KAWKVAHAI BUNG 4 NA

 KAWKVAHAI

        .......  (M. LUSEI PALIAN).....

                   BUNG-4  NA

         ...........        .............      ..............

         Chutah Herhzawl lal chuan ngaihtuah nei tih hriat tak hian a meng kual a, rawn ṭawngchhuak lehin, 

   " Kan chhak unaute hi kum dang aia an rawn chet hma tlat chu le, min rawn nawrna hle dawn a ni mahna! Han che chhuak phawt ila, a ṭul dan a zirin kan che chhuak leh mai tur lah ni...Eh...pasalṭha Thangkunga te sarep ava hek dawn ve le!" boruak tih zan tum fe chuan a ti ta a. 

     Pasalṭha Thangkunga chu a lo khi vei suk a. Herhzawl lal thusawina engah chuan tlangval ho pawh an che ta suau a, Sanghal tuang chhah leh sakhi sarepte tukṭhuan hmeh atan an buatsaih nghal a. An rik hian an ri hut hut mai a, thawm lah an dim teh chiam lo. An lal remruat dan chu ṭha an ti tlang hle a ni. Thangliana tlangval inkhai thli tak, dar pharh ṭha fe pawh chu a phe kual ve zak zak a, Kawltea nen inkawpin an tihtheih awm an zawng nasa ve hle a ni. Riahbuk ah chuan lal leh upa Denga te chu an ṭhu a, Upa Denga chuan,

    " Lalpa, Ṭuahzau lam kha an sawi ri zing hle mai ka ti, Lalliana khi eng nge kan ngaih dan ni reng reng. Kei ka ngaih a ti ṭha lo riau a sin!" an ti chhuak leh khut a. 

   Chutah Herhzawl lal chuan upa Denga han melh pah chuan,

   " Kan ven ngai tak thil a ni, Ṭuahzau lalnu khi Lungthukawn lal farnu a ni a, Lalliana lah khian buaina a neih reng rengin a pu te bul a thlen dup mai ṭhin a. Thinglian khua pawh khian an ning hle niin ka hria. Tunah pawh hian Ṭuahzau lal hi Pawih pasalṭha te  nen rem an ruat fe ang ka ring. Helai hmun aṭanga kan chhuah hnuah Ṭuahzau chungchang hi chu rel ṭhat a ngai ang!" a ti chhuak ve leh ta a.  

    Upa Denga chuan, " A ni dawn tak maw kha...! Helai a kan ram rawn dai lut ve tute hi han chimih phawt ila, Ṭuahzau khua chu la nuai leh ila ti nia, mahni lusei puite pawh phatsan duh mihringin tlang a ṭhut reng tur a ni lo!" tiin a thu chu an bilh ve leh a. 

        Chhun lam ropuina a rawn inlar ṭan ta tak tak a, a hna tlin a tum hle a ni. Chu Saui lui chhak deuh riahbuk kiangah chuan sava chi hrang hrang hi a hram chuah chuah a, an hma hun tur dawn thiam bik hek lo le.. Lunglen hmel fe hian khuanu siam chhunlam parmawina chhimtute chu an hram kal raih raih hlawm a. Seifate khawvelah meuh zawng inrum nekna te, ropui zawk nih duh avanga inrun mai te hi thil thleng reng a ni ngat si! Indona meipui  tuah alh turin Seifate leh Pawih pasalṭhate chuan thing an fawm khawm sauh sauh ta a ni.

