PASALṬHA THANGNGHILHLOVA BUNG 63

PASALṬHA THANGNGHILHLOVA

                    (M. Lusei Palian )

                       BUNG 63 NA

            ..........       ............     ..........

              A kut veilam aṭanga chuan Bahhnukte chu a chawr chhuak emaw tihtur khawp a rangchuan a hum leh ta! A hnunga pasalṭha leh tlangval rawn kal te chu ding turin a ti ta thut a. A hawi kual ta, Raltawna pawh chu a bulah a rawn ding nghal zat a, tlangval ho lahin hmun ralmuang ni hek lo an  silai chu kah mai theih turin an inring ta. An dinna hmun chu hmun rem tak hi a ni ve hrim hrim nen, uluk zawk chuan an han hawi kual a. Thangnghilhlova hian an mahni thlir rengtu an awm tih a hre thei tlat mai, chutihlai tak chuan thing ṭang tliak ri an hre ta. Thangnghilhlova chuan Raltawna chu a nem sawn nghal zat a, a ni pawh chu a kun ve ta zauh a. An in siam rem hman lo, Silai chu a rawn puak ta zawt zawt a, pasalṭha Tlanga chuan a naute chu au khawm vatin thingbul an bel ta. Awhtlang pasalṭha khawnghak Ngunkiauva leh a naute an rawn che ve a ni. Ngunkiauva nau Nensing chu rawn au ve ṭhatin an tlangvalte chu an fuih ve a.  Tualte val Thangzaa ngaih dan a ni ta hauh lo, 

     " Kan hran lu bing ho chu i phingchil ang aw!" tih pah chuan a naute nen an chengrang rawl an au tir ta. 

    Vanphai pasalṭha Tlanga lah chuan, " Phekphelen vek ang aw!" a ti a. An haw haw ta, lusei tlangvalte chu zamna chhete mah an nei lo. An lal ten Tawlhlohpuan an sin tir chhan an hrereng a, khaw innghahna ṭhiau an ni.  

        Midang chhaih buai lai chuan Puklui mihrang Thangnghilhlova te, Darchhawka te Tairanga te ho chuan pawih ho chu an hual ta. An Silai thun a tling bawk a, a puak ta tak tak mai le, chappui rawh lai ang mai a ni. Pawih lam lah ṭhahnem hek lo, sawm ṭha lam chauh an ni nen an hek ta hle mai. Fungki a zen thunna hman a awm tawh lova, Raltawna leh Thangnghilhlova chuan rang takin hmelma lam an pan a, Bahhnukte nen an che ta. Khaw dang tlangval chuan an lo thlir ṭhap a, nasa hi an va ti tehlul em! Hmelma lam chu an tlem mah mah ni hian a lang a, Kawng khat tlat chuan hmelma lam lo ding mahse he mite pahnih hian tlan chungin an vai kaw phei vek thei hialin an ring a ni. 

       Pawih pasalṭha hruaitu Ngunkiauva chu a biar( pawih ho hian puan an veng ve lo) tla in a hrenpereng nen a ding ta. A hmaah chuan Lasi te zawlthluk zawh loh Thangnghilhlova chu a ding kak hah mai a, tlangval rawn thleng te mit chu an chungah a fu ta. Raltawna lah chuan sam takin Nensing  chu a kuk thlu a, thuzawh fiah atan a zuah hram hram a ni.  Pawih pasalṭha Ngunkiauva chu han en mai pawh hian a huaisen tawk tih a hriat hle a, Thangnghilhlova chu a Sapui hliam melh ran a, a kawlchem sei tak chu a hum nghet hle mai,eng emaw chu sawiin a phun mawlh mawlh a a thusawi erawh an hre ve thiam hauh lo. Thangnghilhlova Silai thlauh chu Darchhawka chuan a rawn chhar nghal zat a, chutih lai tak chuan pasalṭha Thangzaa chuan,

     " Thanga, han chhip thlak teh le...! A ṭul leh an khaw thleng rawkin kan nawr mai tur lah ni!" a rawn ti vei khuk a. Hmelma lam ding tur awm ta mang hek lo, a vaibel a pak par chuai chuai mai le.

      Nghalchang hliam kawlhin  pasalṭha te a phin thut ang mai chuan Ngunkiauva chuan a kawlchem nen Thangnghilhlova chu rang takin a rawn pel ta fua mai a. Puklui mikawl a va che chhe teuh em, veilamah a inher hman hlauh na a, a ban dinglam a thawi hman tho. Ngunkiauva a rawn inher leh chiah tih chuan a kawlchem rawn vai chu a milulak chem chuan alo dang ṭek sawk a. A kut veilama Bahhnukte chu a thlawk chhuak ta, Ngunkiauva awm chu a at phei duai a, a ṭe chhuak ṭhawt nghe nghe a. Lusei pasalṭha zawng a ṭuan a ṭha a ni, Ngunkiauva tawlh hawn hawnin a awm chu a kut veilam chuan a hup bet a. A mitmeng phei chu a sen vek thei hial a, chutih laia Lusei tlangval ho thawm chu pui tak a ni. Chulai ruam chu haw haw chuan a khat a ni ta ber a,  pawih pasalṭha pawh a hmel a zam ṭan tawh tih alang ta.  Mahse lusei tlangval hma a zam anga lan chu a tum hauh lo. A kawlchem chu han hum nghet sauh in hliam tal hnutchhiah tumin Thangnghilhlova chu a pan ta. A kawlchem chu na takin an vai chhuak leh nghal zat a, chu zet zawng a tha neih zawng zawng sawm khawm a ni bawk a a na kher mai, Thangnghilhlova chuan a bahhnukte chuan a lo dang zat a. A milu lak chem chu a Ngunkiauva nghawng zawnah an vai ta vak a chu zet zawng a thlawn ta hauh lo mai! Ngunkiauva lu chu a per ta nawlh mai le. A taksa awn deuh taka ding pawh chu a tlu thum ta dawt mai a.

