PASALṬHA THANGNGHILHLOVA BUNG 66

PASALṬHA THANGNGHILHLOVA

                    (M. Lusei Palian )

                       BUNG 66 NA

            ..........       ............     ..........

           Varṭian a ni ta, Thangnghilhlova chuan a pu Silai ngei mai hum  chung chuan Phekpui khua chu a rap ṭan ta, a hnungah tlangval rual tam takin an zui a, khawchhung an lut ta! Darchhawka chuan a di zial khawm, phuai nena a ah chu lachhuakin a meilung chu a talh ṭek chhak chhak a, meichher a siam a, Pawih ho inchu an hal phei leh ta mial mial mai le! Thangnghilhlova sawi tawh angin hmeichhia nunau leh tarte chungah kut thlak loh tur a ni.  Darchhawka te in hal zet zawng a kang chak hle a, mei unau thli te rawn che ve nghalin a ri ta hem hem mai a, hmun tinah chuan Lusei tlangval te Silai a puak ta. Phekpui khua an buai hle a, an ṭawng chuan an rak nawk nawk hlawm mai chu ngawt pawh chuan an mangan zia a tifiah takzet a ni. Hmuamda pawh tling lovah chuan pasalṭha Tlanga ten Phekpui lalin an hual ta. Thangnghilhlova pawn hma rawn sawn pheiin lal tualah chuan a ding ta ran mai a.  Khua avar tawh a, Phekpui khua chu alum hian a lum hulh hulh tawh a, chutiang thawm awm ta nuai nuai karah chuan tu tan mah han chhin luih chi a ni tawh lo va. Phekpui lal tualah chuan an khalh khawm ṭan ta, 

       Pasalṭha Tlanga chuan Phekpui lal in la ngawi ṭhiap chu melh pahin,

   " Phekpui khua te hian chhiat in tawk ta a ni, Lusei khua te awm mai mai lai in run chiam a, in thiltih man intel a hun ta e, ṭang buai lo khan inpe rawh u le!" a ti chang ta fak  mai a.  

     Lal inchhungah chuan thawm a rawn awm ta, chutih lai tak chuan chhuah lam aṭang chuan pawih pasalṭha rual khat Savun phaw leh fei kengin an rawn tlan chho ve ta hum hum mai le! An hma hruaitu chu Vungkhawchin a ni a, a lianin pasalṭha a ni tih a hriat hle a, an rawn tlan chak hle mai. A fei ken lai thlawh chhuah tirin lusei tlangval ho lamah chuan a rawn ri ta fua mai a. Puklui mihrang Thangnghilhlova chu rang taka rawn che chhuak in khawlaia thingbung phek chuan a lo dang bur ta va a. Silai chuh tawh bik lovin  tlangval pakhat fei chu la in Vungkhawchin tawk zawng chuan a tlan thla ve ta. Thil awm dan chu pasalṭha ho chuan an thlir a, Thangnghilhlova chu an um thla ve ta.  

         Vungkhawchin leh tlangval sawm aia tam mah hian mualkawiah lo lambun an tum kha a ni a. Thangnghilhlova te ho hian Mualkawi lam zawh ta lovin a thui zawngin an kal ta a,  an ram chin hriat loh aleiah an him phah ta zawk a ni. Zan khua a lusei tlangval lo chang tute an beidawng ta khawvar a hnai ta si. Chutih lai chuan an khaw lam kang khu ta vut vut chu an hmu ta,hmanhmawh takin an rawn tlan ta vang vang a ni. 

        Pawih tlangval hruaitu chuan Silai a keng lo va, Fei kibar sei tak leh savun a siam phaw kengin inzo takin a rawn tlan zel a deh a khirh hle ang tih a hriat a. Tual zau laiah chuan Thangnghilhlova nen an intawk dawn ta, hetih lai hian pawih ho pawh an biar( an puanven) tla hnuangin an rawn haw haw luih luih a.  Raltawna te ho ngaih dan a ni ta hauh lo, sapui hual tur ang mai chuan an inzar pharh a, an haw haw ve ta. Vungkhawchin pawh a ding ve ta chat a, Thangnghilhlova nen chuan an inmelh ta. An bul hnaiah chuan an pal per vaivut chu a khu luai luai tawh a. A lehlam ve ve pawh chuan innuai nghal mai an tum lo, an pasalṭha te inmal beih tur chu thlir an tum ṭheuh a ni. Vungkhawchin chuan a kawlhnam a hnung puak a, feikibar dinglamah a hum a, a veilamin Savun phaw a lek a, a fei chu a hman thiam hmel hle mai! 

