PASALṬHA THANGNGHILHLOVA BUNG 44 NA

PASALṬHA THANGNGHILHLOVA

                    (M. Lusei Palian )

                       BUNG 44 NA

                .........      ........      .........

                   ( Bonus a tel e aw) 

          Chutah le! Raltawna chuan Sangtuala tuksam ziala a ṭhamna chu a thlah a, a milu lak chem chu rang takin an vai ta a, Sangtuala nghawng zawnah chuan a tawp chat a. Sangtuala hmel erawh a dang var pap a, thisen nei hmel pawh a pu lo hial tawh zawk a ni. Raltawna chuan rum zeta melh pahin, 

    " I nun hi ka zuah dawn a, pasalṭha nun pu in nung  tawh ang che, ka lakah hian i tlawm hauh lo tih ka hria a Pialrala kai tir kher che hi ka tum lo. Ngaithla teh, mi tlanchhe tawhhnu um chiam hi bansan ula, i ṭawngchhuah hma in i sawi tur ngaihtuah hmasa ang che. Hei hi hre tel rawh, tlanchhe nazawng hi mi dawihzep an ni lova, an hun tawn zir loh vangte a ni ṭhin! Ka thusawi hi nghilh hauh suh ang che." thupe aw tak chuan a ti chhuak a. Pasalṭha ze dik pu chungin Sangtuala mualpho tur a ven sak tel ve ngat mai si. Chung thil thleng mita hmutu te chuan mak an ti hle a Raltawna an ngaihsanna a zual sawt bawk a.

         Sangtuala erawh a ṭhu leh hnawk a, a mit chu a khap fak fak a. An upa thupetu chu a huatna a zual tawh hle mai! Raltawna chu an melh leh a, Pawlan a sai teuh zia a hrechhuak uai uai mai a ni. Sawi tur reng a hre lo, a naute zinga pakhat chuan Thangkima chu a pan vat a, eng emaw hi sawiin a ipte puiah chu a vawn sak a. Reilo deuh hnu chuan a letsan ta. 

      Thangnghilhlova chuan Thangkima lam chu pan hnai hretin, " Ṭhiana, Lalkhuma khua maw i nih kha...khawilam pan nge i tum? Heng ho hi engtia tih nge i duh?"  a ti chhuak a.

     Thangkima chuan Thangnghilhlova han melh pah chuan, 

 " Ka lawm hle mai pasalṭha te u, heng ka ṭhiante ho hi an duh vang renga min umzui an ni bik lova, damin kir leh se ka duh a ni. Thantlang lam pan ka tum mek a ni" a ti chhuak ve nghal zat a, a tawk chauha mi chhan chu a thiam hle. A awka chhuak aṭang pawh chuan a duai lo hle ang tih a hriat theih a. A hmai tlang a ṭha bawk a, nula ho tan a thlir nawn fo ṭul tur ang chi hi a ni reng a ni.

        Raltawna chuan Thangkima chu a rawn hnaih a, Sangtuala te lam han hawi pah chuan, 

   " Zanhnih vel kan kal ho thei lah ni, heng ho hi Thanga kan kirtir mai dawn em ni?" tiin an rawn zat a.

      Chuveleh Thangnghilhlova chuan, " Aw le,  kha Chhuanpui valte u, kan mithmuh lai ngei hian kir u la, Lusei naufa han innuai hi ṭha kan tih zawng a ni lo. In Silai pawh kha kan pe kir ang che u. Amah erawh chu min umzui emaw in ṭhian hlui hi in umzui a nih ngat chuan inkhua nen lam kan chimih ang! Darchhawk, Ralkap, an silai kha pe let rawh u. Tunah hian liam nghal rawh se!"  thupe aw tak chuan a ti  chhuak nghal a. 

