KAWKVAHAI BUNG 3 NA

 KAWKVAHAI

        .......  (M. LUSEI PALIAN).....

                   BUNG-3  NA

         ...........        .............      ..............

       An tam phian lehnghal a,  Herhzawl lal chuan zam hauh lo hian a Silai lekin  Saui lui, pawih hovin pum hrut an rawn thlunna chu a pan ta nghal zat a. Pawih pasalṭha chu rawn au tuarin a naute chuan an Silai chu an hum far mai a. Herhzawl lal erawh zam hauh lo chuan hmalam a pan zel a, chutah pawih pasalṭha Saui lui ral a mi han thlir pah chuan, 

  " Eng vanga kan phalna la lova kan ram chhung rawn dai nge in nih? Ralthuam te inlek ve e lo?" tham lo hmel zet chuan an ti kher a. 

     Pawih pasalṭha Halvung chuan rum fe in Herhzawl lal chu a rawn melh ve a, ring leng lawng chuan,

    " Saui lui ral hi inram a nih kan hre lo ve, inlaka buaina thlen tura rawn kal kan ni lova, Ṭuahzau khua pan tum mai kan ni e!" chang fe leh thinrimna mitmeng keng tel chuan a ti a. Herhzawl lal a bia tih hre hek lo, a rawn chungtlak mah mahin a hria a ni. 

       Herhzawl lal chuan Upa Denga chu an mitmei zauh a, chutah rawn ṭawngchhuak vat in, 

   " Kha....mawnghangpa i dinna lai pawh kha kan ram a ni e, Ṭuahzau lusei lal be turin khati zat a tam tlangval an ngai em ni? Nge mahni inringtawk lo lal in an tir che u em ni!?" an ti kher chu le.. pawih mihrang ho an ri hak mai! Chengrang au tir lova inhleh ral raih an duh ni hian a lang tawh zawk a. An silai an chul a, a ṭhenin an fei an hum nghet sawt a.An hotu ber Halvung chuan,

    " Nangni nena buaina nei tura rawn kal kan ni lo na a, buaina neih hi pawi kan ti hauh lo!"thinrim hachang han ṭhial rap chung chuan a ti a. A sawi zo chiah chu a bulah chuan tlangval pahnih an rawn ding nghal a.Pawih tlangval ralhrat hmel tak chu an hotupa bulah rawn dingin eng emaw a rawn sawi sap a. 

     

       Pasalṭha Thangkunga te chuan tlangval ho an lo rem ṭha nghauh nghauh tawh a. Lal thupek chiah an nghak ta, Upa Denga hian mitmei in Thangkunga hi inring turin a ti ngei kha a ni. Thangliana te ṭhian ho a hmatawngah awmin an silai an chul hoh hoh  tawh mai a. 

      Pawih pasalṭha te an hrilhhai ngei mai! A ruk thei ang bera Ṭuahzau pan tum an ni a, an fimkhur tehreng nen, tunah heti hian lusei pasalṭha ten an rawn hual mai si! Lusei ramchhung an dai tih an pha hauh lo, indona chawh chhuah tuma kal mah ni se chuti tehthut  chuan zawng an la tiam bik lo a ni.Herhzawl lal thar hi pasalṭha zet lusei fate ngaihsan em em thangchhuahpa a ni tih an hria a, a hmel hmu erawh an la tlem hle a. Tlangval pakhatin an hruaitu chu an bekbawr zeuh khan ral lehlama pasalṭha ngeng tak chu Herhzawl lal a ni tih a hrilh kha a ni. Halvung pawh a rilru a buai ta takzet mai, a ṭawng thui tawh viau mai si a.

              Herhzawl lam tan pawh chet lak ala buaithlak ve viau tho mai, an karah chuan saui lui a awm tlat a ni. Chutah Herhzawl lalpa chuan Pawih tlangval rawn hruaitu chu han melh ngar ngar in,

   " Kan chunga buaina thlen tumtu te chu kan hmelma an ni! In ngam a nih chuan kan lam hawi hian i Silai kha han lek teh u le!" a ti chhuak leh ta! 

      Chu zing ni chhuak sara Saui lui boruak chu a rit ta takzet a, Seifate leh phuba lak tum pawih pasalṭha te chu an inmelhna hlawm hle a. Herhzawl lal chuan hun chelh muan a tum ru ve tlat! Saui lui ral ve ve aṭanga an inral kah chuan an chimih thei dawn tlat lo, han chet dan tur a thinlung chuan a ruahman nasa hle mai. Upa Denga lah chu a inring hle tawh tih a hriat a. 