      Pasalṭha Rala leh Tlanga te inmelh zeuhin tlangval ho silai an sawh tir zung zung a, pawih ho chu an hual ta. Thangzaa pawh a khi vei suk tawh mai. Thangnghilhlova an ring em em mai a, an khaw nghak pasalṭha chu a dah ṭha thei em em ang tih an  ring a ni. Pawih pasalṭha Vungkhawchin chu an ṭawngin a phun mawlh mawlh a, Thangnghilhlova chu a melh rum kher mai, a fei chu a hum nghet sawt a, a hawlh ṭan ta.  Thangnghilhlova pawh chuan pawih pasalṭha chet dan chu hmuh hmaih a tum lo, hlam hnih vel in an inhlat tih chuan Vungkhawchin chuan a fei chu a rawn nawr ṭan ta, Thangnghilhlova chuan rang deuh hian a Bahhnuk hmangin alo la leu zat a, a fei chuan a nawr let ve ta. Pawih pasalṭha chuan a Savun phaw chuan alo la leu ve zat a. Fei an hum nghet dun hle mai, an innawr tawn ta. Thangnghilhlovan Bahhnuk alo hum fel der an hmuh khan thlir tute pawh chuan mak an ti hle tawh kha a ni. 

          Vungkhawchin fei rawn nawr chu Thangnghilhlova Bahhnuk hriam tak chuan alo sah bun sak ta hmawk mai a, chutih pah chuan a fei chuan an hawl a, Vungkhawchin awm chu a inrin ta raih mai le. Ani pawh a thinrim takzet a, a kawlhnam hnung puak chu la chhuak nghal in Thangnghilhlova chu a pan ta a, laklawh awm hauh lo chuan a kawlhnam chu a vai ta. An chhehvel thawm pawh a dai deuh duak a, pawih tlangval haw haw thawm pawh a dai ṭan ta. A tira haw haw ring deuh te chu an meng khup lap a, an hawi kual a hualbeh vek an lo ni ta, belchhung sa an ni ta si. Vungkhawchin chu chem vai a thiam hle, Thangnghilhlova pawh a tawlh hawn hawn a, a chem han vai ve lah a phaw ken chuan a lo dang hman zel a ni. Pawih pasalṭha chu deh a khirh takzet a ni.  Vungkhawchin kawlhnam han vai chhuak leh zet zawng Raltawna a ṭe ṭhawt mai a, Thangnghilhlova awm chu a thawi ta tlat mai le! 

        Huaisenna thisenin a luan hnan, thinrimna phena thahrui chu a lang chhuak ta. Thangnghilhlova chuan a milu lak chem chu hum nghetin a bahhnuk nen chuan ṭan ala ta. A lam kual hi ni mai hian alang a, Vungkhawchin pawhin a suvun phaw chu a dah thla ta. A savun phaw hi Thangnghilhlova chem lakah a him bik lo, a thler hnuang tawh mai a ni. Chutah le Thangnghilhlova Bahhnuk chuan Vungkhawchin malpui chu vunpui chat ṭhawt khawpin a at ta hlawih mai a. Vungkhawchin Kawlhnam vai pawhin Thangnghilhlova kut chu a rawn at ve tlat! Thangnghilhlova, Puklui mihrang an che tak tak a,Vungkhawchin biar chu a tla ta, hrenpereng nen a ding ta. Pawih pasalṭha chuan ala na hle a, fimkhurna a hloh zo ta. Chu tak chu a tan a pawi ta hle mai, a kawlhnam veilama a vai chhuak chu Thangnghilhlovan a lo bum hman a, a bahhnuk chu a thlawn in a vai hauh lo, a milulak chem dinglama a hum chuan an nawn zat chu le, pialrala a rawng bawl tur a neih belh ta. Pawih pasalṭha lu chu a taksa aṭangin a hrang ta nawlh mai le. 

          Chu thil thleng a zo chiah tih chuan pasalṭha Thangzaa chuan ring takin, 

    " Tunah le....lusei tlangval te u!" a ti chhuak a.

     Chutah tlangval ho chuan pawih chhipa sam zial ho chu an han changel hmun kih ṭan ta. Hnam huaisen te thinrimna dang zo reng an awm lo, Phekpui khua chu thisen luanna khaw ramah an chantir ṭan ta. Hetih lai hian Phekpui lal Hranling pawh chuan a lo thlir ve reng a, Lusei pasalṭha te laka an tlawm ta chu a thinur hmel kher mai! Tih theih a nei ta ngang lo a ni. A khaw kang thlir vung vung pah chuan a vaibel chu a pak chuai raih a, khua tih tur a nei ta lo.

        ..........          .........       ............

           Thlen chin aṭanga hnung tawlh ve ngai hauh lo chungturni nem lai tak a Daipui khua lut mek tlangval chuan hliam a ngah hle mai a. Lal in chu a theihna zawng zawngin a pan a, a luhai lutuk chu a tlu ta...

      ( chhunzawm tur)