        Sangtuala chuan Thangnghilhlova chu an thlir leh zawk a, an silai te pawh an pekir ṭan  mek a. Raltawna mah khati khawp khan deh a khirh a, an hotu en ber tlangval pian thiam tak chu engtiang tak ni ang maw tih chu a chhut rauh rauh a. A ding chhuak ṭuih ṭuih a. Thangkima melh pah chuan, 

  " I chhungte chunga kut lek an awm a nih chuan mawh ka la ang, i thi tawh tiin tlang kan than mai a niang chu! Lal erawh a lawm lo viau ngei ang....ti rawh u, i liam ang u!" tiin a naute chu a liam pui nghal a. An hmai a uang lovin hrehawm an ti kher mai! Khang Puklui valrualte khan pialralah an vai khan 

 an thawn thei reng a ni si a. Tin, an duhreng vanga che chhuak an ni si lo, khawchhung let chu an hreh ve hle mai!

         Thangnghilhlova te chuan Sangtuala te chu an thlir liam a, Zapuia chuan thui fe a va zui ru a, a rawn let hnu chuan kal an rem ve leh ta! Chhuanpui tlangval chu biak loh chuan a ṭawng miah lova, Thangnghilhlova chuan chu pasalṭha hmelah chuan lungngaihna lungkuai tak leh natna hmel chu a hmu thei a, pawn lam natna erawh a ni lo tih a hrethiam a. Hrehawm a tih loh nan an be ve leh zeuh zeuh ṭhin! A chanchin chu zawhchian an chak hle na a, a sawi mai mai lovang tih erawh a hriat hle mai si a. 

          Ni suk chen aiin a hniam ta, Thangnghilhlova chuan Upa Buala chu an hnuk chau ang tih hlauvin riahbuk sak a rawt ta a. Raltawna lah in Thanga hi kawng engkimah a ring vek a, an ṭhui hruai tlangval ho laka a zahawm nan a thu a tihtlang tir viau zel. Chawntui tlangvalte lah chuan an mahni puitu tur chu an zahin an chungen viau mai a, an thuah inrawlh an tum lo hle a. Zan hmasa lam meichher nen meuh thui tak an kal a, tlangval lam an chauh lutuk an hlau a ni. Puklui tlangval rualte chu an han che chhuak nghal sang sang a, Thangnghilhlova chu a sulsutu zel a ni, Raltawna chuan upa Buala lo ṭhutpui ṭhin turin a ti na a. Tlawmah ala deuh a ni, val upa pawh a ni em lova, rorela awm chu a hreh takzet a ni. Ni, Thangnghilhlova hi pasalṭha Chala mi rin, hruaitu ni tlak,mi bik, ralbeih thiam zam ṭha em em,hmelma karah  bawh hun leh tlan hun a hrilh hriat hneh em em chungnung tura hriatloha vengtu nei a ni. Pasalṭha Chala pawh hian chhak pawih do a chak em em a, amah erawh chu pasalṭha dangte leh tlangval ho nen khawchhung an ven a ngai tlat si a ni, Daipui leh Serthan khua te hi an rawn che har in a ring si lo. A ke bula seilian, hriam taka a chher te hmingthanna tur dawnpuiin ring tawk takin thu ṭha tinreng fahin  a tir liam ta kha a ni.

         Upa Buala chuan Puklui val rual an phu suau suau a thlir chuan a thla a muang hle a, an zinga tal nuam a tiin a vanglai liam tawhhnu a ngai thar hle mai! An hruaitu en pasalṭha tuai tir lah chuan a rawn thiam em em a, engkimah a dah hmasaber ni hian a inhria a, a lunglawm a kim hle mai. Thangnghilhlova leh Raltawna chuan Thangkima chetla chu an mitsir reng a, mi naran ani lo tih an hrechiang kher mai! A chanchin la zawh chian an tum ran a. Reilo teah chuan  Riahbuk an sual zo ta der mai, an riahbuk kianga kawrte tui vawt raih thiang tui tak chu an han khiat khalh khalh hlawm a. Chhawlhal a dawm tlang a niang, an ngawi vang vang hlawm a. 