     

         Pawih pasalṭha Halvung chu rawn ṭawngchhuak in, 

   " Lalpa, Herhzawl lalpa i ni tih kan lo hre lo a ni, min hrethiam hram teh! I lung kan tihawi dawn loh ai chuan kan let ṭhen ang a, ka naute tlem in Ṭuahzau chu han lut se!" nem deuh tak chuan a ti chhuak ta! 

       Pawih pasalṭha pawh hian ruahman ruk a nei ngat mai! Lusei lam hian an hnung a ho khat rawn kal tur hi an hriat a ring lova, chung ho nen chuan la ṭum khalh theih a inring a, tuna an inbiak dan  a zirin nihnih thum hnu vela Saui lui khan dang aṭanga luh chu ṭha zawk in a hre tlat a ni. Pawih pasalṭha ngaihtuahna chu a fingin a fuh hmel hle a, lusei lam tan lah an mahni hlaua let angah riak an ngai dawn si! 

       Herhzawl lal Thanglura chuan upa Denga han melh zukin pawih pasalṭha chu an en leh a, chutah ring fe in,

     " Ka rawn phei dawn a, kha lai i dinna hmunah khan kan inbia ang!" a ti ngeng ta ngalh mai a. Pawih pasalṭha pawh a ka ve ho mai! A bu ta nghut a,  Upa Denga chuan Lal chu an melh a, 

    " Lalpa, kan nuai nghal mai dawn lo'm ni?" an ti sup a. Lal Thanglura chuan,

    " Nghak hret ang, kan chimih kim dawn lo tlat!" an ti a. Chutah tlangval lam han melhin Thangliana chu an melh a, han ṭawngzawm in,

   " Upa Denga nen kan va phei ang e, tlangval min rawn zui ta che!" a ti chhuak ta. 

   Herhzawl lal Thanglura leh Upa Denga, Thangliana leh Zabiaka te ho chuan pumhrut chu an pan ta a.Tui an thiam hlawm hle tih chu a hriat theih nghal a. Thanglianan lalin a ring hle tih a hriat chuan a lawm ve hle a, lal leh upa te venhim chu a tum hle mai! A thisena pasalṭha thlah a nihna chu rawn insang mar ṭanin huaisenna thinlung chuan a rawn tuam ta mep mep mai le! 

         Pawih pasalṭha Halvung chuan a naute chu han enkual in, 

    " Tuman in ralthuam kha lo lek hauh suh u, hun ṭha thlir a ngai!" a ti ve ta sap a. Chu veleh lusei tlangval te hmuh theih tur chuan an ralthuam chu an dah thla ta a.  Pasalṭha Thangkunga chuan tlangval ho bulah chuan,

  " In silai kha la hlat hauh suh u," a ti ve thung a. Saui lui kam lehlam lehlamah chuan ram tana nun hlan ngamte an inep ta ṭhuau mai.  

      Herhzawl lal te ho ral leh lam an thlen chuan an ding fal ta nalh a, eng thil pawh lo thleng se an pasalṭha te  ngenmu rawn sur na dal lo turah an awm a ngai si. Pasalṭha Thangkunga chuan an lal chu fing a ti hle mai! Thil kal dan a lo thlir a, an lal hian tum a nei tih a hre  chiang hle a nghah hram a ngai tih a hria! Inring tak chuan an lo awm ran mai  tawh mai.

          Pawih tlangval hruaitu Halvung chuan Herhzawl lal chu a rawn pan a,

    " Lalpa, kan ram chhuak ka rawn tlang ta a ni a, Ṭuahzau khua a kan lalpa farnu tlawh tum mai kan ni e!" a ti chhuak ta a.

        Herhzawl lal chu an hawikual a, tlangval an melh kual fe hnu chuan,

    " In lal farnu han tlawh tur chuan in ṭhahnem deuh a nih hi maw le!" nelawmna tel hauh lo chuan an ti a. 

   Upa Denga rawn ṭawngchhuak vatin, " Ni e, in lal chu in zah hle a nih loh pawhin in hlau hle a nih dawn hi a... heti zat tlangval han kal mai chu...!" a ti ve leh kher a. 

