PASALṬHA THANGNGHILHLOVA BUNG 84

 PASALṬHA THANGNGHILHLOVA

                    (M. Lusei Palian )

                       BUNG 84 NA

            ..........       ............     ..........

 " Ka fanu min thah saktu khua hi ka ngaihdam theih in ring em ni? Hremna ka pek hma che u in ka thu hi lo ngaithla teh u, in lal hian khawdang thurualpuiin ka khua rawn chimih a tum a. In lal fapa ngeiin a rawn ho ngat a nih kha. Kan dikna reng reng hnual suata an thil tihdik chauh thailan tum mi bawlhhlawhte hi Khuanu hian a hum bik lovang. Tualvum lal nen inremna Saui kan tan tawhhnu fuih thar lehin min chimih ṭhak in tum a, khaw li lai inṭangrual a ni lo'm ni? Ngurau, tho teh, Tualvum lal ka nek lo va, min nek a tum zawk asin! I fapa khan ka fanu  Vanvawm khuaah a tir liam asin!" hachang ṭhial chung chuan a ti ta.

        

       Daipui lal chu dinchhuah a tum rih lo a nih hmel a, a luhai chuan dawm tur a zawng niin alang. Chutih lai chuan lal mual sir aṭang chuan aw pawr tak hian, 

     " Kan hlim lai taka ka hual hnan e min rawn tih chu ava pasalṭha zia lo ngai ve le, mipa nia inchhal in awm em? In awm ve a nih chuan min hmachhawn ta che u." a rawn ti ve ta chher chher mai le. Chu aw zet chuan pasalṭhate beng chu ava luh rang em!

        Pasalṭha Rengliana chuan rang taka pan nghal in, " Khawi lam zupawl nge lo chik kha, khawi lam buhpawlah nge a tawm, a hmanraw duhber rawn thlang teh se!" tih pah chuan mipui lo awmna lam chu a pan a. Lal Saitluanga leh Sailiana pawh an ngawi ta rih a.  Pasalṭha Chala chuan Daipui lal chu a hmai ala uang riau hian a hria a, chik tak hian hmun tin chu a thlir a, mipui zinga lo ṭawngchhuak ve pawh kha a ngaihsak lo a ni. 

         Mipui zing aṭang hian Pasalṭha tih hriat tak, pian ṭha leh fuh zet hi a rawn dingchhuak ta, Daipui buanchak Thangkunga ngei a ni. Pasalṭha Rengliana pawh inring tawk tak hian a pen chhuak a, rang takin thil a thleng ta. Mualsei pasalṭha Rengliana hmaah chuan chhak pawih tlawmtu, mihrang ni tur renga piang pasalṭha Thangnghilhlova a ding ta chat mai le. Pasalṭha Thangkunga pawh chuan mak a ti ngei mai, tlangval ṭuan ṭha mitmeng hriatthiam har tak chu a melh a, han ding hlekin a pan ve ta zel a. A hmelma lam chu han melhin, 

     " Ka hmanrua ngei ka la phawt duh e, mi dawihzep ka ni lo va, min lo nghak a niang chu!" a ti ve kher a. 

         Hetih lai hian pasalṭha Chala chuan pasalṭha Rengliana chu a lo be ve mek bawk a, engkim hrethiam ni awm tak chuan a bu ve nghat a.

      Pasalṭha Thangnghilhlova chuan, " Ni rawh se, tlanchhe mah la ka um thovang che, i ṭawngkam i cheh tawh a, mipa fa i ni ve a nih chuan i rawn hlen ngei ang!" Daipui buanchak han melh pah chuan a ti a. 

      Thangkunga chuan, " I ṭawngkam chu mihrang ni ve awm tak a ni, ka thangrei lovang" tih pah chuan an in lam ni awm tak chu a pan ta a.

       Daipui lal Ngurauva chu a rawn dingchhuak ṭuah ṭuah a, Lal Saitluanga te unau han melh pah chuan, 

  " Ka pasalṭha khan hnehna a chan chuan ka khua hi min chhuahsan nghal ang che u, inralring hman lo lekin min siam a ni a, Tualvum lal nena inbuaina chu  thar thawh lo teh ang, ka tlangval leh ka fapa ka chan ve bawk. Ka fapa lu phei chuan in sahlam a mawi hial a ni lo'm ni?" thinrim insum ve tak chuan a la ti ve a, Daipui lal hi ala zam hauh lo, eng emaw takin a tlangval te a lo tawmruk  tir a ni mahna. 

