PASALṬHA THANGNGHILHLOVA BUNG 83

 PASALṬHA THANGNGHILHLOVA

                    (M. Lusei Palian )

                       BUNG 83 NA

            ..........       ............     ..........

      Lal Saitluanga chuan nui suka thlir vang vangin , " Ka pasalṭha Chala leh Thangan hma hruai teh se!" a ti chhuak ta. 

     Lal Sailiana chuan, " Ka pasalṭha Rengliana khan tlangval ho rem ve thung se la, Chawntui pasalṭha Chenhranga khan pui se!" an ti zui ve nghal zat a. Fing takin rem a ruat nghal zung zung mai le. 

      Zan lama an rel tawh angin Pualhrang zau lam aṭangin Daipui Ngurauva khua an pan ang a, thim hma in khua an hual dawn a ni. Daipui khua thim hma a lak hman an tum danah hian a hlauh loh zia leh an tham loh zia a lang chiang hle a ni. Tumah chhuah an tum dawn lo a ni.  Pasalṭha Chala bul chu Thangnghilhlova chuan a pan ta nghal a, a ni chuan alo thlek uluk hle mai,a bula a din lai chuan, 

    "Engah nghah ngaia i awm ni? Ka rawn lam tir ṭep che asin!" zawi fiah tak chuan a ti chhuak a. 

    Pasalṭha Thangnghilhlova chuan, " Lal in min ko leh hnuhnawh alawm maw le, ka inthlahrung hle mai!" nui sang chuan a ti a. A hmel a harh ṭha a, a mitmeng erawh sawifiah hleih theih ani lo thung. Pasalṭha Chala chuan ala melh vung vung a, thu tam han inzawhna hun a ni si lo. Kal an siam ta, Pasalṭha Chala hian a hriat theih ata rammu tura kal chhangchhe ber leh bawr bel an ni hial awm e. Thlaruk bel pahnih leh thla thum bel panga an keng tel a ni. Upa ho lah an ri leh lung lung ṭhin.

        Daipui ramri an thlen hun chuan Lal leh upa te hi tlemin muang hret se pasalṭha Chala chuan a duh hle a ni. Khaw lamah Ralkapthanga leh Zamuana ten tlangval an lo ho thung dawn a ni. Lal chhungkua himna an dah pawimawh hmasa ber ang a, ralveng pawh mumal takin val upa Buangan a ruatsa thlap nghe nghe a ni. Pasalṭha ten zan lamah Serthan khua leh Daipui khua a ruala bawh kha an duh na a, Lal leh upa ten mal khai zel an duh tlat kha a ni. An demawm bik lo ve, hneh chin apiang hneh taka nuai an duh a ni.

         Tlangval ho rin aiin Lal leh upa te an kal thei a, an phei chheh a zang vah mai. Mahni zahawmna humhim nan leh  phuba lak duhna hian  a er thlu ta a ni. Puansen mual mawng leh Far ngawpui insutna an pelh hnu chuan chawchhun an fak dawn ta. Pasalṭha hovin n ngaichang a ni tih inhria in lal leh upa ho pawh an theih tawp chuan an ṭang ve hle mai. Chawchhun an han fak dawn a, kawrte kam tui hnaihna hmun an thlang a, changel hnah hlai pui pui an phah paw phei chuk mai a, buh hmui hiam mai an fun a rum tawka an chhum chu an bun ta thluah a, an chawhmeh fun ang ang an han bun khawm a. Lal leh upa te hlui chu an melh ta ṭhap a. An ni hovin an han bar hnu chuan pasalṭha hlui lam chu tlangval hovin an han thlir leh a, chumi hnu chuan an bar leh ta. 

       Chaw chhun an fak zawh hnu chuan Lal Saitluanga chuan, " Renga,  zanriah chu hmelma khua ngeiah bar ang aw!" an ti chhuak a. Chuveleh lal Sailiana chuan,

   " Chawntui mikawl hian zanriah Daipui khuaah min bar pui thei dawn tih ka hria a ni!" a lo ti chhuak ve bawk a. Chu chuan pasalṭha te a fuih phur hle mai! 

   

        An vaibel han beng hlawmin duhthaw tak hian an han pak khu luai luai a, upa Khailiana chuan, 

   " Ti tawh u le, kan inpeih e!" a ti chhuak ta. 

     Pasalṭha Chala te chuan hma hruai chhunzawmin kal an han rem leh ta. Lo fing sawm awm vel an kal hnu chuan Daipui ramvalh chhungah an lut ta. An han ding deuh dat a, pasalṭha te pawh an mit leh beng an chhi ṭan ta. Pasalṭha Chala chuan tlangval ho hnenah chuan, 

 " In silai insawh ṭha em, han endik u la, in hmanrua hlat tawh hauh suh ang che u" a ti chhuak a. Tlangval ho pawh chuan an silai chu an endik sap sap a, Chhak pawih nawr ho phei chuan kawlhnam an hnung puak far a, an han nul vel thuak thuak chu tlangval dang chuan chilthli tla lo chauh hian an lo thlir thung a. An inpeih fel ta, kal an rem leh a, kawng ṭum ṭha zawk an pawh ta thuai mai reng a. Daipui khua hi a hla hauh lo va, zan riak lovin a khan hi pasalṭha Chala hian a hre em em mai a ni. Daipui lam pawh hian an rawn hmu fuh ve tlat kha a nia, kha tak kha buhseng ṭul lai pawh a an lo ven ruk kha a ni.

