PASALṬHA THANGNGHILHLOVA BUNG 43

PASALṬHA THANGNGHILHLOVA

                    (M. Lusei Palian )

                       BUNG 43 NA

                .........      ........      .........

           Thangnghilhlova chuan Raltawna an mitmei zeuh a, chutah an Silai chu hum nghet sauhin hmalam chu fimkhur takin an pan ta a. Ngaw hnuai thelh chin an han hmu chiang chu le, an Silai chu a tin chhuak rang kher mai..! An hma thing din hual chhungah chuan tlangval pakhat pian thiam tak hi mi pasarih laiin an lo hualbet a, chu tlangval chu a hmel ala lang chiah lo na a, a inring hle mai, a kut veilamin thingtuai tawng chen vel a hum a, Silai a hnung puak a Chempui chu a dinglamin nghet takin a hum thung. A zam hauh lo tih chu alang reng a, a kut veilama a thingtuai hum chu a tiche zauh a. 

             Thangnghilhlova leh Raltawna chu an han inmelh leh ralh a, Raltawna chuan Zapuia te ho chu a hui a thawm an dim hle hlawm, an Silai lek nghalin chung tlangval lo dingkhawmte chu an hual ṭan a. Thangnghilhlova chuan a hnaih hret hret a, Thing lian pakhat phen chuan an thlir leh a. Chuveleh an tlangval hualbeh mek chu rawn heti hian a  ṭawngchhuak ta a,

    " U Sangtual, thisen chhuah kher hi ka duhlo a nia. Ka ṭhiante leh unau anga ka ente in ni a, khawngaihin min kiansan teh u. Hei chen ka tawlh tawh a, ka lai a na takzet tawh a nia. In silai kha lek hniam u la, min kiansan rawh u. A nih loh chuan min hnaihtu apiang hi ral enin ka en ang che u a, an lu ka la ang!" fiah chang khelh khawlh chuan a ti chhuak a.

        Chutah Sangtuala ni awm chuan ring leng lawng hian, 

   " Thangbilha fapa chu ni lo la, khawchhungah i lu ka la ngei ang. I pa ka zah em a i vanneih pui ta anih hi! Engvanga kan lal fanu chu tihmingchhia a uang nge i nih reng reng a. Zathang, a nung chung kher lo hian i hruai kir mai ang u. Tha kan seng hnem tawh viau mai, Kan lal pawhin min hrethiam tawh thovang!" an ti chhuak ve leh a. 

      Chutah alaia ding sakawl pian ṭha ang mai chuan, 

    " Lal fanu kha ka hmangaih em em a, amah erawh chu ka uang hauh lo.Nangni pawhin in hriat kha!  Thil diklo a awm a ni, hmanrua mai inni in ka hria. Mahse min kiansan lo a nih chuan ka kut dinglam hi kan lek ve tawh a nge! " ti chhuak chung chuan a inher rem a.

      Chuveleh Sangtuala chuan, " Khai...!" an ti hman chiah chu Thangnghilhlova chu nghalchang ṭhawn hlim  ang mai chuan an hual beh mek tlangval lamah chuan a lawr zawk a.Tlangval pakhat ve mai chuti zatin an hualbet chu a ngaih dan a ni hauh lo. Sangtuala te chu an melh a,

      " Hualbeh vek in ni tawh a, in hmanrua kha leiah dah thla vek rawh u. Tlangval heti zatin pakhat chauh han hual beh chu ava zahthlak deuh ve!" a ti chang fak a. 

     Chu tlangval hual mektute pawh chu rang deuh chuan an hawi chhuak nghal a, Silai kaw hmawr in an  lo tin far tawh chu niin hreh hle mahse an silai dahthlak a ngai dawn ta! An inmelh kual ta hrak hrak hlawm a. An hual beh mek tlangval pawh chuan Thangnghilhlova chu a lo melh ve reng a.

    Chuveleh Sangtuala chuan thinrim takin,

  " Tu fa ar ah loh nge i nih a, engvanga rawn inrawlh ngawt nge i nih? Kan buaina a ni a, i Silai kha pu la, min lo kiansan rang rawh! Sangtuala hi i hrechiang lo a ni, pawisawi ve lo tawrhtir hi ka duh lova, a ṭul a nih erawh chuan ka pawiti hauh lo!"  A silai han lek chung chuan a ti chhuak a. A sawi zo hman awrh a ni, a nghawngah chuan silai dawtin a rawn nawr zawt a. Chang fak hian,

  " I silai dah thla rawh!" a rawn ti ta! 