     Mualsei lal chuan,   "Ngurbawng, i pasalṭha a chak a nih ngat chuan kan chhuahsan ang che, i khua hi meivapah kan chantir hauh lovang. Amah erawh chu, kan tlangval a chak a nih erawh chuan nang pawh kan hling ang che tih i hre tel  dawn nia!" a ti chhuak ve khut a.  Ngurauva pawh a ngawi hmak mai, sawi leh tur a hre tawh lo a ni. An thil lo tih tawhte chu a chhut let vang vang a, kutphaha hling awm ang maiin a chhun hian a hre ta.

  

          Hetih lai hian pasalṭha te chuan Lal in chu an enfiah a, ṭhi leh Dar te Silai te pawh chhuatpui ah chuan an dahkhawm nghal a. Puklui lalte chuan Daipui lal luhkasang chu an bel ta. Tlangvalten Ngurauva chu an hual ru ve mek thung a. Pasalṭha Chala chuan Pasalṭha Hingliana leh Chenhranga chu a be zauh a, Serthan lam khan chu an veng ṭan ta. Lal Saitluanga chuan, 

    " Tlangval te u, Daipui lal kha rawn ṭhut chhoh tir ve teh u, Puklui lal pawikhawih pawi zia hi han hmu zel teh se!" a ti chhuak a.  

    Upa Khailiana chuan, " Aw ti tawh u tlangval te u, a zubel te pawh rawn chawichhuak u la, Haizang No te a nei ve emaw kan chhawl hal i hnawn ang u" a ti ve nghal zat a, chu chu a awm tawh reng a ni.Tlangval ho chuan Daipui lal bel chu an rawn chawichhuak ve nghal zat a, 

     Lal Saitluanga thung chuan, " An ni zu zawng a thlum a nep ang, kan bel ngei kha han hung teh u!" thupe aw tak chuan a tichhuak zui a, tlangval ho pawh an rawn phe nghal vat mai.

        Lal tualah chuan Pasalṭha Thangkunga chu a rawn ding chhuak ta, Sapui vuna siam phaw hi a rawn keng tel nghe nghe a  a hmelah chuan zamna hmuh tur reng a awm lo.Pasalṭha Chala chuan a nau Thangnghilhlova chu fuih nghalin an ding rem ta. Pasalṭha Thangnghilhlova chuan, 

   " I in la kim maw pasalṭha, lak duh dang ila nei em!?" nui sang chuan an ti a. 

     Chu ṭawngkam chuan Daipui pasalṭha chu a ti thinrim hle mai. A phaw chawi kangin a milu lak chem a hum nghet sawt a, 

     " Tlangval, mi inring lo lai hup duh zingah i tel ve tih hria la, ka dim hauh lovang che. Kha lo inring teh!" pawr ṭeng tak chuan a ti nghal a.

     Pasalṭha Thangnghilhlova pawh a insum ta lo, 

   " Nangni khua hi alawm mi inring lo lai hup ṭhintu chu, mahni nihna hre lova iak iak i nih hi, Puklui khua hup tumin ṭum hnih lai in thawk chhuak tawh a ni lo'm ni!" tih pah chuan a kawlhnam chu a lek a. Ṭawngchhuah aiin chet chhuah a duh ta zawk. 