         Thangkima chuan a silai chu endikin a ṭhutna aṭang chuan a tho chhuak a, Thangnghilhlova han melh chung chuan, 

  " A la hma bawk a, helai ram vel hi kan chuan chhin a nge! Zanriah hmeh tur te alo awm tak mial in...!" a ti a, kal mai a tum a. 

    Thangnghilhlova chuan, " Eh....tla fal chi zuk ninghal lo che chuan, an lo hualbet leh mai tur che asin! Ti teh Tawna, Zapui, han vak kual ang u hmiang!" a ti chhuak  ve nghal zat a. Raltawna te pawh an rawn ding chhuak ve nghal zat a.  An han kal liam tur chu Raltawna chu han lehhawi lehin,

   " Darchhawk, a ṭul ang khan zanriah lo buatsaih ula aw" a ti zui hram a.  Darchhawka pawh a bu nghat a, sarep tihtham tak an la nei bawk a. Muang changin zanriah an lo buatsaih dawn a ni. 

       Thangnghilhlova te ho an liam hnu chuan Darchhawka chuan Chawntui upa chu an melh a, tihian zawhna a zawt ta a. 

  " Ka pu, in khaw thlennan zan engzat nge kan thang la ngai ang? Tunah hian kan kal sawt nge inlokal lam aiin kan muang zawk le?" an ti chhuak a. 

     Upa Buala pawh an hawi kual thuak thuak a, a aw han thian khak khak in, 

  " Kan Chawntui thlennan hian zanhnih vel bak ngaiin ka va ring tawh lo em aw! A....kan lokal lam zawng, kawng zawng chawpin Mualpui khua te, Zukbual te kan rawn paltlang a. Tuna in hruaitu pasalṭhate khan Tuichang lui panna hnai an hria a ni ngat a, Tuichang lui chhak lawk a ni mai e, kawngchin hi ka hrethiam lutuk bik ta lo a ni e!" a ti chhuak a, thudik tak a sawi a ni.

      Darchhawka chuan mau lian tak tak pu turin tlangval a tir a, an niin mei an lo nun thung a. Thingro te pawh la put belh zelin zan lama an chheh tur chu an chhep ta thur a. An hlim tlang dar dar hle a ni. 

          Hetih mek lai hian ngaw hnuaia hma hruaitu Thangkima chu a ding dat a, rawn lehhawi vatin, 

   " Nghal rual an ni ngat mai ka ti !" tiin Thangnghilhlova chu an melh a. Anni pawh an inmelh tlang ṭhap a. Thangnghilhlova chuan, 

    " Khuanu in min veng a ni ngat mai! Amah erawh chu ramchhuak kan ni lova, kan muan phah lutuk loh nan pahnih bak i tum lo teh ang u! Kan zo tawk chauh  ang, Ti ru le, Tawna, Zapuia nen khan veilamah invalh u la, pakhat chauh tum u la. Keinin mual in khawhnaah sawn kan lo khalh a nge!" ring hauh lo chuan a ti a. A sawi zawh rual deuh thaw chuan an inṭhen nghal a. Raltawna te chu an che chhuak chakin thawm an dim hle mai, Thangnghilhlova te pahnih pawh thawm dim takin hmalam an pan ve ta.

