PASALṬHA THANGNGHILHLOVA BUNG 88

 PASALṬHA THANGNGHILHLOVA

                    (M. Lusei Palian )

                       BUNG 88 NA

   

                   

            ..........       ............     ..........

             Raltawna thil dap chuan Silai intung a ti thlu ta hlauh mai le! Chu veleh Khuangpuizawl tlangval ho chu an rawn tho chhuak ṭan tlat mai le.  Rang taka insem darhin Bawhbel lam pan pawl an awm bawk a. An Zawlbukah hian rawn lut an awm ngeiin an hre ve ta bawk si, a awm renga tlangval tam tak zingah chuan ngharmut an awm ve dawn lutuk a ni. Pasalṭha Thangnghilhlova chuan a Kawlhnam lek nghal in, " Tawna tunah" tih pah chuan a Bahhnuk nen a vir kual ta. Pawn lama tlangval ho lah chuan an thawm an lo hre pha si, in auhna chi na ta hek lo, an buai hle zawng a ni. Pasalṭha te pahnih Zawlbuk chhunga mite chu an han sapa tal tak tak a le, a rik hian a ri no chawk chawk a, an lo tih ṭhan vang ni maw inhlat deuh hian an awm daih thung. Pawn lam thla eng chu an rin ber a ni si. Khuangpuizawl lam valte chu an tlu thum ṭawk ṭawk mai thung. An Silai awmna lamah rawn luhchhuahtute an awm tlat si a an che hlei thei lo. Zawlbuk lam boruak chu an beisei loh lam thil ani ta si, Kawltea chuan rang takin a mei a nun a, zawlbuk di thli farfem chu a dep ta hmiah mai le. Dai a tla hman lo hlauh a, a alh ta hluai mai le. 

       Pasalṭha Thangnghilhlova leh Raltawna chuan Khuangpuizawl lam tlangval te chu an thal hnem ta hle a, an mahni pawh an chau ṭan ta. Chutih lai tak chuan Zawlbuk chung chu a rawn kang ta si, rang taka insaseng an ngai tih an hrethiam a, bawhbel lamah chuan an zuang phei ta, pasalṭha Thangnghilhlova zuang hmasa in a bawh liam hman a, Raltawna erawh an lo dang hman tlat mai le. Silai an keng lut der si lo, a au chhuak ta bik lo, a invai kual nasa hle a, a lo chau ve ṭan bawk si. Hetih lai hian Zawlbuk chhung chu a rik hian a ri mur mur a, a chung a kang bawk nen, an buai hle tawh a. Pasalṭha Thangnghilhlova a inher rema Raltawna'n a rawn zui lo tih a hre ta. Chutah le, hmanhmawh takin Zawlbuk bawhbel lamah a lim phei nghal zat a. Zawlbuk tuala tlangval lah chet ngaihna an hre lo, an Silai humin an hual bet ta ngawt a.

           Veng hmawr in a kang ṭan ta, Lal in pawh pasalṭha Chenhranga te chuan an hual nghal a. Khaw laia pachang rawn tlan chhuak an thal ta mial mial mai le. Khawchhung mite lahin run an tawk tih hre nghalin an buai hle a, nunau an tlan darh a an ṭe teng tung tawh mai a ni. Pasalṭha Rengliana te lah chuan an rawn pal mial mial tawh mai a, Khuangpuizawl Lal Kawla khua zawng meivapah a chang ṭan mek a ni.  Pasalṭha te kha Lal ten an duh thala chet an phalsak kha a ni a, an che riap riap ta mai, a hma zawngin lal te thu lo chuan chet an la ṭha ngam si lo va. Serthan leh Daipui khua te pawh kha meivapa chan tir an chak hliah hliah kha a ni. 

           Pasalṭha Thangnghilhlova chuan a aihnah phah pui chu hlamchhiah a tum lo, rang takin a kawlhnam leh bahhnuk nen chuan a zuang lut leh nghal a, thinrimna in a ken tel thahrui nen a vai hian a vai kaw duak duak a, Zawlbuk chhung lam tlangval in hriam an lo lek hman ve lo chu an vanneihna a ni ta. Pasalṭha Raltawna ṭhian ṭha tana nun hlan ngam chu a chau tawh kher mai. A boruak pawh a lum hle tawh mai si, Thangnghilhlova'n hmelma lam a vai per nawlh nawlh lai chuan a tal chhuak ta.  Thangnghilhlova chu changel hmun duh tawka sam hi a ang ber a, a kawng tur a vai kaw ta, rang takin a inkhawhchhuak ve nghal a. Chu veleh lo thlir reng tu Kawltea chuan tlangval ho hnenah chuan,." Tunah le" an ti tuar mai a. An silai thun tling tak chu a puak ta tak tak a le, a alh eng sen zuai zuai ta mai reng a, Khuangpuizawl tan zawng tawpna ni a ni ta. 

