PASALṬHA THANGNGHILHLOVA BUNG 46

PASALṬHA THANGNGHILHLOVA

                    (M. Lusei Palian )

                       BUNG 46 NA

       ..........       ............     ..............

      Hetih mek lai hian Serzawl mihrangte leh Chawntui mikawl te chuan Pangen ngaw an pan mek a. An hma hruaitu pasalṭha, ramvachal ralrel thiam em em mai pasalṭha Selzama an tih chu a chengrang lekin a ding ta chat mai a. Hmalam chu ngun takin a thlir a, chuveleh pasalṭha Chhunthanga leh Vanphai pasalṭha Tlanga chuan an rawn hnaih nghal zat a. Pasalṭha Selzama chuan a chengrang rawl han au tir zatin a tinna lam chu an han thlir a, thil eng mah phei chu an hmu hauh lo. Pasalṭha Selzama Serzawl mihrang hruaitu chuan a mi rin em em Thanpuia chu an melh ralh a. Chu veleh Pazawna leh Thanpuia chu an dawk zawk a, ngaw hnuaiah chuan an pil dun ta. An pil chiah a Sakhi chal lian tak an rawn zawn chhuak nghal zat a, an hlim hmel hle mai! Vanphai pasalṭha Tlanga leh Chawntui pasalṭha Chhunthanga chuan pasalṭha Selzama chu an thlir nawn he haw a, a mit chak zia leh a kut ran zia chu mak an ti a, an ngaisang hle mai. 

        Pasalṭha Chhunthanga chuan, " Serzawl mihrang nge nge...tluk loh rim a nam ngei mai! Khulai kawrte kamah khuan zanriah bawl ila a ṭha ang. Zankhua a kan kal a ngai dawn si a, Meichher tur kan puah pah a ngai ang!" a ti chhuak zat a. Pasalṭha Tlanga pawh chuan Selzama chu a lo fak ngang mai! 

        Thui lo deuh an kal hnu chuan kawrte kamah chuan zanriah bawl turin an chawl ta a. Serzawl khua Bukbawnga chuan tlangval ho chu thu an pe thuai a, an rik hian an ri suau suau mai le! Anni ho hi Chawntui, Serzawl leh Vanphai inkawp an ni a, chhak pawih nawr tura chhuak an ni. Bawkmual lam rang taka thlen a, chhan hman ngei an tum a ni. An hma lama Pangen ngaw lo lang ruih mai chuan tlangval ho lung a len mawlh lo a ni. Zanah an paltlang dawn a ni ngat si, Chawntui tlangval ho lah chuan Serzawl tlangval Thanpuia pawih ral rawn hotu lo tudawltu chu an thlir deuh sek a. Pasalṭha ni tur renga piang ni chuan an hre hial a ni, a pian te chu ṭha an tiin an chung en hle a ni. Pangen ngaw zana paltlangtu hmasa ber ni tur chuan an inbuatsaih sauh sauh a. 

      Pasalṭha Chhunthangan an khua a him ta chu a lawm hle a. An lal Lalvura pawh kha lawm hle in a hre nghe nghe a, a hma lawka an hmelma ni ṭhin Serzawl lam ten an rawn pui a tunah lah chhak pawih nawr turin an che chhuak leh mek a ni si. Thudik tawk lo vanga an tlangval tam tak an boral ta chu pawi a ti hle a, amah ngei pawh chuan tuna Serzawl mihrang Thanpuia hi a tihlum lo chauh a ni. Chhirbi zauah a kap hlum tawh emaw a ti hial kha a ni. Seifate a huna an ṭangrual leh ṭhap thei chu thlah khat an nihna Lungthu pathum chunga bai chhuang ṭhin an nihna tilangtu ropui tak a ni si. Zanriah bar tur chuan an inbuatsaih ta! 

   

       ...........       ..........       .............

         Thangnghilhlova te chuan riahbuk an sual zo ve chiah a, sa lah an ngah si a, Taikulha te ho zanriah bawl chu an hlim hle a. Chawntui ramvalh chhungah an awm tawh bawk a, Upa Buala pawh a hlim hle tawh mai!  Thangnghilhlova chu upa Buala bula ṭhu in Chawntui lam chanchin chu an zawt a. Upa Buala pawh chuan an buaina zawng zawngte, Serzawl lam chikhur chungchang thleng chuan a sawi chhuak a. Tin, Serzawl chungah hian an tidik lo hmasa tih chu a pha miah lo thung. Chutiang taka an diklohna pawm ngam upa chu Thangnghilhlova chuan a ngaisang hle mai, Upa Buala hian Serzawl lamin an puih duh a ring chiah lova. Amaherawh chu Serzawl laka Silai an chan hnem zia leh tlangval an chan hnemzia chu a sawi uar hle  chu a ni. Thangnghilhlova chuan ṭawng thlamuan dan a thiam lo hle mai, mi ṭawnghmang thiam chi a ni lo bawk nen, a ngaihtuah ve rauh rauh mai a ni. Tualvum khua nena an kar thu nen chuan inang a ti hle a, sawichhuak lem lo mahse an khaw lam a ngaihtuah ve hle a ni.