       Pasalṭha Thangkunga  nghawng zawnah chuan a kawlhnam chu an vai chhuak a, a tha pek a na kher mai. Pasalṭha Thangkunga chuan a phaw chuan a lo dang na a, a tawlh  hawn thei hial a, a tumpuipa thahrui ngah zia chu a chhut nawn leh hial a ni. A phaw la hniamin a milu lak chem chu a vai chhuak ve nghal zat a, a rang bawk a, Thangnghilhlova pawh a inher nghal zata teuh tak a ni. A thlirtu te lah chuan an daihrei dawn tih an hre nghal mai reng a, inmelh ralhin an inpan leh ta. Pasalṭha Thangkunga chuan a milu lak chem chu Thangnghilhlova awm zawnah an vai ve ngheng a, chutah tak chuan thil mak a hmu ta, englai a a ken nge a hriat loh Bahhnuk in alo dang ṭek chhak a, a kawlhnam phek zawng chuan a hnungah ri thlawrh khawpin a rawn  hlap ta a le! Chutiang intham lohna chu Thangkunga tan chuan tlawm thlak tak a ni. A er ngang ngang mai le, chulai hun ṭha chu Thangnghilhlova chuan a la bawhzui duh hauh lo. A khi suk a, hnehsawh takin a kawlhnam chu an lakual leh a, a mah pawh a vir zak mai a. Lo thlir tute tan chuan hmuhnawm tak a ni, heh dai dakin an thlir a. 

         Daipui lal in Serthan lam khan a melh leh zuk ṭhin chu pasalṭha Chenhranga leh Rengliana chuan an lo hmu ru kiau a. A rukin Serthan lam khan ah chuan tlangval ho an tawlh pui ṭan ta. Thil eng pawh thleng thei a ni tih an hrereng a, an hmuhnawm thlir lai chu dah ṭha in midang an lo veng ve thung dawn a ni. Hmelma engzat pawh rawn chhuak dawn se khan ṭha, lo lambun na tur hmu vatin an Silai an hum ta vang vang mai le. Rei an ṭhu hauh lo, hla taka thawm chu an hre ta nghal a, Pasalṭha Rengliana chuan Pasalṭha Chenhranga chu a melh ralh a, Daipui lal lah chu che chhuak ngam tur chi ni ta hek lo, pawi tih hmel takin a thlir ta.

        Pasalṭha Thangkunga hnungzang chu a sen vual tawt a, tlai ni nem chuan a chiang thei ang berin a chhun ta emaw tihtur a ni. A milu lak chem chu a hma aia nghet a hum in Thangnghilhlova chu a nawr leh ta, a Bahhnuk chu a lo dan sak thei mai a, mahse Kawlhnam chu a dang zo ta meuh lo, han en mai chuan an intia tawk viau mai si a, a hnung chu a ri leh thlawrh ṭhin. Chutih rualin a milu lak chem vai pawh chuan Thangnghilhlova chu a teuh hle ṭhin a ni.In mal beih thiam tak an ni ve ve tih a lang reng a ni. Ṭan an han la leh ta, Daipui mikawl savun phaw chu indannan a tlak tawh loh a thler veng vung tawh mai a, rang taka Thangnghilhlova vawm nana hmangin a milu lak chem chu a nghawng zawnah a vai leh ta. Pasalṭha Thangnghilhlova khuanu vohbik chuan a Bahhnuk in lo dang lehin a Kawlhnam fawng chuan Thangkunga berah a chhu ta bur mai le, Thangkunga chuan ṭek lo phe hnai em em mai a hmu a, Lal tualah chuan a tlu thum ta ṭawk mai le! 

       Lal Saitluanga chuan ring takin, " Ka pasalṭha ka fanu Pialral a tirtute khua a nih hi, theihnghilh hauh suh!" an ti chhuak ve leh kher a. Chu chuan pasalṭha ding mek thinlungah chuan thu tam tak a sawi si. 

       Pasalṭha Chala chuan a tir aṭangin a nauva chet dan chu uluk takin a lo thlir reng a, Daipui mikawl kha a hneh ngei dawn tih a hria a, hrehawm tuara thih tir a tum tih a hre ngat a ni. 

        Pasalṭha Thangnghilhlova chuan, " Daipui mikawl chu i chau em ni, nge chhun  lamah belpui i lo kuan hnem deuh em ni, i mi lu lak chem hum la... tho rawh le!" chang fak chuan a ti chhuak a. A hmel han en mai pawh chuan chu inmalbeihna chu ala kham lo hle tih a hriat theih hial a. 

