KAWKVAHAI BUNG 2 NA

 KAWKVAHAI

          ....  (M. LUSEI PALIAN).....

                   BUNG-2  NA

         ...........        .............      ..............

       Zanlai ar khuan hun a pel hle tawh ang tihah chuan Pawih pasalṭha rual khat chuan Saui lui an rawn kan ta tlat mai le! Uluk fe chuan Thangliana chuan a lo thlir a, an vai chuan sal sarih an ni a,Pasalṭha  Thangkunga te chuan an la hmu ve  rih lo niin a hria. Eng chu ti dawn ni maw? tiin a suangtuahna kawm pah chuan a silai cheng chu na lo te hian a kheuh rauh rauh a. Tuna Pawih ral ho riahna hi Saui lui ral lehlam mah ni se, Lusei ram chin a ni pha tlat a, Herhzawl lal leh Sihzawl lalten an lo sual chhuah tawh ram a ni.Pawih pasalṭha te hian zing lama mei an khuk bak kha an la tikhu leh hauh lo va,tukṭhuan an bawl khan zanriah tur an kep a ni mahna,  an fimkhur ve hle chu a ni. Chutia pawih pasalṭha ho a thlir reng lai chuan a sir lamah thawm a hre ta, rang fe chuan thla eng hnuaiah chuan an thlir zawk a, pasalṭha Thangkunga chu fimkhur fe chuan a rawn tawlh hnai hriau hriau a, pawih pasalṭha ho chu an thlir dun ta a.

      Pawih pasalṭha lam chuan tui an thiam kher mai! Pum hrut an rawn thlung a, an fimkhurin thawm an dim thiam hle mai! Chu zan lam ropuina chhawrthla eng chu an hmang ṭangkai ve hle chu a ni. Pum hrut an thlun zawh hnu chuan an let mai dawn emaw an ti hman a, mahse kir rel ta lo chuan an inbe khawm ta sar sar hlawm a. Chang dang kanin rilru hran an nei tih hriat hliah hliah chuan an inhnial ṭan ta! A awm reng a ni, zan lam hun ṭha a ni ve miau mai si, rua pawh hi achangah lian fe hian a chawr angin tum thuhmunte ngaih dan pawh a inang chuang lo! Pawih pasalṭha te chuan zan lama Ṭuahzau lam pan chu an duh hle a ni, Lusei ram chinah an awm tawh ngei si a. Lusei lalte hian an phalna lova an ram chin dai ngawt hi an duhlo hle tih an hre ran a, lo hmu an awm chuan buaina a chhuak ngei dawn tih an hria a ni. Lo bih rengtu an awm tih lah an hre hauh si lo! 

       Hetih mek lai hian Pasalṭha Thangkunga chuan chetlak dan tur a lo ngaihtuah nasa hle a, A silai chu a lo hum ve reng a an lam hawia ke an rawn chheh ngat zawngin an nuam sa lo ngawt ang. Zamana pawh a rawn tawlh hnai ṭan ve ta, tuiluang riin a thup a an rin avang chuan an inbe chhawm ta a. Pasalṭha Thangkunga chuan, 

    " An inhnial a ni ngat mai ka ti, kan lam hawia ke an rawn chheh chuan Chengrang kan lek mai tur lah ni! Inring reng khan awm u la, E....Zaman, riahbuk a tlangval ho kha han ko thla rawh, thawm rawn dim ang che u," a ti khuk a. 

     Zamana rawn tawlh thleng chiah pawh chuan hnial mi a ni lo tih hria in rang fe in a tawlh let nghal zat a. An riahbuk sakna lam chu hmanhmawh fe chuan a pan zui ve leh  zat a, pawih ral a huatna a zual ngei mai! 

     Thangliana chuan, " U kung, zan hun ṭha hi an chuh zel zawngin kan tan a buaithlak dawn tlat mai a, Kawltea kha a tluang em ang a! Kan lal hi a rawn thawhchhuah   zawngin an nuam sa lo hlawm ngawt ang chu...!" an ti chhuak a. 