       Pasalṭha Thangnghilhlova chuan Raltawna chu an buaipui ve nghal a, an thaw dun kawk kawk mai le. Chutih lai chuan Tuikhur veng mual lam aṭang chuan pasalṭha tih hriat tak muzuk fei nen an rawn tlan ta, pavalai lam sawm rual dawn hi an ni a. An rawn ṭe chho chiam mai a, pasalṭha Rengliana te chuan Silai an lo sawh zo hman hlauh a, an ral sai ta, a chanve aia tam mah an tlu nghal a. La rawn tlan zel te chu Nghalchang hliam ang mai hi an ni ve ta. Pasalṭha Thangnghilhlova leh Raltawna lah chu thisen hian an khat vek hi a ni tawh a, an la thaw dun huam huam mai le. Chu hun khirh tak chu an hmachhawn ve  leh ngei a ngai dawn a ni. 

        Pasalṭha Rengliana chuan a Silai chu dah in a milu lak chem a hum nghet hle a, chutih lai tak chuan Khuangpuizawl pasalṭha te Fei chu a rawn thlawk chho ve ta.  A lo hmuh hman avangin a naute chu bawk turin a au chul a, a ni pawh a ṭhing ṭhi ta rap mai le. Zawlbuk lam kap mektute lahin an rawn pui thei der si lo pasalṭha Rengliana chuan an lam pana pasalṭha eng emaw zah lo tlan tawk zawng chuan a tlan thla ve ta.  Khuanu vohbik pasalṭha ni tur renga duan, thisenin a far hnan pasalṭha Thangnghilhlova a rawn ding chhuak a, a thaw hawk a, a kawlhnam hum nghetin a kut veilamah Bahhnuk a rawn chawr chhuak leh nghal zat a, pasalṭha Rengliana tlanna lamah chuan a dawk thla ve leh ta.

      Khuangpuizawl pasalṭha ten pasalṭha Rengliana chu an lo hual nghal a, a ni lah thiam tak leh inzo takin a milu lak chem chu a vai mial mial a. A sir lam a mite an leng ta lawp mai le, a mitsir chuan pasalṭha Thangnghilhlova thiam taka kawlhnam vai chu a hmu thei ta. Mualsei pasalṭha leh Puklui mihrang chu an han tal ta tak tak a le, a rik hian an ri no chawk chawk a, pui tak a ni pui tak. Tlangval lam lahin an thlir chak si, thlir hman an ni si lo, an khawngaihthlak let ling hle zawk a ni.  Raltawna huaisenna thinlung leh chhelna in a tlakbuak mek pawh a bula feikibar humin a rawn ding chhuak ve leh ta. A hmel en mai pawh chuan huphurhawm tham a ni tawh a, chutah le Zawlbuk aṭang chuan tlangval an rawn chim ṭan ta, kang bang an ni mah tawh zawk! An hmui hiam tawh mai le. Chu veleh Silai an lek tawh lo milu lak chem nen an ri ta helh helh mai a, Kang ut rim nen thisen thang huam nen insat ri leh na tuar ri nen khua a khat zo ta. 

        Pasalṭha Thangnghilhlova te chuan an bitum te dah ṭha felin Raltawna an rawn din pui ta, Raltawna pawh a fimkhur seng lo a ni, a awm chu a kak duai a, a mal lah a duk thluah tawh a. Khua avar ta, pasalṭha Chenhranga te chuan Khuangpuizawl lal Kawla chu an lo phuar fel der tawh a. A nupui leh a fate erawh engtin ti lo chuan an lo ar khual dintir a. Luhkasangah rawn din tir in ring tak chuan thu a rawn sawi tir ta. Pasalṭha Chenhranga chuan a silai ngul vawt raih chuan a hawlh chilh ran a, a hmelah lah eng mah chhiar theih a ni ta lo. Khuangpuizawl lalin an tlawmna thu an sawi chuan tlangval la dam chu tlem te chauh an awm ta.  Khaw mite lal tualah an khalhkhawm a, khawlai lah thisen luanna hmunah a chang zo ta! 