        Pawih pasalṭha Halvung leh Chinhrang chuan thui fe tlangval ho an kalpui hnu chuan hmun rem leh biru lai deuh chu thlangin an innghat ve leh ta a. Ngunṭhiaua hote an rawn thleng ve ṭep chuan an ring a. Chulai hmun chu Awhtlang ram chin a ni tawh bawk a, thawm an dim bik tawh lo. Ngunṭhiaua hote lo thleng ve law law se, Saui lui kaina dang zawngin an che chhuak dawn a ni. Pawih pasalṭha te hian Lusei tlangvalte laka phuba lak chu an tum ber a ni a, an ro leh thil dang chu a ve chauh a ni. Tin, sal a tam thei ang ber hawn a, an chhungte hnathawk lova siam an tum hle bawk a ni. Khaw thum ṭangrual meuh zawng an tam tham hle ang. Chinhrang leh Halvung chu an inrawn tawn reng a, mak an tih deuh chu Lusei ho kha engtia khalai hmuna rawn pung khawm hman nge an nih tih kha a ni. An ramchin thlithlai tur an dah reng ni in an hre hial a, fimkhur hle a ngai ngei ang le. 

      Muanga an ṭhut lai chuan pawih pasalṭha pakhat chuan an hruaitute han melh pah chuan,

   " Engah kha lai hmunah khan kan innuai mai loh ni, dawih zawk anga kan liam leh duai duai ni!?" rum fe chuan an ti ve a. 

   Chutah rang fe hian Chinhrang chuan,

 " Inpawmchilh theihna hmun avang lutuk, kan silai zen kan hmang zo thei hial ang, a hun kan tihah kan che chhuak ang!" chu pa chu rum fe a melh chung chuan an ti a.

      Halvung pawh rawn ṭawngchhuak nghal zatin,

    " Helai hmunah hian kan inkhuar rih ang, Ngunthiau hote kan lo nghak a nga, Lusei ho let hunah kan che chhuak ang. Herhzawl khua kher chu kan tum a ni lo, Thinglian leh Bawkmual khua kan tum ber tur a ni. Tin, kan kawng min daltu an awm chuan kan dah ṭha nghal zel ang. Vawiin   lam hian  Saui lui kanna tur  khan dang kan zawng ang! Kan hnung tawlh hret avang hian kan tlanchhia tihna a ni hauh lo, Tukin kha chuan ṭanhmun a rem lo kher em a ni. Ti hian kan kir vek emaw an ti dawn a, duh thalin kan che tawh mai dawn a ni!" inti ralrel thiam zet chuan a ti ta a.

      Chu thu a sawi zawh chuan tlangval ho pawh chu han ṭawng zui zel an awm tawh lova, an pasalṭha te chu ralrel thiam an ti hle mai! Lusei ho kha an bum ang a, muanga an haw hnuah an che chhuak mai dawn a ni. 

              Hetih lai mek hian Pasalṭha Thangkunga te riahbuk lamah chuan tlangval ho chuan tukṭhuan an peih ta a. Changel hnah an phah phei duai a, mau bur lian fe fe hmanga an chaw han chhum te chu an bun khu vung vung a. Sanghal leh sakhi sa chu an rawn bun khu  hmui vung vung mai a, zan lamah an lo inpal thui nen a rim ngawt pawh chu ṭam tizualtu a ni tawh a. Tlangval mawngzang deuhte chuan an satui tle nuar  paw chak mai chu mautheiah an thli chhuak zung zung a,an sem phei zat zat a. Lal leh upa te chu hlui hran siam an tum zet a an lo duh si lo.  Chutah Herhzawl lal chuan upa Denga han melh pah chuan, 

   " Eh...han bar ta che maw... hei tlangval hovin an nghak reng che a nia..!" ai u a nih avanga zah fe chuan an ti a. Upa Dengan Lal rilru a hre zet chu a hlim in mak a ti hle mai, lal anga a awm duh bik miah lo te chu roreltu ṭha ava ni tehlul em! 

    Upa Denga chuan, " A nih....laipawng thle lawl khawpin i ei ang u hmiang!" nui sung chung chuan a ti a. Kut han timu ke ṭhe ṭhaw chuan chaw chu an bar ta a, Herhzawl lal chuan an zawm zat a, chumi hnu chuan tlangval ho chuan an bar ṭan ta a. Sanghal tuangchhah an han keih mawm hmak a, buh hmui hiam mai chu an ka chhungah hnawh lutin Satui hang tui tawk, a tawk chiaha khu vang vang chuan an han tleng thlak tir zet zawng dam man hi a awm hliah hliah a ni. Tumah han ṭawng pawh an awm lo, a kaw lai hnawh an ni bawk nen, an ngawi ṭhap a an puar tlang hlawm hle ang chu..! 