       Thangkunga chuan, " Khung ho khu han inhnial zo se, kan lam an rawn pan a nih ngat chuan ṭhelh an thiang lo a nia aw ...Thanga" ngeng ngalh chuan an ti leh a.An ngawi dun ta. 

       Pawih ho riahbuk aṭanga chuan pasalṭha tih hriat theih hi a rawn chhuak a, han hawikual zak zak in a rawn au ni hian a hriat  a, thutam phei chu a sawi lo aniang , chutah pumhrut rawn thlung zo inhnial mek te chu an ngawi ta ṭhap a. Chung mi pasarihte chuan eng mah sawi zui tawh lovin an riahbuk lam chu an pan phei ve leh ta! A rawn au tu chu a hlau hle a nih loh pawhin an zah viau a ni ta ve ang. An riahbuk chhung an va  thleng ta, thusawi an nei tih chu an che vel aṭang chuan a hriat theihna a, tui luang ri a bengchhen avang leh an inhlat em avangin Pasalṭha Thangkunga te chuan eng mah an hre thei hauh lo! 

      Pawih ral ho an let leh meuh chuan an thaw dun hak thei hial a. An ṭhu ngawi dun leh ta veng veng a, chutah Thangliana chu a tho tharh a, Pasalṭha Thangkunga melh zawk   pah chuan,

    " U kung, an pum hrut khu ka zuk sat chat dawn a nia!" a ti zui zat a. 

  Pasalṭha Thangkunga chuan, " Thanga...ni lo ve, kan awmve tih hi hre lo se ala ṭha rih  zawk! Kawltea hian khua a thleng tawh ngei a nga, kan Lal hovin an rawn thleng ṭep tawh ang! Nghak rih lawk ang hmiang ,"  tiin  a khap ta zawk a. Chu chu thil nihphung tur a ni reng si a.

             ..........      .........    .........

     Upa Denga chuan hma a hruai a Zuk sih mual lam chu an pan ta nguah nguah mai, khaw tana thih ngam lupu thingserh sat val rualte chu....zan thla eng hnuaiah chuan an pheikhai a zang fe chuan hmelma lam awmna chu an pan ta. An ram chhung a ni bawk a an kal chak hle a, pasalṭha Thangkunga te fin vat chu an duh a ni. Ni, an pasalṭha te ramchhuak chu pawih ral tam fe nen chuan an lo innuai ang tih an hlau a, rilru  hmanhmawhna a khat an ni reng a. Pasalṭha Thangkunga te an ngaihtuahna chuan an ke pen a tichak a, ngaw hmun thing lo ngir khupna hnuaiah te chuan an tleh lut hem hem tawh mai! 

        Herhzawl lal Thanglura huaisen zia hi lusei luah ram chinah chuan hre lo fa an tam kher lovang! Thangchhuah pa pasalṭha huaisen zet Herhzawl awptu lo ni ta hi pasalṭha thlah kal zel a ni a. Mi ṭhenkhat chuan vengtu a nei ni hialin an sawi ṭhin! Lal meuh rammu a kal ta chu zuitu pawh a ngah kher mai, amah pawh chuan nuam lo a ti deuh hial a, chutih rualin khaw tana penchhuah chu a tih ngei tir niin a ngai si! Lusei awp chin ramah chuan a thang mawi ngawt ang le! Boruak han in thlak thlengah chuan khua a var hnai tih an hre ta, Zuksih mual an thlen hma chuan rei lo te an han ding khawmuang zawk a. Vaibel pawh zu ngam tawh lo chuan an fimkhur ṭan tawh hle a. Chutah Kawltea chu hma an hruai tir ta, an riahbuk lam an pan dawn ta! Kawltea hnungah chuan Herhzawl lal chu a rawn kal nghal vat a, fimkhur fe chuan hmalam an pan ta! 