       Pasalṭha Thangkunga chu rawn tho chhuakin ala tek nawk nawk a, a lu a hai hle tih a hriat a. A milu lak chem chu humin Thangnghilhlova chu an bawh thut a, mahse a luhai nen a fuh ta hauh lo. Pasalṭha Thangnghilhlova inher in rem takin a ding a, a Kawlhnam chu lei charah han vawm lutin a Bahhnuk nen chuan a ding ta. Pasalṭha Chala chuan a tawp a khar dawn tih a hrethiam a, a lo bu nghat a. Pasalṭha Rengliana te zuk melh leh zauhin a Silai chu a hum ve leh ta. 

        Pasalṭha Thangkunga chuan Thangnghilhlova chu thih chilh tum ranin a milu lak chem nen a rawn bawh leh ta. Pasalṭha Thangnghilhlova chu veilama inher zauhin kun chungin  a Bahhnuk chuan Thangkunga khup  dinglam chu a chek  ta pawp a, ding chhuak lehnghal in a hnungah chuan a Bahhnuk chuan a rin chho ta, a nghawng ah chuan a phei zawngin an thai lehngat a. Daipui pasalṭha chu ṭhingṭhi hnawkin a khur ta ngar ngar a, a thahrui a tawm ta a ni mahna, chutih chhung chuan Thangnghilhlova chuan a Kawlhnam la in muangchangin Thangkunga chu a pan ta. A kawlhnam chu tlai ni tla in en tle nghal zatin an vai zuai a, Daipui mikawl lu chu a taksa aṭangin a per ta nawlh mai le!  

        Hetih lai tak hian pasalṭha Rengliana Silai chu a puak nghal dur a, pasalṭha Chenhranga silai a puak ve nghal bawk a, Serthan lam khan chu a rik hian a ri nghal hem hem a. Daipui lal luhkasanga Ngurauva chet han tum chu Pasalṭha Hingliana chuan a kut dinglam chuan alo Saivawm maichum ngheng mai chu a thum pup thei hial a ni. Silai puak ri an reh a, Serthan khan lam aṭang chuan tlangval rual an la rawn tlan chhuak cheu mai le. Chu veleh pasalṭha Chala leh Thangnghilhlova chuan hmelma lam rawn luhna chu tlan chungin an pan ta nghal a.  Pasalṭha Chenhranga nauten silai an sawh nghal bawk a, Rengliana te erawhin an milu lak chem nen hmelma lam chu an pan ta thung.

        Lal Ngurauva hian a tlangval tam zet chu Serthan lamah a lo tir a,  khaw venhim nan an lo inpui tawn a ni. Chung ho chuan khaw lama Silai puak kha an lo hre ngei a,hmanhmawh takin khawlam an rawn pan ta a ni. An ven loh lam, an rin loh lamah Puklui lam an che ta tlat a ni. Hei tak hi pasalṭha Chala remruatna kha a ni. Kham kar leh tlangpang chhengchhe zet an  paltlanga, hmelma lam rin lohnaa luhchhuah kha ṭha zawk a a ngaih vang a ni. Daipui pasalṭha Bualkima leh a naute chuan hmelma lamin an khua an la tih an hriat chuan an rawn thinrim hle tawh a, hmanhmawh takin an rawn tlan a ni, an hmatawng Seikima leh tlangval tam zawk chu an tlu tawh a. An ni pawh chuan an silai tipuak ve nghalin an kap let ve nghal zat a, mahse ṭanhmun rem zawk chu fuh an nei mang lo, khaw lam hawia Silai lek zawng an mahni mi leh sa lam sai fuh an hlau ve a ni. Silai sawhna hun an nei tawh lo, milu lak chem nen an rawn tlan ta.

          Pasalṭha Chala leh Thangnghilhlova pawh hmelma te nen an inpawmchilh a, Pasalṭha Chenhranga ten an rawn valh nghal a, Pasalṭha Rengliana pawh milu lak chem nen a zuang lut ve ta. An han innuai ṭan a le, a rik hian an ri buai buai mai a, Lal Luhkasang aṭang chuan lang pha miau hek, ding chungin lal te pawh chuan an lo thlir ṭhap a. Pasalṭha Thangnghilhlova thahrui tam tak leh thinrimna in a chhut muk chu pui tak a ni, a laiah chuan a sapa tal a ni ber mai! 

     ( chhunzawm tur)