           Thingbul rem tak phen chuan Thangnghilhlova  te  chu Silai kah mai theih tur nen an  ṭhu ta. An inring kher mai, Nghalrual chu an lo ther fur mai a, duhthlan tham a awm hial a. Thangkima erawh chuan nghalrual chu thlir lovin an chhehvel chu uluk takin a lo thlir kual thung a. A ngaih a ṭha lo tlat mai, Thangnghilhlova bulah chuan, 

  " I thal thlah rawh, hlauhawm a hnai tlatin ka hria," a ti chhuak a. A sawi zo chiah chu ngaw veilam sir aṭang chuan a ram neitupa, Hmaiparchhuka chu a rawn dawk chhuak nghal zawk a, tlema a tla fal deuh chu a rawn la ta chat mai a. Thangnghilhlova chuan chu thil lo thleng tur a bula tlangvalin a hre thei chu mak a ti hle a.Chutah le, nghalrual ho chu hmanhmawh takin  an tlan darh ta suau mai a, Thangnghilhlova chuan an lam pana Nghalpui lian tak rawn tlan mek chu mit siai a lo tin vang vangin a silai chu a kap puak ta dur mai a. Nghalpui chu a rawn tlanchak bawk nen ding hman lo chuan a rawn inbin phei ta nawk nawk mai, Thangkima chuan a Silai chuan alo tin reng na a kap hauh lova. Raltawna te silai pawh a puak ta dur mai! Silai puah dan aṭang chuan an ṭhelh lo tih a hriat theih nghal mai reng a, chutih lai tak chuan a ram neitupa Hmaiparchhuka chu a rum ta hum hum mai le! 

          Thangkima chu a inher rem vat a,

  " Pasalṭha, eng mah chuhpui che kan tum hauh lo a nia. Kan hlawhtling tlangah i ngai mai ang hmiang!" dam tak nelawmna awm miah lo chuan a ti chhuak a. 

        Sapui hahumna lam hawia ding a ni bawk a, a hmelah chuan zamna chhete mah hi a lang lova! Thangnghilhlova nghalpui kah thluk chu a pan ta thuai a, a ke veilam chuan an rap bet a, chutah heti hian hlado an chham nghal zat a,

    " Tlai ni e tla rawng rawng la,

       Khua kip ngui law ka duhin e,

       Nghovar e, ha ṭha le maw,

       Lenghnem e, thanlai ka duhte nen..." 

                  uluk tak chuan a aw felfai tak chuan an ti chhuak a. A silai chu vanvawr zawng chuan an hmet puak zui dur a. Thangnghilhlova chuan a rawn fin zui vat a, an han chian dun ta a, alian hle taka, sum sarih a tling ngei ang tihtur hi a ni. Thangkima lah chuan chu nghalpui chu a chawi her lawp thei tlat mai! Thangnghilhlova chuan mak a ti hle mai, an Sapui lian zet liamna chu an thlir zui thuak a, chutih lai tak chuan Raltawna te pawh chuan thawm an rawn nei ve ta. Sanghal hlado chu Zapuia chuan a rawn chham ve luah luah a, an rinai takin an hlawhing hma ta. Reiloteah inpawh thuaiin an sa chu riahbuk lama thlen dan tur an rel ho ta a.  Zapuia chuan nghalchang a lo kap ve thung chu niin an hlim hle a, chutih rualin ram neitupa rawl han chhuah khan tlem chuan a ti tim deuh niin a lang. 

  

          Thangnghilhlova chuan, " Tawna, hlado kha han chham leh la, silai kha kap puak leh ila kan ṭhiante khan an hre phakin ka ring tlat! Min rawn fin thuai theiin ka ring!" a ti chhuak a.

        Lo buk nghauh pah chuan Thangkima chuan, " Ni e, ruam lan dan leh ram inkhawh dan en hian an hre pha ngei tur chu a ni!" a ti chhuak ve ta a. Chuti taka alo chik mai chu Raltawna te chuan mak an ti hle mai. Sapui thawm erawh hriat zui tur a awm ta lova. Raltawna chu an piah lung chhawrdawh sang deuh laiah chuan an ding a, a nuih chu a za deuh niin alang, han insum thuaiin tihian a zai ta vang vang a,

 " Val rual e, kan kalah khan e,

    Zingah khuanu a ṭap ai law e,

    Bahsam e hniar kai le maw,

    Len niin e, val maw kan than hi le...!" 