       Kawltea chuan khan ṭha zet a hria a, meichher thup ngai nen buai lutuk lo chuan ngaw hnuaiah chuan an lut leh ta! An thawm han hriat chhun te chu zan lama hram chi ho chu a ni deuh mai a, luite an hnaih ṭan tih chu a boruak aṭang chuan an man ṭan ta! Kawltea chuan hma hruai zelin thing bulah chuan a ding dat a. Chutah an hawi kual ruai a, an riahbuk an hnaih hle tawh tih a hriat theih ta! Khawvar pawh a hnai ta hle mai a, varṭianah chuan Saui lui an thleng hman tawh ngei ang. Chutih lai tak chuan insum fe a khuh kharh thawm an hre ta, an pan ta nghal a. Kawltea chuan rang tak chuan, 

  " Zabiak....keimahni kan ni e!" a ti nghal thuai a. Chutah hmanhmawh fe in riahbuk lam chu an pan ta. 

      Herhzawl lal leh upa Denga chu an hawi kual nghal thuak thuak a, Zabiaka chu han be nghalin, 

 

     " Khawiah nge pasalṭha Thangkunga te ho an awm a! In inhlat em?" a ti zui zat a. 

     Zabiaka chuan an upa ralhrat tak leh Lal leh tlangval te chu a thlir vang vang a, a ni pawh chu a thlamuan hmel hle mai! Chutah rang fe a chhang nghalin, 

     " Zanlai arkhuan pelh hnu hret kha a ni a, U Thangkunga leh Thangliana ten hmelma lokai tur an thlithlai a, Saui lui an rawn kan a ni awm e.... Zamana rawn tlanin Silai fung awm zawng zawng nen an liam thla a, nang mahni lo nghak turin riahbuk ah hian min awm tir ta a ni! In thlen hma loh chuan ṭul tawp a nih loh chuan chengrang au tir an tum rih lo...!" Lal leh upa te ropui lum ngaichang tak leh zah thiam tak chuan a thu chu an tlip vei thlap a.

      Herhzawl lal pawh a khuh vei khak ta mai, upa Denga, vanglai pawha ralhrat, tlangval pathum hen ngat mai chu a rum nghat a.Chutah rawn ṭawngchhuak zatin,

    " Thangkunga zawng nau ṭha a ni ngat mai! Thangliana pawh hi a chher hriam hle dawn niin alang, Lalpa eng nge i ngaih dan ni le? Kan pawh nghal mai em ni niang?" Lal thu ngaichang tak chuan a ti a. Upa Denga zawng thu kal dan leh boruak hi a man chak hle si a. Tun dinhmunah pawh hian zen rim a hre tawh a ni ngat mai! 

        Herhzawl lal pawh chuan muanna chi a ni lo tih a hrechiang hle a, Tlangval ho lam an melh zawk a, chumi hnu chuan Zabiaka chu han melh leh chung chuan,

    " Tlangval, Thangkunga te awmna chu i hriat chuan hma han hruai la...I zuk pawh thuai ang u hmiang! Ka pasalṭha te leh tlangval te thlaphang in an awm tur a ni hauh lo!" a ti chhuak a. Chu aw ngat zawngin thisen tam tak luang tur a hril lawk a. Lusei lal te tana daingul an nihna chu a takin a lantir leh dawn a ni, a thahrui te chu mupui insiam thar leh ang mai hi a ni a. Ral nena inpawm chilh tur chuan a milu lak  chem chu a hum leh ta! 

         Mihrang thinlunga remhriatna chuan hmelma an hnaih laiin remruat dan tur a tlachham ngai lova, chawp chilh tak pawhin ṭan hmun ṭha leh din channa tur a dawn thleng pha ṭhin! Kawltea leh Zabiaka chuan hma an hruai ta, thawm an dim viau a chu chu an tih ngei tur a ni si a. Varṭian boruak a ni ta, Herhzawl mihrangte chuan huaisenna leh ram tana thihngam lu pu an nihna chu a pen pui a, chhip a sam zial ho nen chuan an inhnaih tawh kher mai! 