    Thangnghilhlova chuan, " Sawm loh khual innei ah ngai mai teh! Chinghne rualin Keite beihrawn intum niin a lang. Kan kalna kawng chu kan thianfai thiang alawm le.Kha i chengrang kha i dahthla vat lo a nih chuan Pialralah i lawi ngei dawn a nia!" a ti chhuak a.  Tlangval amah ang rual vel  chu  an en a, hmel fai veng vawng, mitmeng fiah tak, huaisen hmel tak a ni. Hetih lai hian Zapuia te Ralkapthanga leh Darchhawka te lawh an rawn hnai zel a.  Thangnghilhlova chuan, 

    " Ṭhiana hei...engtizia nge? Engvanga heti taka umzui che nge an nih, eng nge thil awmzia? Tu khua leh tui nge innih reng reng a?" tiin a zawt zui nghal zat a.

    Chutah tlangval chuan Thangnghilhlova mitmeng ah tak en chung chuan, 

   " Ka lawm e, ka hming chu Thangkima a ni a, Chhuanpui Lal Lalkhuma khua leh tui ka ni ṭhin! A....hei Lal pawi ka sawi a, ka tlanchhia a nih ber hi!" nui sang chuan a ti a.

     Thangnghilhlova chuan han thlek nawnin, 

" Pasalṭha meuh han tlanchhiat chu, pawi nasa tak a nih ngei dawn chu! " a ti chhuak a. 

Tlangval lam chu an thlek kual a, " Hei, an Silai hi laksak vek u la, kan hmanhmawh a ngai si a, heng ho hi chu tih dan kan la ngaihtuah dawn nia, chetlak tum an awm chuan in duh ang khan ti ang che u!" a ti chhuak a, thupetu ang deuha awm chu hrehawm a tiin nuam lo a ti hle mai! 

     Ralkapthanga te ho chuan Silai chu an rawn khawm ta mial mial a, Chhuanpui tlangvalte lai a nat hmel hle mai! Mahse an mahni rawn chimtute hian an tam hneh si, han che chhuak chiah se zawng an chan chuan maian chan pawh a tluk hauh lovang le. Sangtuala lai na lutuk chuan, 

    " A tute chu nge innih a, engvanga rawn i rawlh ve chiam nge in nih? Tu khua leh tui nge in nih a.  Mipa fa in awm na nge, mi inring lo lai hualbeha an chunga chetlak chiah hi a ni maw in lo thiam a?" an ti chhuak ve leh chu a nghawnga silai hmawra tintu chuan an nawr na lehzual sawt a. Silaia tintu Raltawna chu a inher rem ta a. Chiang lehzual chuan inhmachhawn chubgin an melh a, 

     " Nangni zawk hi alawm ni mi inring lo lai lo hual zawk a, tlangval pasarih laiin pakhat chauh lo hual hi intheih tawk chauh em ni? Puklui Lal Saitluanga  chi al liak ngat kan nih hi...Chhak pawih nawr turin kan rawn chhuak a, kan chhak pawih ho ai chuan kan Lusei pui mi depde ho hi ka haw zawk daih! I tumtawk chu ka awm e!" tih pah chuan a inher rem a. Darchhawka pawh rawn hnai vatin Raltawna Silai leh iptepui  chu a lo ban sak thuai a. Raltawna chuan a milulak chem chu a hum nghet hle mai! 

       Sangtuala chuan ṭawngchhuak fuhlo a inti hle a, a hmaa ding tlangval lah mi namai a ni lo tih a hrechiang hle si. Tin, Puklui tlangval ho ralbeih thiam zia tlang tluana sawi leh thang a ni a. A ring a rawlh thui ta mah mah niin alang a, han inphahhniam leh chu a hreh ngang mai a ṭawng tawhhnu a sut theih ta si loh chu a pawi ta ber mai! A tuang tichhahin,

     " Tum loh zawk kan hmachhawn dawn tihna a nih ber hi maw? Chuti taka kan buainaa rawn inrawlh chak chu, khaw nge keimah Sangtuala!" tiin a Chem chu a phawrh ve ta a. 