       Pasalṭha Thangnghilhlova chuan lal Luhkasang pan chho in heti hian thu a sawi ta. Thinrimna nen a khat a ni bawk a, a au ribg kher mai,

 " Khaw mipuite u, in chunga thil thleng hi mak in ti in in hrilhhai hle ang tih ka ring a. In lal hian khawdang lal, tlangchang lal  pathum thurual puiin kan khua, Puklui, Lal Saitluanga khua chu min rawn chimih vek an tum kha a ni a. Mahse Khuanu khan pawisawi lo thisen luang tam tur a rawn dang ta a ni. Tunah hian in lal hi kan hruai dawn a, damin a rawn kir leh  angem tih erawh kan hre hauh lo thung. Pawisawi lo mi tam takin an tuar hi pawi kan ti a, an thisen mawh erawh in lal leh a thurualpui ten an phur thung ang.In khaw awmzel dan tur erawh upa te leh lalnu kutah awm rawh se!" a ti chhuak ta a. Chutih lai tak chuan Chhun lam ropuina pawhin leilung a rawn mawi dawn ṭan a.Hreh hmel tak hian a rawn sen ta phut mai a ni.

           Tlangval te chuan an ṭhiante an chian thuai a, thi erawh an awm hauh lo na a, hliam tuar an tam hle a ni. Pasalṭha Chenhranga nauten thi leh dar leh Silai te an lo khawm zung zung a. Pasalṭha Renglianan tlangval la dam te a naute nen an lo ṭingmit ve mek bawk a. Khuangpuizawl khua zawng dinthar leh a huphurhawm hle ta ve ang.Khawtual tlangval pakhat chu hruaiin Kawltea chuan Bawlpu a zawnpui a, an hmuh hnu chuan an ṭhiante hliam chu ramhmul damdawi te bel sakin a tuam sak ta hlawm a. In runna ah hian Bawlpu leh Sadawt hi an khawih tel ngai lo va, nunau leh tar chak lo pawh an khawih ngai hek lo, a khawih lui chungah vanduaina a thleng ṭhin in an hria a ni.  Khaw chhunga thil hlu an lak zawh hnu chuan Tualvum lam panin an kal dawn ta. Pasalṭha Rengliana leh Thangnghilhlova chuan kal dan tur an rem nghal a, Raltawna pawh chhel takin a ding ve thei ta.

      ............         ...........     ............

      Pasalṭha Chala te lam thung kha a tlangval tirhte an lo let chuan khawchhung a ngui raih thu leh tlangval pawh an hmuh loh thu an rawn thlen a. Chu chu an rin dan sa reng a ni. Lal Saitluanga chuan pasalṭha Hingliana leh tlangval ṭhahnem tak a tir nghal a, Laltawna han be turin a ti ngat a ni. Heti hian thu a chah kher a,

     " Puklui lal i khua ah a rawn tla lut dawn a, a u Mualsei lal Sailiana  leh a tlangval ten an rawn zui bawk a. I khua a thisen luantir i duh chuan i tlangval ten an theihnaah min lo hmuak rawh se!" tiin. 

      Chu thu keng chuan Pasalṭha Hingliana leh tlangval te chu an tlan ta vang vang a ni. Tualvum khawchhung an lut a, tumah chuan an lo be lem lo, lal in an pan vang vang a, lal inah chuan lal leh upa ho an lo ṭhukhawm laih mai a, pasalṭha Hingliana te lawilut pawh lo beisei zawk ni awm tak hian an lo thlir a. Hei hi Upa Zikpuia ruahmanna a ni, engtin mah an lo tih loh chuan Puklui pasalṭha te hian an kap ngawt lovang tih kha a ring tlat a ni. Pasalṭha Hinglianan Lal Saitluanga thu a thlen chuan an lo bu nghat nghat a, ṭha takin hahzu te zu turin an lo ti daih a. An za chuan tho chhuak in Lal Saitluanga te hmuak tur chuan Khawdai an pan ta. Pasalṭha Hingliana te pawhin mak an ti hle mai, chutih rualin thisen chhuahna thleng lo tur chu an lawm ve hle a ni. Upa Zikpuia zel chuan hma a hruai ta, tlawm lo thei lo dinhmunah an ding ta miau mai si a ni.

       Lal Saitluanga ten khua an luh chuan Tualvum lal chu an la be duh der lo thung a, fimkhur takin tlangval ho pawh inring sa in an awm tir a. Lal Saitluanga hian Tualvum lal leh a thurualpui te hi tlawm chikima tlawm a tum a, tlawmna sang ber leh zirtur hmuh tir a tum ngat a ni. Upa Zikpuia erawh a ṭangkai hle a, Lal Saitluanga te chuan upa Zikpuia thu chauh an ngaithla rih a ni. Tualvum zawlbukah an innghat lui a, tlangval luahlum tu lah a hming chauhin an nei a ni. Tlangau pa leh upa te chuan belpui pu in Zawlbuk an pan a, chutah Lal Saitluanga chuan,

     " Khamrang ngawpui chunga roreltu hi a intodelh tawk a, khawdang bel ka ngai lo ve!" a lo ti ngat mai si. Vaibel pak hluaiin Chhawllen tlang a thlir vung vung mai a ni. Hetih lai hian Tualvum lal nula Kawisarihen-i chuan Lal Saitluanga chu rawn pan chatin, 

  " Ka pa!" tiin a darah a rawn vuan ta. 

