat zawngin an hnung tawlh hauh lovang! 

          Halvung chuan Herhzawl lal an mahni rawn pan hnai mektu chu a thlir a, thinrim fe hian, 

   " I thu angin kan let a, engah nge min la rawn um zel ni, kan ram chhung ngeiah min hup ta si a, kan unauten an hriat ngat zawngin lal tlang ṭhut  tlang sarih an ṭangrual ngei ang le!" thinrim ha chang ṭhial chung chuan a ti a.

   

       Herhzawl lal  hmel chu inthlak nghalin  Halvung chu an en a, 

     " I naute min bihzui turin i tir a, kan liam hun inchang a, kei Lusei lal hian muanga ka thlir liam i ring reng em ni? In lalte nen remna kan siam hnu a rawn che chhuak in ni tih ka hria, in lal te dan siam ngei in vawihnih bawhchhiahna a ni ta! Chimih nghal vek thei che u ka ni tih inhria la, pasalṭha i nih anga i mi ngenna hnuhnung kha zahsak mai che ka ni e, kan pahnih hian i chingfel ang hmiang!" 

       tih pah chuan a Silai chu a hnunga tlangval chu an pe a. A iptepui chu hlipin a milu lak chem a hum ve ta! Chu veleh pasalṭha Thangkunga leh upa Denga, Upa Seia fapa Thangliana te chu lal hmaah chuan an rawn ding rual nghal ṭhawt a.

     Pasalṭha Thangkunga chuan, " Lalpa, tlangval kan awm e, hahdam khan lo ṭhu la, kan han dah ṭha a nge!" Lal zah thiam tak leh mei nei tak si chuan a ti a, hmalam a pan  hret tih chuan Thangliana chuan a rawn din khalh ta. Hnung lam pawh rawn hawi chuang lo chuan, 

     " U kung, i nau hi kan hmasa a nge!" tih leh Halvung lam chu a chempui nen chuan a pan hnai a. 

     Pawih pasalṭha Halvung chuan, " Min hmachhawn chu inchak viau a ni maw, helai naupang hi kan dah ṭha ang a, ka hmachhawn vek dawn che u a nia!" tih pah chuan an nui lui a.Zamna leh hlauhna hmuh tur reng a awm lo. 

        Chutah Chinhrang chu rawn ṭawngchhuakin, 

   " Kan inmalbeih lai hian hnung lama tlangval ho hian min rawn khawih thut lovang tih rin a va har ve!"  a rawn tichhuak ve a. 

      Chu thu chu sawi awm tak a ni reng a ni. Herhzawl lal leh Upa Denga an nui sang mai le, Upa Denga chuan,

    " Nangni ang a, inmal beih laia inpui zuk chi kan ni love!" chung tlak tak chuan an ti zui ve nghat a.

      Chinhrang chu thinrim fe in a ner ta nung mai le! Pasalṭha Thangkunga chuan a nau huaisen fe Thangliana chu an melh a, 

  " Fimkhur hle ang che," an ti sap a, a hnung tawlh ta hret a. 

      Thangliana, Herhzawl upa fapa pian thiam tak, sakawl pian ang tak leh inzo tak chuan Halvung chu a hnaih ta hret hret a. An mitmeng chu huai zawk nih tum ve ve leh chet dan tur inzir sak tum  chuan an in en ngar mai a. Halvung pawh a fimkhur ve hle mai, fimkhurna chuan a khat a ni ber tawh e. Thangliana meuh zawng,la naupang deuh mahse Herhzawl lal pawh chuan a chet dan a en khan a ring tawk hle mai! 