       Tukṭhuan an bar zawh hnu chuan pasalṭha ho chu an vak darh rih hlawm a, engtia rei nge an thang dawn tih hriat a ni ta lo. Pawih ral rawn luh theihna tur khan en thli thlai pah chuan Thingvawkpui kai lam pawh an melh kual nghal dawn a ni. Pasalṭha Thangkunga chuan a naute zinga a rin em em Thangliana upa Seia fapa leh Kawltea te chu hruaiin hrui a chhahpui thung a. Pasalṭha Thangkunga hian Saui lui kai nan a duh a ni. Rei lote ram pilrila an vah hnu chuan an duhthusam an hmu ta a,ram  hrui rinawm tak chu han chhat in an darah chuan an bat nual ta hlawm a. Saui lui hnaih lam chu an pan ta! 

        Zan hun chu an nghah a ni a, a tuk khawvar ruala pawih pasalṭha te chimih a, an khaw lama let an tum hle a ni. Seifa pasalṭha te tan zawng an ram rawn dai luttu te hi thlir liam mai chi an ni lova. A bikin Herhzawl hi Lusei tan daingul an nih avangin an fimkhur hle ṭhin a, khaw dang hriat  hauh loh hian an buai fo ṭhin reng a ni. Pasalṭha leh tlangval tam fe chhuak an ni a, zanriah hmeh tur an ngah hle tawh a ni, thal thlah erawh an fimkhur hle thung a ni.

        Thingvawkpui kai an thlen chuan pasalṭha Thangkunga chu a hawi vang vang a. Kawltea chu han melhin,

   " Thawm chhuah mang lovin hrui hi i va thlung thei a ngem? " an ti chhuak a. 

    Kawltea chu a lo bu nghat a, chutah Kawltea chu Saui luiah chuan a liluh zui  ta daih a. Thangliana leh Thangkunga chu an khi suk a, a lan leh meuh chuan ral lehlamah a ding vang tawh a, a darbah hrui chu rinawm tawkin an thlung ta a le, rawn lehhawi chuan a nui ta var var a. Hmun thum laia an thlun fel hnu chuan thing phenah chuan an ṭhu ta a. Pasalṭha Thangkunga chuan a naute chu an melh a,

 " Ka thu sawi tur hi uluk deuhin lo ngaithla teh u, he tuna kan buaina hian a nghawng thui hle dawn a. Hei vang tak hian hmanrua kan mamawh tam hle dawn a ni, kan pawih unaute hian phuba lak tumin an rawn lian ṭan a ni a, tuna mi hi chu a aite chhinna lek a ni ang. Zan lamah pawh in mi thahte hmanrua kha khawm nghal zel ang che u, an kawlhnam te khi an chher fuh a, a hriam a rei bik a nia. Zam hauh lo ula, mi lu khaia Kawkvahai phun ngei thei turin intheihna kha hmang ang che u. Tin, hei hi lusei kan nihna anga kan tihtur kan ram chhan nan a kan tihmakmawh a ni tih hi hre thar ang che u! Pasalṭha chuan a khua chimih a meivapa achan chu a phal hauh tur a ni lo, theihtawp in a dang tur a ni a, a theihna khaw mipuite tan a hmang tur a ni. A hma hruai tura Lal pawhin a rin ṭhah kan ni tih kha hriat reng tur, hei hi nangmahni a hriat chian vang che u a ni e!" an ti dap dap a.