        Pasalṭha Thangkunga chuan a naute ho chu rem hre fe hian a lo sem kual diam tawh a. Riahbuk a awm ho rawn chhuk  nen an vaiin Silai fung li  an kawl a, muzuk fei nen an zam hauh lo.  An pasalṭha te lo nghah laia an hmelma te rawn chetchhuah chu a hlau hle mai! Dawih vang ni lovin, lo nghah hram an duh vang a ni. Kawltea leh Herhzawl mihrangte lo thlen hun a nghakhlel hle tawh mai a. Varṭian a ni ta, an hmelma lam pawh an riahbuk tualah chuan an phu suau tawh a. Chutih lai tak chuan an hnung lama thawm chu an hre ta! Zabiaka leh Kawltean hma an rawn hruai a, upa Denga leh Herhzawl lalte an rawn lang ta! Pasalṭha Thangkunga chu a thing bul belh ata rawn ding chhuakin Upa Denga te lam chu a pan ta a.

        Pasalṭha Thangkunga chuan lal han melh chung chuan huaisenna thinlung leh lawmna inpawlh chuan,

   " Lalpa, min rawn ho dawn a ni maw? Kan va phuisui dawn em? Pawih ral ho saw kan chimih ṭhak anga ti nia!" a rawn ti vei khuk a. 

     Herhzawl lal Thanglura chuan, " Ka pasalṭha, in ramchhuak lovang tih a va hlauhawm em! Kan ram chhungah maw tunah an awm mek? Ti teh u, thlir ngei ka duh e," hmalam pan chakna thinlung nen chuan a ti a. 

     

       Chutih lai tak chuan Upa Dengliana, fimkhurna pianpui tlat chuan tlangval ho an melh a, ring fiah tak hian, 

   " In ralthuam endik u la, inring rengin min zui ang che u, in thal thlah dawnin zamna nen tin ngai suh ang che u!" an ti zat a. 

       Lal Thanglura leh Pasalṭha Thangkunga te ho chuan Saui lui lam pan chuan ke an pen a, pawih ho riahbuk an hmu thei ta! Pasalṭha Thangkunga chuan kal pah chuan,

  " Lalpa, sawng ho chauh saw an ni lo, nizana an thusawi Zamanan alo ngaithla a, an hnungah sawn ho khat an awm bawk a ni awm e!" a ti chhuak a. 

       Chuveleh Herhzawl lal pasalṭha Thanglura chu a ding dat a, a hmelah zamna leh hnung tawlh tumna hmuh tur a awm eih lo! Tlangval ho lam han melh pah chuan, 

   " Kan hmelma te tam lam kan en tur a ni lo, eng ang mi pawh ni se an thi ve thei a, an chesual ve thei tih kan hre ṭhin tur a ni. Mahni sahim nan chauhva ral bei kan ni lova, lusei ram tana bei kan ni tih hi hriat reng tur...hmelma te hi kan letthum pawh ni se, chak lohna lai leh tihfuh loh nei ve tho an ni ṭhin. Dawihzepna hian zamna thinlung a siam a, chu zamna chuan chaklohna a thlen ṭhin! Dawihzepna thinlung pu leh tur chuan hmalama pen ve hauh loh tur...! Huaisenna thinlung, hmalam pan zel duhna kan neih phawt chuan hnehtu zawk kan ni reng tawh a ni.!" chang fiah faka an tih chuan tlangval ho chu an huaisen ta sawt ni hian a hriat a. Han sawi zui tum tumah an awm tawh lo.

     Upa Denga te ho nen chuan hmalam an pan ta! Pasalṭha Thangkungan hma ahruai a, hma hruaitu Thangkunga chu a ding dat a, a bula kal Herhzawl lal pawh chu a ding ve dat mai! Hmelma lam chu Silai kengin inring fe chuan Saui lui lehlamah chuan an lo ding ve far mai le! An tam phian lehnghal a,  Herhzawl lal chuan zam hauh lo hian a Silai lekin  Saui lui, pawih hovin pum hrut an rawn thlunna chu a pan ta nghal zat a. Pawih pasalṭha chu rawn au tuarin....

       ( chhunzawm tur)