          Zanriah chu tlangval ho chuan an peih ta! Ralkapthanga bawk a che leh surh surh a, Zapuia pawh a phur vut vut khawp mai! Chawntui valte upa Buala zuitu te pawh an hmel a zangkhai vah tawh a, an ramvalh chhungah ngei an awm tawh bawk atin ni. Changel hnah hlai pui pui chungah chuan an buh hmui hiam mai chu a khu vei vung vung a, a hmeh lam lah inlam aiin an nei tui a ni ngat mai si! Sanghal sa atui tawk chauha rep, hrang lian tak tak chu an bun khu vung vung bawk a. Satui paw phat te chu mautheiah an han thli chhuak a. Upa Buala an melh leh ta ṭhap mai! Upa Bualan an bar a, sarep an ṭhial nuau nuau lai chuan tlangval lam pawh chuan an bar ve ta! An ngawi ṭhap mai a, ri awm chhun chu a sa tep ri chu a ni mai! Upa Buala pawh rei mawi tawk a ṭhut hnu chuan a thochhuak ve ta, 

   " Puar zawng ka puar fan ngei e, ma rawh chu ka la kham meuh lo a ni!" a ti chhuak a. 

      Tlangval ho pawh an tho kim tawh a, an upa kalpui ṭawng kau chheh malsawmna awka chu an lo pawmpui hle mai!  An zanriah barna chu tlangval ho chuan an tifel thuai a, chumi hnu chuan an meipui chu an chhep ta hluah a. Zan hun helaiah hian hmangin zing varṭianah  Chawntui an pan leh dawn a ni. 

         Van lamah pawh arsi ten an hmun an luah a, Seifate tana an theih tawk rawn chhuah lehin an kawng ṭheuh buai hauh lovin an zawh a. Ralveng awm an ngai lo bawk a, rei meng lova mut hahdam vat chu ṭha in an hria a. An meipui chheh rem lam chu an han vur belh a, a tuka Chawntui khua lut ngei tur chuan riahbuk an bel ta hlawm a. Thangnghilhlova chuan Thangkima kha a ngaihtuah chhuak leh a, a khawngaih hle mai! Lal nula avangin thui tak a tlan a ngai ta si, amah chauh kha inngaihtuah se zawng pasalṭha a ni a a inhai kaw thei ngei ang! Mahse a nu leh pa kum upa tawh  tuar tir duh lovin harsa titakin a tualchaina hmun leh a hming ṭhatna hmun hmingchhiatna khua a inthlakta chu a chhuahsan ta a ni si a. A vannei anga a la tluang mawlh anga a hmangaih kha ala nei thei ngei ang. Chu zan thiang takah chuan suangtuahna kawmin Thangnghilhlova pawh a muhil ve ta! 

         Chu zanah chuan Puklui mihrangte chu tui takin an muhil a, an kianga Tuitu han hram dut dut leh muchhia hram te chu ngaiah an nei der tawh a. Tibuaitu nei lovin zan chu an hmang liam ta. Varṭianah chuan Thangnghilhlova chu  thawm dim takin a thochhuak ta a,Mahse Raltawna leh Zapuia chuan rang takin an rawn zui hman tlat! Mei han nunin tukṭhuan chu an buatsaih zui nghal mawlh mawlh a. Thawm dim takin an che emaw an tih laiin Ralkapthanga leh Darchhawka te pawh phun nuah nuahin an rawn chhuak a. Thangnghilhlova ten ei an rel mek tih an hmuh chuan an zak hle mai! An hruaitu pasalṭhate eirel an han bar tur chu zahthlak an ti hle a, an vei tuak sek mai. Chutah Raltawna chuan inthlahrung hauh lo turin an ti na a, inthlahrung zual rawh u tihna ang hlauh a ni. 