             A silai chu an kap puak leh ta dur a, Zapuia chuan a silai zen alo la sawh zo lo chu niin a hmanhmawh phengin a ti baw nuaih mai a. A fungki lah a kam ṭha hman hek lo, midang si lai rik hnu deuh chuan a ngaih ti ṭha lo tawk lek chuan an kap puak ve ta a.Han nuih chi em lah ni si lo, lehlam an hawi sek a, a ni pek lah chu sanghal serh a paihna lamah la intuai fai hman hek lo, a hmai te lah chu raldo mihrat khawkheng mi ang maiin a sen vei niau a. Sahel lam pang han duhzawk hmel hi a pu mah mah zawk a ni.

        Lungpui chungah han ṭhu chawlin vaibel an han lakai a, Thangkima vaihlo rim chu a tui hle a, a vaibel te lah chu Tursing ngat hi a ni a. An hnung puak vei vung vung chu Zapuia chuan an thlek a,

  " Mikhualpa, ti teh maw ka lo hap ve chhin teh ang, a rimte kha uluk taka beng a ang tlat!" an ti chhuak vei khuk a. Thangnghilhlova leh Raltawna an nui phuh huk a, Buktea han tel ve ta lo kha an ui hle a ni. Ani kha zawng ṭawng hmang thiam zet a ni si a. 

     Thangkima chuan Zapuia vaibel han hlan pah chuan, 

   " Ka lo bengvar lo deuh a ni e,Thanga tiin min ko mai dawn nia, kha.... par chhuang hluai khawpin han pak ve tak teh! A dang pawh ka la nei a nia," a ti ve zat a. A hmel pawh nelawm tak zahawm lawi si hi a ni.

      Reilote hnuah chuan an lam panin Ralkapthanga rawl ngei chu a rawn kuk raih a, Zapuia chhawn han tum chuan a chil a lem sual a, vaihlo khu nen a khuh hak bawrh bawrh mai a, chu ngawt pawh chu nuihpui tham fe a ni. Thangkima chuan zo deuh hian a pawm zawt a, a thing zui nawk nawk a. A reh fel ta mai a, Zapuia mak ti chuan Thangkima han en ang he haw chuan, 

   " Kha mikhualpa, min duhloh thing keuh thei dawn a nih kha maw...! Thahrui pawh i ngah ve hmel e.!" tiin a la melh vung vung a. 

    Raltawna thung chuan Ralkapthanga te chu a lo chhawn vat a, an rawn hnai zel a. Reilo deuh hnu chuan an rawn pawh ve ta a. Darchhawka chuan Nghalpui han en vung vung chung chuan, 

  " Rap ka lo zauh kha ka tisual hlek lo ve!" nui sang chuan a ti a. Midang chuan an lo chian nak nak a. A hma tawh loh avang chuan an sa chu an phawk hlawk hlawk a, midangin Zapuia kah an buaipui ve bawk a. Bawr tak chuan an riahbuk an thlen thei ta. Buk nghak ho lah chuan changel an lo phah duai a, chumi chungah chuan an sa put ṭheuh chu an vawm khawm sen phung a. A thau hle tih chu inhrilh hran an ngai lo. Ṭhut chawlh pah chuan Thangnghilhlova chuan upa Buala chu an en a, 

  " Ka pu, kan inchan zo hmasa ang nge, zanriah kan bar phawt ang le? Eng nge i ngaih dan?" tiin a rawn a. Chu thu ngawt pawh chu upa Buala lawmna tham a tling leh ngat mai. Hlim hmelpu tak chuan, 