     Halvung chuan tlawm zawka an ṭan rih angai tih hria in, 

     " Lalpa, ka sawi ang khan kan ramchhuak kan rawn tlang a ni e, tlangval panga vel hi inphal chuan tlang se, a tam zawk hi chu kan let mai a nge!" rilru nei ran chuan a ti a.

      Herhzawl lal chu a kiai suk a,  chutah ngen hmel fea  rawn ṭawngchhuak lehin,

    " Pasalṭha.....i naute chu tlang rih lo se ava ṭha awm ve, kan ram chhung in dai thui tawh viau si a.!" an ti leh kher a. 

       Chutah ngaih dan fuh fe nei chuan Pawih pasalṭha hruaitu chuan, 

    " Ni rawh se, mahse kan lalpa bulah eng tin nge kan sawi tak ang le, tlai lam emaw naktuk lam ah emaw pali nga tal kal tir thei la ka va duh em!" ṭanhmun nei ṭha inti fe chuan a ti ve leh a. 

         Ngaihtuahna thui tak hmang ve ve chu an inmelh ran a, chutah pawih pasalṭha mitmeng lo thlir rengtu Thangliana chuan lal bul a hnaih sawt a, a silai chu hawlhrawka kah theih mai tur chuan a inher rem sawt a. An chet dan lo thlir ve reng pawih tlangval ho pawh chuan an Kawlhnam hnung puak chu ban mai theih turin an kut an dah rem ve ta! 

       Chutah le Herhzawl lal chuan pawih pasalṭha chu tham lo zeta han melh pah chuan, 

   " Ni tlang san hma in in lokalna lamah let leh vek ang che u, a nih loh chuan buaina hi incho chhuah ah ka ngai ang!"  ti pah chuan a inher a, a hnung zuitu te nen chuan an let ta nghal a. Thangliana chuan hnu a rawn dawl nghal zat a. 

      Herhzawl lal pawh chuan thil thleng tur chu a dawn ve roh roh a. Kar lovah chuan Pasalṭha Thangkunga te bul chu an thleng phei leh ta, Upa Denga leh lal chu hnung lam pawh hawi tawh lo chuan ngeng ngalh hian pasalṭha Thangkunga te riahbuk lam chu an pan ta nghal a. Pasalṭha Thangkunga chuan pawih ral lam chu a melh vang vang a, an ni pawh chu an insaseng zui nghal zat a. Boruak chu a rit ru fe mai, mahse chet han lak tum pawh an awm rih lem lo, pasalṭha Thangkunga naute hian thal thlah an chak hle na a, an lal te thu lo chuan an ngam chiah bik lo a ni.

     

     Saui lui kamah chuan lusei pasalṭha pawh rei an lang bik lova, an tawlh kianga chin thlithlaitu tur erawh mi eng emaw zah a lang lo lamah an dah thung. Pasalṭha Thangkunga te riahbuk an thlen chuan upa Denga chuan lal chu han melh in, 

   " Saia pa, eng tizia nge ni! Kan silai zen a ṭang viau tawh lah ni!" an ti chhuak a. 

    Herhzawl lal erawh nui var varin, 

" Eh....kan chimih kim thei dawna ka hriat loh vang a nih kha....( ring deuh tak chuan ) pasalṭha te lo hnai teh u....( a ti zui a)....Tunah chuan kan karah Saui lui a tla a, inpawmchilh nan a hla mah mah a ni, vawiin nilengin an ni lam pawhin min ngaichangin ka ring a, Thingvawkpui kaiah khan zanah tawlh liam kan tum ang a, hmun thuma insem darhin hup let kan tum ang! An kal hla dawn hauh lo tih ka hria a ni. An ṭhiante pawh an rawn thleng hman ang a, chutah zan lamah kan che thung ang, helai ramchin zawng keini aia chiang an awm dawn em ni!? Pasalṭha Thangkunga te ho in hma an hruai ang a, upa Denga ten an zui ang. Kei leh tlangval rual khat in hnu kan rawn dal ang a, thangvalh angin kan che dawn nia!" Pasalṭha thisen leh ruahmanna fel tak chuan a ti ta.

    A la sawi zo hauh lo, upa Denga chuan,

  " Lalpa i remruatna ka hmuh thiam loh vang a ni, ka thinrim khan a hmun hma ka lo en reng reng hlei nem!" a ti chhuak vei khuk a. 

  Chutah Herhzawl lal chuan ngaihtuah nei tih hriat tak hian...

  ( chhunzawm tur)