        Thim thuneihna kiangin chhunlam ropuina a rawn inlan hma chuan tlangval ho pawh an tho kim vek tawh a. Upa Buala pawh karkawngah hmeh ṭha hlir hmeh a ni bawk a, a chakvak hmel tawh hle a ni. Riahbuk tualah chuan an han ti ti nak nak hlawm a. Reilo deuh hnu chuan tukṭhuan an kil ta. Tukṭhuan an kil lai chuan an chaw chhun tur an bawl nghal bawk a, an che suau suau hlawm a.Kawng lakah an chaw lak a ṭha bawk a, an faisa pai pawh a zang hawk hlawm tawh a ni. Chawntui khua an daih chuan an duhtawk rilru viau niin alang, upa an kalpui a engkim a hre ve vek bawk a. A kutah chuan a hriatthiam tur chuan Raltawna chuan a khap tel zeuh zeuh nghe nghe a ni.

            Khawchhunga tukṭhuan bar hun aia hma hret vawkchaw pek hun velah chuan kal an han rem leh ta a. Thangnghilhlova leh Ralkapthangan hma an hruai a, Raltawna leh Darchhawka ten hnu an rawn dal thung a. Lofing sarih vel an kal hnu chuan kawngṭum hlui an pawh ta hlauh mai a. Chu veleh upa Buala chuan,

    " Aw haw! Puklui mihrangte u, hei chu kan Lal putar boral kuma kan bawh ram a ni ngat mai, khua kan hlat tawh hauh lo a nia. Chaw chhun fak hma chuan kan thleng hman ngeiin ka ring a ni!" a ti chhuak ta. Chuveleh Chawntui valte pawh chu rawn hmasa in kawngchin hria an ni bawk a, hma an rawn hruai ve ta a. Chu chu Thangnghilhlova te duh dan a ni si a. Phur tak chuan khaw lam chu an pan ta.

      Upa Buala leh Chawntui valte rilruah chuan an khua ala him angem tih zawhna chu a cham hlawm a. Chu erawh chhanna an la hriat loh zawhna mai a ni. Khawchhung an thlen hunah an chiang ngei ang. An kalchak ta hle mai, ferehsan a pel tawh tih chuan khawchhung chu an hnaih tawh hle a. Upa Buala leh Chawntui valte  hian pasalṭha Chhunthanga te Upa Tuaka ten Serzawl lam an va pur tih an la hre si lova. An rilru chu a inbuk tawn nasa kher mai, thinphu reng reng chuan ke an chhep a ni.

          Ni vanlaizawl a thlen chuan kawtchhuah an hnaih ta hle a. Lo fing khat awm vel chauhin an la thleng lo chu a ni. Upa Buala pawh a ring chu tawi a ti ṭan ta hle mai! Mahse pen ve reng an ni a, lungdawh an hnaih ta hle mai. Chawntui valte chuan hma an hruai zel a, Puklui mihrangte pawhin khawchhung an hnaih hle tih an hrethiam ta. Lungdawh a lang thei ta tih ah chuan an chhak ralven buk aṭang chuan,

     " Kha tah khan ding nghal u la, in Silai kha leiah dah thla rawh u..!" ring zet thupe tak chuan a rawn ti ta a. 

      Thangnghilhlova leh Raltawna pawh an khi ta sak mai. Chawntui valte leh upa Buala te erawh an hlim ta hle thung a, an khua chu  ala him ngei niin an hre ta. Upa Buala chuan aw an thian khak khak a tihian a chhang ta a,

    " Tlangvalte u, upa Buala ka ni e, heng tlangval te hi kan khua min pui tura rawn thawkchhuak Lal  Saitluanga pasalṭha te an ni e, hahdamin awm teh u!" an ti per ve chhak a.

       Chuveleh Ralvenbuk a mi te pawh chuan thupha an rawn chawi nghal zat a. An boruak tawn mek chu tlem an sawi bawk a, khawchhung lut tur chuan an ti nghal zat a. Hetih lai mek hian Thangnghilhlova leh tlangvalte chuan an chhehvel an bih ngun hle mai! Mihrangte innuaina hnu ngei niin an hria a, Lungdawh an hnaih zel a, thisen hlui tawh lo duk dum tawh an hmu ta nual a, hmun ṭhenkhat phei chu innuai hrepna hnu a ni tih an hrethiam ta. Thangnghilhlova chuan upa Buala bulah chuan,

  

     " Ka pu, hei inhim ta ava ang ve! Mihrang innuaina hnu lah ni!" tiin an chhehvel chu an melh kual a. 

       Thangnghilhlova an pen leh chiah chu a hmaah chuan pasalṭha tak tih hriat pakhat a hnung zuitute nen an rawn ding ta zat a. Chu pasalṭha chuan Thangnghilhlova chu a melh vang vang a, Upa Buala chu an melh leh a, tihian a rawn ṭawngchhuak ta a...

     (Chhunzawm tur)