  " A la hma alawm le, han chan zo ila, rappui kan  kai fel zet ang a, zanriah chu muang mar in le...han ṭam chhia pawh kan awm lovang!" a ti chhuak a. A iptepuia a chempui hriam la in sa chan tur chuan a tho ve ta nalh a. A ni ber a thawh takah chuan an sa chan tur chuan an tho ta dial a, an chan ta sap sap a. Zapuia pek chuan a kawchhung alo buaipui a, la intuai fai lo zelin a hmel te chu ala sen sung a, a phur vut vut ngei mai! An sa chan sa chu tlangval ṭhenkhatin rapah an lo hlang nghal zel a, nuam an ti tlang hle a ni. Tlangval chuti zat teh meuh tan rei han chan ni hek lo le, thim hlim chuan an sa chu rappui an siamah chuan an hlang zo ta. Chutah chhawlthawh hlado chham tur chuan upa Buala chu an hnawn a, a ni pawh chuan an tlangval Taikulha silai chu han ban sakin tihian chhawlthawh hlado chu a chham ve ta a.

   "  Chhawlthing e, thliak na ngai e,

       Mang nghin e, thanhawl ka vak liau ve,

       Chhawl hnawm e, rak tho u law,

       Valan nghovar a zalhna e" 

        ti pah chuan changel hnah chu an pet darh a. A silai ken zen chauh thun chu a vanvawr zawngin a kap alh eng sen dur a. Tlangval ho an lo haw haw a, rang takin an changel hnah sa thi in a bual sen zui chu an senghawi ta a. Hei hi Chawngtinleri lawmnan a an tih ṭhin a ni. 

        Zanriah atana an lo siam sakhi sa zan khat rep chu an lo chhum a, a tui han fim kak te chu a hang tui dawn tih a hriat hliah hliah a. Kawrte tuia an insil fai hnu chuan zanriah an han siam zui ta a. Satui chu mautheiah an han bun khu vung vung a, zanriah chu hlui thumah an han buatsaih a. Mau lian tak taka an buhchangrum chhum chu an han phel khu leh vung vung a. An sa chu an han sem kual leh a, a hmehin a zir bawk a, pum a ri ruih ruih tawh hial a.  Alai lumah upa Buala chuan a kil a, a chaw bar hun an ngaichang ta ṭhap hlawm a. A ni pawhin hrethiam in buhchangrum chu a kut timu ke ṭhe ṭhaw in an bar ta a, satui hang mauthei a mi chu an hawp ri hruih a. Chumi hnu chuan Thanga te hlui chuan an bar ve leh a, an indawt phei ta thliah thliah a. Tlangval tan rei tak kil chi ni nghal lo chuan an hmazawn ṭheuh chu an hai kaw chak hle hlawm a ni. 

               Zan lam ropuina te rawn inzar pharhin van lam ropuina in seifate tual chu a bih ta duk a. Thla rawn de chhovin milu a khai vei bawk a. Ngaih ṭha tak chuan van lam ropuina chu an thlir hlawm a. Darchhawka lungleng deuh pawh tihian a zai vei rut rut a,

" Karah ka tir ang che chung siar,

 Min va koh la luahlai rem thu thlun hma hian,

 Vawikhat chauh buan ang ka pawm na nge!"

       Chu veleh Tairanga chuan lo chhawn vatin,

   " Kan chhuahtlang dawnlung a zau laiah,

     Ka nghak rih dawn lawhleng mi u sawi laii,

     Val dang chhawm kei zawng ka phal rih lo"

        a rawn ti zui a. An ri ta dar dar mai a ni,hetih lai hian Thangkima chu midang chim buai hauh lohna thingbul belin a ṭhu a. Van lam a thlir vang vang a, a hmelah chuan thinrimna ril tak hi a pai a. Hmangaihna in a nunkawng chhir lai a tibuai tih a hriat theih mai reng a, a cho zawh loh lengi zun vang em ni? 