     Kawltea leh Thangliana chu an lo bu nghat a, ral nena inpawmchilh chu an chak ta et et mai reng a. Pasalṭha Thangkunga hian a naute hi chher a tum hle a ni, mikawl thinlung diktak zawngin chher hriam tam tak a nei ṭhin! Herhzawl muanna hi pasalṭha te chungah a innghat a, pasalṭha ten theihtawp a khaw muan nan a an thawh chuan Lal a hming ṭha a, khua a nuam ṭhin! Khua a tlai hma in an riahbuk chu an pan tlang ta a. Thawm dim taka an kal lai chuan hma hruaitu Thangliana chu a ding dat a, uluk fe in hmalam chu a thlir ta a, chuveleh Pasalṭha Thangkunga chuan a lo nuih sak a. Thangliana chu thawm dim fe a pen chung chuan hmalam a pan a, a fei chu lekchhuakin a inring kher mai! Chutah an hma kawrte a Sakhi chu a hmuh rualin a fei chu a thlawkchhuak zui zat a, a khawh na fe a ni chu Sakhi chu a nghawnga thil pheiin Hriang kung bul lian laiah chuan a kilh phei zui a. Sakhi chu a tal cher cher mai le. Rang fea panhnai in a chempui chuan a sat hlum zui nghal a. 

       Pasalṭha Thangkunga chu rawn nuih var var pah chuan , " Thanga, khatianga rang khan che zel ang che...!" an ti sap a. 

       Kawltea pawh a thleng rang hle mai, Sakhi chu la in a paw bahlat a, " A zuitu chan!" nui sang chuan a ti a. Riahbuk lam an pan ta.

       Riahbuk an thlen chuan zanriah an lo peih der tawh a. Zan lamah thla a en avangin an hman hmawh lo kher mai, an Sakhi hawn chu tlangval ho chuan an lo chan nghal zung zung a, an chet ve dawn lahin an khap tlat mai si, nuam lo an ti hle a ni. Tlangval tan zawng tlawmngaih chhuahna tur a tam em a ni. Unau hmel hai hunah chuan zanriah an bar ta a. Zuksih mual mawnga Herhzawl tlangval rual te zawng hmalamah eng thil nge an tawn dawn tih hre lo mahse an hlim hle a ni.  Zan lama an chet dan tur upa Denga chuan chiang fe in a sawi zui a, an ngaithla uluk hlawm hle mai, tuman ngenmu a thlawna sur tir an tum hauh lo.

        Khawvel rohlu zan lam malsawmna avur ṭhin Chhawrthlapuiin a hmun ngai a rawn luah ta! Englai maha phatsan ngai lo a khawnbawl siar te pawh chuan an hmun an rawn luah ta sap sap a. Siruk in vanlaizawl a thlen chuan, Zuksih mual mawnga Herhzawl mihrang te an che chhuak ta! Thla eng ringin Thingvawkpui kai an pan a, pasalṭha Thangkunga leh Thangliana te ho chuan Saui lui an thleng ta! In zo fe fe chuan ral lehlam an kai ṭan ta! Hmanhmawh fe in hmahruaitu nih in hre ranin an liam zung zung mai le!  Chhun lama pawih ho thlithlaitu Zuibawngan hma a hruai a, thawm nei mang hauh lo chuan an liam ta zung zung a. Upa Denga leh a nauten Saui lui an rawn hleuh chhuak ve leh tawh a, an ni pawh huaisenna leh chhelna thinlung nen hmalam an pan ve leh ta! A tawp bera Herhzawl lal Thanglura leh  tlangval tam fe pawh an rawn sapui sarep rim hre  vah ve ta! 

        Pasalṭha Thangkungan pawih ral ho inkhuarna a hmuh meuh chuan a ding chat a, a dinglamah Thangliana a awm a, a veilamah Kawltea a awm bawk a, an ralveng te an pal per hman ṭep niin a hria a, midang an ngaichang ta rih a. Bullut  Berawchal rah tlan ṭhawn darh hnu a rawn bei leh ang hun vel an nghah hnu chuan Chingpirinu chu a hram ta raih a. Chu veleh hmun tin....

  ( chhunzawm tur)