      Thangliana, pasalṭha Thangkunga hnen aṭanga inzir chhuak tlangval hmel ṭha leh pian fuh tak chuan hmalama penin Thangkungan inmal beihna ah reng reng chet hmasak ṭhin tur a tih chu hre ranin a chem chu an hum nghet sauh a. Chutah Halvung  pum zawn velah chuan a chem chu an vai zawk a, rang fe a lalet in a lu zawnah an vai leh a. Halvung chuan a rin loh dan a rawn che Thangliana chu melh zawkin a chem chu a lo dang ṭek chhawk a. Rang fe chuan a kawlhnam chu an vai ve nghal zat a, a rik hian a ri fua fua ta mai le! Thangliana pawh an tawlh ve han han mai a. Chu zing ni chhuak sarah chuan ram tana nun hlan ngam pasalṭhate chu tlawm an tum lo dun hle mai! 

         An hmuhnawm hle a niang, tuman ṭawng zai reng an rel lo! Han en mai chuan Thangliana chu ala tuai zawk ni chuan a lang a, mahse a che chu a dik thlarh thung a. Halvung pawh a che dik ve thlap thlap tho, an daihrei hmel hle a ni. Thangliana chuan rang fe hian a chem chu a vai chhuak zat zat a, Halvung pawh a tawlh ve leh hawn hawn a, an invir chhawk zat zat mai a ni. An thlan fim pawh a far zawih zawih tawh a, a dingchang tur zawk hriat a har ta hle mai. Halvung chuan Thangliana lu sah phel phawk tum chuan rang fe hian an chhuk sah leh nghek a, Thangliana lo tawlh hretin a lo bum hman a, a tha pe na lutuk chu a bu zuk hial a, han kun hniam zeuh pah chuan a bula fei chu a chhar ta! A kut veilam chuan hum zatin Thangliana awm zawnah chuan an hawlh zui a, alo dang per hman hram a ni. 

       Halvung chuan Kawlhnam leh Fei a keng ta, Pasalṭha Thangkunga ngaih dan a ni ta hauh lo mai, ring fe chuan,

   " Thanglian  fei i mamawh ve em!? " a ti zui zat a.

     Chutih lai chuan Halvung fei chuan Thangliana dar a rawn thawi phei fua a, a kawlhnam rawn vai chu a lo dang ṭek ve leh ta.  Chu hun remchangah chuan na zet chuan Halvung kapah tak chuan a khup chuan an do vak mai le...Halvung chu a fei thlauh chuan an  ṭe ta ṭhat a, Thangliana chuan a khup kawiah a chem chuan an kik  ri leh ṭhawt a, a au ta rawng rawng mai le. Halvung chu a ke khat chuan a ding bu lak lak a, a thinrim mitmeng erawh hlauhawm tham a ni.  A ke chu a dinpui tawh kher lovang le, a thahrui zawng zawng sawm khawm chuan Thangliana chu an bawh ta phut mai a, Thangliana pawh a inveng hman lo teuh kher mai le! Vei lamah inher vatin a chempui chu an vai vak a, Halvung chu a ri no ta chawrh mai a, lei a thlen rual chuan a dinna zawn chu thisen hian a khat ta! Rawn hawichhuak leh ṭawk ṭawkin Thangliana chu a kawlhnam chuan an kawk a, Thangliana chuan lo inher leh pah chuan a chempui chu an vai leh a Halvung kawlhnam chu a per nawlh a.  Ani pawh a ding ve dat a, Halvung hnunga Thangliana kut thlakna lang kuau chu damchhuah pui chi a ni hauh lovang le! Halvung kawlhnam chu va chharin a hum nghal a. 

       Herhzawl lalpa chuan rawn nuih sak in,

  " Kha....tlangval, han zo law law ta che!" a rawn ti ṭeng chher chhak a. 

     Thangliana chuan Halvung chu a kawlhnam ngeia a hnuk chah sak a duh zawk a. Halvung kawlhnam chu a kut dinglamah humin na fe hian an chhuk sah ta ngheng mai chu....thisen a per ta chuai a. Pawih pasalṭha zawng Pialleiah hmuh tur a awm tawh ngai lovang. Chutah Thangliana pawh rawn thaw hlawi hlawiin boruak han hip chuan  a ding vang vang a. 

       Chutih lai tak chuan an chhak lam aṭang chuan Silai a rawn puak ta zawt zawt mai le! 

      ( chhunzawm tur)