       Ni suk chen a ni ta, Puklui mihrangte chuan Daipui khua an hnaih ta hle mai, pasalṭha Chala chuan heti hian ralbawh dan tur a sawi ta,

    " Serthan kawngṭum lam saw Pasalṭha Rengliana leh Buktea te hovin in rawn khalh ang, chhuah lam aṭangin in rawn lut dawn tihna a ni. Tlak lam mual aṭangin pasalṭha Hingliana leh pasalṭha Chenhranga te an rawn lut thung ang. Keinin lalte nen kawng pangngai hi kan zawh ang a, Thangnghilhlovan hma a hruai ang!" a ti chhuak ta. Thangnghilhlova a ruka a chhuanzia leh a rintawk zia a tarlang chhuak chiang hle mai. Chutah pasalṭha Chala chuan tlangval ho an melh ralh a, chung ho chuan an lal te chu an din hual ṭan ta. Lal leh upa ten ven uluk an nih zia an hmuh chuan n khi vei suk a, hmalam an pan ta. 

          Daipui khaw kawtchhuah an thleng ta a din khawmuanna hun awm hek lo le, an insem darh ta sang sang a. Pasalṭha Thangnghilhlova chuan a Silai, a pu Silai ngei mai hum chungin Saimawii fam khawpuia tir liam tute khua chu a rap lut ta. An ralven buk an hmu miah lo leh muang taka an lo awm chu mak an ti hle mai a. Daia vawk tla leh ar chenin an hmu lawi si.Daipui khua hian eng emaw tak an lo ti a ni. Veng hmawr ah pawh chuan mihring hmuh tur an la awm lo cheu, lal leh upa te pawhin mak an lo ti ve hle a. Pasalṭha Thangnghilhlovan hma a hruai mek lai chuan pasalṭha Rengliana te Silai chu a puak ta, chu veleh pasalṭha Chenhranga te Silai pawh a puak zui ve nghal zat a. Khawchhung mipui ruai lo kil mek an chiai zo ta. Thangnghilhlova silai pawh a puak ve ta, pasalṭha Chala pawh Thangnghilhlova bula ding vatin a silai chu a puak ve leh ta dur a. An Silai hnung puak ve ve in an lama tlangval rawn tlan tur chu Kawlhnama lo dan an tum ta, a rual deuh thaw chuan an kut veilam aṭangin Bahhnuk a chawr chhuak nghal bawk a. Kal pah chuan an ramrem changel kih leh dawn ta a ni.

           Lal Ngurauva khua Daipuiah hian an pem upa Sangdunan a Sepa thawhin tlang an lo hrai mek a. Pawl kut an lo hmang der tawh alo ni, thla de an en lo emaw tih tur a ni thei hial a, mahse Lalngurauva khua a pasalṭhate hi Puklui khua a rawlrala chet an tum avangin Pawl kut an lo hmang hma ngei a lo ni. An tum ang boruak ni ta hek lo le, an chiau chel chul a. Lal Ngurauva chu an hawi kual a, hmun tin aṭang chuan an hual ta tih a hre nghal a, rawn hual tute chu a lo thlir ta ngawt mai a ni. An tan tihngaihna avang em a ni, hmanrua chuh hmasa apiang an thal zel mai si a.  An tana hlauhawm thei nia an hriat a piang chu Puklui lam chuan an sai ta hmiah hmiah mai le. 

          Khalhkhawm ngai lo va mipui lal tuala awm sa chu Pasalṭha Chala te tan chuan a ṭha hlei hlei mai si, tlangval ho chu Silai a sawh tir nghal zel bawk a inring renga awm tir chu a duh a ni. Chimih hneh an tum tehreng nen chuan an lo awm dan chu han khawih zui zel hrehawm an tih zawng tak a ni lawi si. Pasalṭha Thangnghilhlova pawh chuan an lal a tel ve chu pawi a tih hmel kher mai. Daipui lal Ngurauva melh chung chuan a bahhnuk an hum ngat ngat chu Pasalṭha Chala chuan a lo hmuh hmaih hauh lo. Lal Saitluanga te unau chu an rawn hnai ta. Daipui mipui chu a che che sih hlawkah tih ang mai an ni a, an ṭhu ta ṭhuap mai a ni.

  

          Lal Saitluanga chu Silai ngul sei tak rawn kengin lal tualah chuan a ding a,  a ring leng lawng takin, 

    " Daipui Lal ka be duh e, ka hmaah a lo ding vat lo a nih chuan a khua hi meivapah ka chantir dawn a ni!" a ti chang fak mai le.

       Chutah Lal mual aṭang chuan Ngurauva chu rawn penchhuakin,

    " Kutpui kan hman laia lusei pui ngei hmelma rawn lang ta thut chu ava mak ngai ve le! Kan inring lo lai min rawn hup tute hi mi huaisen an nih ka va ring  lo em!?" a rawn tichhuak a. Lal inah chuan tumah an awm lo a nih hmel! 

       Daipui lal  rawn pen phei mek chu Puklui lal chuan a pan phei a, a kut dinglam chuan an beng ta ngheng mai le! Ngurauva pawh a ṭhu hnawk thei hial a, mipui lah chu an lo ṭe vei ṭhat a. Chuveleh vanvawr zawng chuan pasalṭha Chala chuan silai a kap puak ta! Ṭe zui ngam reng an awm ta lo. Chutah Lal Saitluanga chuan,

      " Ka fanu min thah saktu khua hi ka ngaihdam theih in ring em ni? Hremna ka pek hma che u in ka thu hi lo ngaithla teh u, in lal hian khawdang thurualpuiin ka khua rawn chimih a tum a. In lal fapa ngeiin a rawn ho ngat a nih kha. Kan dikna reng reng hnual suata an thil tihdik chauh thailan tum mi bawlhhlawhte hi.....

       ( chhunzawm tur)

Ka mit ala chiang thei tlat lo a ni. A tawi ta hle mai.