          Raltawna leh Thangnghilhlova chu an han inrawn zeuh a, tlangval sarep vila meng hmasa tur an han ruat a. Thangnghilhlova chuan a hmasa tur a ho ang a, Raltawna te chuan an chhawk dawn thung a ni. Sapui a hnai tih an hre ran mai si a,fimkhurna hloh an tum lo kher mai! Lenghnawt ar khuan hun aia hma deuhah chuan Raltawna te ho chuan riahbuk chhung chu an bel ta a. An sa urna chu an han vur belh sauh sauh a, an sa erawh changel hnahin an khuh far a, a rim pawh a tui ṭan hle a, a thau han far te chuan an  mei chu a ti alh leh zuai zuai mai ṭhin! 

         Thangkima ṭhutna lam chu thawm dim tak chuan Thangnghilhlova chuan a pan phei a. Tairanga chuan a lo perh phakloh Vapual thlir vung vung thung a. Hlam thum vel a a hnaih lai chuan Thangkima chuan rawn hawi let hauh lo chuan,

 " Ti rawh lo ṭhu hahdam ve tawh, saw i naute titi na i dal mai mai niin alang!" a ti chhuak a. Thangnghilhlova chuan mak a ti hle mai,zam hauh lova hmalama pen pah chuan,

  " Hei chen i tlan ngai khawp hial chu a nep hauh lovang. Mipa takin han inthing harh ta che pasalṭha!" an ti let ve khauh a.

      Thangkima chuan, " Eh...keini hnamchawm tlangval, belval vala val mai mai te hi chu tu'n min ngaihsak hauh lo a nia.!" tiin a hnu chu an thup tlai khawhnu a.

      Chutah Thangnghilhlova chuan a bul thleng tawhin mawng han hun pah chuan,

  " Pasalṭha, ka bulah chuan zep duh hauh suh, i duh chuan min zui reng thei a nia. Tin, dama kan let pawhin Puklui lal in a lo lawm em em ang che tih hi ka hria a ni!" tiin a hmalam hun tur chu huphurh hmela lang si zam hauh lo chuan an hmer tel sak a. 

       Thangkima chu a nui sak a, a vaibel chu an fawp kawk a, 

    " Rawn zui zel che u hi ka chak khawp mai, mahse harsatnaah ka barh lut ang che u tih hriatsa a ni. Sangtuala te ho kha let mah se, Chhunkunga leh a hoten min rawn um thovang!" a ti chhuak ve leh a. 

      Thangnghilhlova chuan Thangkima han melh pah chuan, " Chutiang em a, pasalṭha pakhat khaw khat lalin han um mai chu aw! Eng thil chiah nge i tihsual le? Puih theihna che ka neih phawt chuan ka tlanchhe hauh lovang le!" a ti chhuak ve ta a, a thinlung a phawrh ve in  pasalṭha in chutianga a ṭawngchhuah chuan a ti ngei ang tih chu a chiang hle a ni. 

      Thangkima chu an thaw hawk a, vaibel han pak talhin, " I ngaithla peih ngut ang maw?" an ti leh hnuhnawh a. Thangnghilhlova chu a lo bu nghat a. Chutah Thangkima chuan hetiang hian a chanchin chu a sawi ta a,

  " Lalkhuma Sailo, Chhuanpui khua leh tui ka ni ṭhin a. Ka pa hi Thangbilha niin tlangval laia thangchhuahpa a ni a, chuvanga ka laiah hmingah Thangkima sa ta hi a ni awm e. Kan Lal hian fanu hmel ṭha zet Saiziki, Ziktei a nei a, an unau a apang ber a ni nghe nghe a, nuṭa pali lai a nei a,  Bawksuih te, Lungsei te khi a nuṭa te khua a ni. Tun hma kha chuan ka pa pawh hi Chhuanpui khua a mi langsar a ni ve ṭhin a, mahse kan Lal ropui zual zel chuan a thlauh thla ta a. Zep thu awm lovin Ziktei nen hian kan inhmelduh hle a, a ni pawhin min thlahlel hle chuan ka hria. Mahse.....( a ngawi ta vang vang a)

    ( chhunzawm tur)