 

      Upa Buala chuan ṭul a ti rih lo hle mai, mahse ngal tha chak leh thahrui tam tak nei ho hlir a zui a. An ngaihtuah leh an ngaih dan tur chu a chhut a awm a ti hle mai si. Engvanga helaia heng tlangval ho hi lo inhual mai nge maw an nih le? An tlangval hual ber lah chu a pian a ṭha phian a, pasalṭha a ni ang tih a hriat hle mai bawk si. An khaw lal pawi khawiha tlanchhe tawh na na na han um zui kha ṭul a lo ti ve hle a ni. Hmeichhia vang a nih hmel hle bawk si, ṭhut hmun remin Raltawna te chetla chu a lo thlir ve ta ngawt a. Thangnghilhlova pawhin Tawna chu danmi a ni in a hre lova, a thlir ve ta ngawt a Chhuanpui khaw tlangval silai hum tawh lote pawh chuan an upa fapa Sangtuala, an hotupa chu an melh ṭhap a.

      Raltawna chuan tham lo tak hian, " Kan tumram a la hla si a, han che thuai ta che maw....hei ṭhian ten min nghak rei dawn a nia! Pumpui lianpa, han che teh!" tih pah chuan an melh tur khai a. Chu ṭawngkam chuan Sangtuala chu a dengna hle mai, thinrimna chuan a bual a, a ngaihtuahna a tawi ta. 

         Sangtuala chuan rang tak hian a ralchem chu Raltawna lu zawnah an vai vak a,  Raltawna chu tlemin vei lamah a lo tawlh hlek a. Sangtuala pawh chuan a tum a ṭhelh tih a hria a, rang tak chuan a inher ve leh ta nghal zat a. A len ṭhat tehreng nen a inzo in a ṭuan a ṭha hle a. Sangtuala chuan a ralchem chu rang takin Raltawna pum zawnah an vai leh vak a. Chu zawng, a teuh hle a ni, Ralkapthanga leh Darchhawka pawh an lo " Eh!" ṭhat a. Sangtuala tha pek na si chu a pai chawn mai le! Chu veleh Raltawna chuan a milu lak chem hmang lo chuan Sangtuala nak nemah chuan a kut veilamin a lo beng ngheng mai a. Sangtuala thaw hawkin a vir ta khat khat mai le. Chu thil zet chuan a lai ava tina tehlul em! Rawn ding rem lehnghalin a rallak chem chu mumal nei tawh lo hian an vai chhuak tak tak a le, Raltawna pawh a tawlh ve han han mai le! In malbeihna reng reng a, tumpui har ber chu mumal nei lova che vak ṭhin te hi an ni.Raltawna chuan apa Chala thu hrilh ṭhin a hrechhuak uai uai a. 

    

         Rang taka inher in Sangtuala chu a sir zawngin a nawr ta phut a. A nak nemah tho chuan theihtawpin an tlawh ta a le. Sangtuala pawh a bawk ta thlawrh mai le! A thaw ta hlawi hlawi mai a, a rawn in nam kang leh chu Raltawna chuan a hma aia na in a lo tlawh leh ngheng mai a. A lu chu lei charah chuan a ri ta bawp mai a. Chuveleh kun hniam nghal zatin a tuksam zialah a man ta a. Sangtuala ralchem lah chu a chhuih len sak ta hmiah mai si, Sangtuala chuan a tawpna ni a ni a thleng  ta tih a hrethiam mai reng a, a thaw hawk hawk a.Raltawna mitmeng pawh a en ngam ta lo. A tuksam zialah lah chuan a ṭhamna hle mai bawk si, a ṭham tho chu  a che hlei thei lo a ni. Thangnghilhlova chuan a ṭhianpa hian thapui a thawh lo tih a hrechiang hle a, a lo khi vei suk ringawt a. Chhuanpui tlangval te chetlak  tum an awm em tih chu a lo thlir uluk hle thung a ni. 

       Chutah le! Raltawna chuan Sangtuala tuksam ziala a ṭhamna chu a thlah a, a milu lak chem chu rang takin an vai ta a!

     ( chhunzawm tur) 

    ( A tawi deuh chuan lo hrethiam u la, Sunday Bonus a awm turah ngai ang u)