        Lusei tlangval ho chu an lo ri nasa hle mai, Puklui mihrang chu mak an ti in ralbeih thiam an ti hle a. Khawdang ho chuan a chet dan kha hahipin an sawi ngei ang le. Thangnghilhlova pawh han ding rem deuhin a thaw ta huam huam a, nun chan huama inhmachhawn meuh zawng tha a heh em a ni. Pasalṭha Tlanga chuan Thangnghilhlova chu rawn pan hnaiin a darah a rawn beng thak thak a, 

      " Pasalṭha, i ti ṭha hle mai..! In lal leh inkhaw mite chuan an chhuang ngawt ang che!" a ti chhuak a. Rala te ho chu an rawn hnai ve nghal a. Nensing chu Raltawna chuan rawn hnuk pheiin a dim lo hle mai a, pasalṭha Thangzaa pawh a rawn hnai nghal thuai a, thu chu an zawt ṭan ta. Awhtlang pasalṭha pawh chuan zep reng a nei lo, a sawi ve ta zung zung a, mihuaisen tak  a ni lo tih chu a hriat theih a ni. Awhtlang khua ah tlangval awm an awm mang tawh lo tih an hre nghal a, khaw thim hma in an ban hman ngei ang tih pawh an hre chho ta zel a. Pasalṭha ho chu an bu ta nghat nghat mai, an duhtawk a Nensinga thu an zawh fiah hnu chuan Raltawna chuan a dah ṭha ve leh ta.

         Chulai ruamah chuan rei chawl lovin Awhtlang khaw lam an pan ta. An mi thahte lu erawh an la lova, an thang chin tur an hriat loh vang a ni. Chutih rualin an samzial erawh an hlep thung a, a duham fal deuh chuan an luvun tel kherin an la a. An sahmim ipah an ak khawm ta, Sahmim ip hi panga vel an kawl a, an dah ta rai hlawm a. Pasalṭha Tlanga chuan hma a hruai ve ta thung a, an kalna kawng a fuh ta bawk a Awhtlang khua an thleng har lo tawp ngei ang. Awhtlang khua in tlangval an nei tlem tih hre tawh mahse an la fimkhur hle tho a. An Silai lah sawhsa vekin an lek a, an man thar ho pawh sawhsa in an dah vek hlawm a, Silai an ngah ṭan ta.  Awhtlang khua lak leh a, chuta zan hun hman chu an tum a ni. Awhtlang khua hian an pasalṭha te ral an ven tir a, chung ho chu nichin a an mang zawh tak te kha an ni a. Lusei lam inchan belh lovin hliam tuar erawh mi paruk lai an nei thung. 

        Ni suk chen ai chuan a hniam ta, Awhtlang khaw dai chu alang thei ṭan a, hma hruaitu pasalṭha Tlanga Vanphai pasalṭha pawh a fimkhur hle mai. Chutih rualin tlangval tam zawk an chan tawh tih an hriatna chuan tlangval ho tha chu a ti tho a, hlauhna erawh an nei tehchiam lo. Ni a pil hma ngei chuan Awhtlang khua lak an tum ta!

               ........       .........      ...........

      Tlai ni a liam dawn tih chuan Tualvum lal chu a chhuat zauah chuan a vei kual sek a. A rilru a hah hle mai, an khaw chhan tum tute chu rawn let a hun tawh ngei si a, tun thlengin an hmel a la hmu lo si a ni. Eng kim mai chu a dawn kir a, inremna saui tan bawhchhetu an ni ngat mai nen, vanni an sal dawn ta. A vaibel chu a pak mawlh mawlh reng a. Hringnun kawng chhuk chho zet ah hian a chang chuan mi ropui takte pawh hian tihsual an nei ṭhin a, an tihsual aṭanga thawhchhuah tum miah lo ho hi an tlu hlen ṭhin. Chutih rual chuan laklawh taka mite hmai zah vanga ke pen ngaih hun a awm ve bawk a, chu dinhmunah tak chuan Laltawna chu a ding mek a ni. A thinlung ipikna leh hahna te chu an chhungkua chuan hre vek mahse lalnu Ngurmuani leh a fanu Lalngovi chuan eng mah an sawi lo thung. 

          Lalngovi chet dan chin hi a pa Laltawna hian hre ngat chu ni se a tuithlar duh hial ngei ang. A ni Lalngovi lah chu a ṭawng tlem tawlh tawlh a, tlangval lam lah kawmbik pakhat chauh a nei si. Chu tlangval lah chu a thil tihsual a zara a thunun theih kha a ni. Lalngovi thinlung zawngin Puklui khua a hmelma en thei lova, a en thei ngai hek lovang. Char lamah ṭhu in a nu zanriah buatsaih chu pui turin a pan ve ta a. Chutih lai tak chuan hah taka thaw hlawp hlawp ri chu hria in a nu nen chuan an inmelh ralh a, Laltawna pawh chuan luhka lam a thlir rang kher mai. Chutah pawn lam aṭang chuan tlangval aw lawi rut hian lawi luh a rawn dil zui ta..

        ( chhunzawm tur) 

    

   

    

Zanin chu ka buai deuh a, a lo tawi hret a ni e.