  Lal Saitluanga pawh chuan Lalngovi chu lo be ve vatin, " Lalngo, Saimawii zawngin Pialral a kai san ta che asin! Pialral kawnga tirtu hrem turin a ni ka lo kal ni!" thinrim leh lungngaihna insum tak chuan a ti chhuak ta. Lalngovi lah chuan a bel chat mai a, pasalṭha Chala a hmuh chuan zawn nei tih hriat takin a hawi kual ruai ruai a. Daipui leh Serthan lal te an tlangval man te chu a hmu na a, ṭhadanga sakhmel reng a tawng lo. Lal nula meuh tan han zawh chi lah a ni der si lo. Hetih lai hian Laltawna chu a chhuat ah a vei sek mai a, chet lak dan a thiam ta lo. Hringnunah hian zawng kan thil tih sualin min vuak let hian kan na ber a,mu leh mal kan nei lo va, lungphu hi phureng chung si in kan lo thi tawh ṭhin hi  a lo ni. Lungphu a chawlh hma hian vawi tam kan thi hman tawh ṭhin ngei  si a. Khua a thim ta, leng len hunah pawh eng mah an la rawn sawi lo, Laltawna lahin Lalthangthuia leh Lal Ngurauva chu a pawh ngam der lo. Lenglen hun a ni ta, Puklui lal te an la ngawi cheu mai, Zawlbuk lamah an ri hat hat a, an mi man an ṭingmit te lah an veng hneh em em a, Tualvum khua chu kil tin aṭangin an khuap ta. Khawchhung mipui lah pawnchhuak an awm lo, naupang pawnto tak ngial pawh an awm lo a ni. An boruak zet chu a khirh hle a ni e.

         Khua a lo var a, hun a kal zel a,feh reh san hun chuan pasalṭha Thangnghilhlova lam kal tirhte an rawn thleng ta. Khuangpuizawl khua an hal thu leh an lal leh tlangval te kaia an rawn thang mek thu chu an hre ta. Lal Saitluanga pawh a kiai ta sak mai le. Tualvum lam erawh an buzawl ah che thei lo chuan an awm mek a ni si, an thil tawn meuh chu mi ṭhenkhat chuan thihna aiin a na hial zawkin a hnu ah an sawi zui hial a ni.

         Losul haw hun a nih meuh chuan Puklui pasalṭha Chhak pawih tlawmtu leh mihrang dangte chuan Tualvum leilung an rawn dai lut ta. Pasalṭha Chala chuan a naute lo hmuak vatin tlangval te chu Bawlpu Bawlchhuaka a lam tir nghal a, Raltawna a hnuh meuh chuan a sa ve zawk mai le. Lal Saitluanga leh a U Sailiana chuan mahni khua ang maiin an tlangval te chu an lo hmuak a, an lo lawm a, bawhhla erawh an chham lo thung. Lal Saitluanga hun nghahhlelh em em chu a thleng ta. Pasalṭha ho chu ko khawmin thu a pe a, khaw chhung mipui zawng zawng lal mualah an khalhkhawm ta vek a. Khaw thum lal an man te leh tlangval te chu lal tualah an dintir ta.  Pasalṭha Rengliana leh a nauten Tualvum lal leh upa te Lal mualah an khalh khawm ve bawk a. Lal Saitluanga te unau chu an thlir ta ṭhap mai le.

          Lal Saitluanga chu Tualvum lal luhkasangah Vaibel pak hluai hluai in a ding peu al a, a U Sailiana leh pasalṭha te a kiangah an ding phui khap mai a, a zahawmin a hlauhawm ta hle mai. Hetih lai hian Tualvum inchhuanna ber Lalngovi chuan a thinlung zawng zawnga a lo ngaihtuah ṭhin, a tawnmang ah hial a lo hmuh ṭhin pasalṭha pian thiam tak chu a hmu ta! Chu a hmangaih, a duh hneh theih loh chu an hmelma a ni ngei si, chu doral kara hmangaihna chuan parfung a chawi a ngem? Chu zawng chhanna hriat loh zawhna a ni. Hmangaihna a thinlung luahtu sakhmel han tawn meuh zawng a mi deh a na khawp a, khawdang hawi a har a ni, hmangaihna leh indonaah meuh chuan ramri kham chin a awm ngai si lo. Lal Saitluanga chuan a aw a thian ta, mipui te chuan thaw dep dep in an ngaichang a, heti hian a ṭawng chhuak ta...

  

     (Chhunzawm tur)