PASALṬHA THANGNGHILHLOVA BUNG 18

PASALṬHA THANGNGHILHLOVA

             .......M. Lusei Palian.......

                       BUNG 18 NA

                .........      ........   .........

        Raltawna leh Thangnghilhlova chuan Pasalṭha Chala thlirna lam chu rang fe hian an thlir ve nghal zat a, an thil hmuh chuan an mit ala zar mai. Sazuk lian leh mawi tak a ki pawh hreu bum chu an zuk hmu nghal thuai a. Chu Zukchal lian tak chuan sih tui chu a lo dawt kiang kiang mai lemKangthal ( Silai sawina) han hman phakna ala ni mai si lo, thawm dim fe chuan an thlir ta reng a, an chhuk thlak mai chuan an ti tlan ngei dawn si! Chutih lai tak chuan mual dinglam lu lam aṭang chuan Tumpang chal ngei chu alo kiu rut rut zui lehnghal zat a. Pasalṭha Chala pawh a kiai suk a, an inmelh kual ralh tawh mai! Pasalṭha Chala chuan Thangnghilhlova te ṭhian dun melh pah chuan, 

  " Kan fimkhur hle chuan kan hlawhtling thuai thei a, Tawna veilam hi dim takin zawh thla la, Thanga dinglam hi  zawh thla thung ang che, ka rawn hel kual hret ange!" tiin a naute duhsak tak chuan a ti chhuak a.

  Thangnghilhlova chuan, " Ni lo ve ka pa Chal, ka rawn hel kual zawk a nge, Tawna nen khan lo zuk chhuk rawh u!" ati chhuak ve ta a.

     Reitak inhnialna hman awm hek lo, pasalṭha Chala chuan, " Inhnialna hman a awm lo, thawm dim ang che u!" tih pah chuan a kal ta vut a, Raltawna te ṭhiandun pawh an in melh nghal zat a, thawm dim fe chuan an ke an chhep ta! Zukchal kha chu a lo awm tawh lova,  a thawm lah an hre der lo lehnghal! Chu Zuksih chu an rin aiin a lian tih an hre thei nghal a, fimkhur leh thawm nei lo chuan zawiin an hnaih ta hriau hriau a. Sih lan chianna hmun an thlen chuan thingzar  ṭhutna rem tur chu an melh nghal vat a, Raltawna chuan Hnahkhar lian fe a bel nghal zat a. Thangnghilhlova pawh chu hawi kual vat vatin a thing hming hriat loh kungah chuan a lawn ve ta thuai a. Thawm an dim thiam bawk a, sa dang pawh an lo kal thuai chuan a rinawm hle a ni. 

         Leido an neih tak avang khan Puklui khua hi an ramvak khat hle kha a ni a, sa pawh an lo ngam hman hle tawh alo ni. Pasalṭha Chala pawh chuan Tumpang kiu na hmun chu a hel a, Sih lamah khalh liam ngei a tum hle a, mahse thawm erawh hriat a har hle thung. Sahrang chin meuh zawng thawm an dim thiam em bawk a ni. Thawm dim fe chuan Sih lam chu a pan ve zel a, a rin ang chuan thil a kal ta bik hauh lo mai! Sih chu a hmu pha reng tawh a, an sahrang erawh hmuh tur a awm hauh lo. Pasalṭha Chala pawh a hawina lam apiangah chuan a Kangthal hmawr chu a hawi ve nghal zel tawh a. Sahrang chin finzia leh dehkhirh zia a hre chiang em a ni. Sih a hnaih viau tawh a, Thangnghilhlova pawh chuan alam pana pasalṭha Chala rawn che hriau hriau chu a hmu reng tawh a, Tumpang chal erawh hmuh tur a awm hauh si lo. A pa in Tumpang chanchin alo hrilh tawh chu a hrechhuak roh roh mai! Pasalṭha Chala pawh chuan a rawn hmu ve thuai a, ala hma deuh bawk a, ṭhutna tur thing rem deuh melhin thingah a lawnkai ve ta! 

        Hmuamda aia rei mah an ṭhu ta,thawm reng reng an hre ta lo! An inmelh kual ṭham ringawt a, Ni pawh a her liam dawn ta ruai mai! Rei lo deuh chu an han ṭhu leh a, chutah le Sih veilam aṭang chuan thawm an hre ta, Raltawna chuan a hnaih ta ber ni hian a lang a. Thawm chu a rawn hnai zel a, a lang thei ṭep ang tih chuan a reh leh ta tlat mai! A hnu deuh ah chuan thawm chu Sih hlat zawngin a kal leh ta tih hi a hriat theih a, chuveleh pasalṭha Chala chu a lawnna aṭangin a chhuk nghal zat a, ring si lo fiah tak si hian,

   " I kir san phawt ang u, kan thawm a hria niin a lang tlat mai! Khua a tlai zel chuan kan Silai thochuan kan bih tlang zo dawn lo!" a ti a. 

     Thangnghilhlova leh Raltawna chuan an ui hle mai, rawn lang leh vat turah an ngai a mahse pasalṭha Chala thusawi chu a dik ngei ang tih an ring bawk si! Ui fe chuan an chhuk ve ta a, an hnu thup fe in Zuksih chu an kalsan ta a. Thui deuh tak an kal hnu chuan Raltawna chuan,

 "Ka pa Chal, engti zia nge...? A rawn lan har ka lo ring lo tawp asin!" a ti chhuak ta a.Chu chu Thangnghilhlova ngaih dan chiah a ni ve bawk a. 

   Pasalṭha Chala chuan, " Sahranga chhiar chin meuh hi zawng an fing hle a,  thawm an hriatna leh rim an hriatna a ṭha hle . Kan thawm a hria a nih ngei kha, varṭianah kan chang leh zawk dawn nia." a tih chhuak a.  Thangnghilhlova te ṭhiandun chuan thawm dim an intih tehreng nen mak an ti hle mai! 

       Riahbuk lam pan pah chuan an Beai kam chu an en haw nghal a, vahrit pahnih lai alo inkhai hman der chu niin zanriah hmeh atan chuan a tawk viau ta ve ang. Chutih lai tak chuan an riahbuk chhak fe aṭang  chuan Silai han puak dur chu an hre zawm nghal zat a. An inmelh kual rang hle mai, zawi fiah tak si chuan pasalṭha Chala chuan, 

  "A fuh a ni ngat mai! Silai puak ri kha a tawi tuk mai!" an ti chhuak a. Buktea chu an ngaihtuah hle tawh mai! 

    Hmanhmawh fe chuan riahbuk lam chu an pan tlang a. Hmuamda velah chuan riahbuk chu an hmu thei ta! Raltawna chuan Buktea chu an ko lauh lauh a, chhangtu reng an tawng lo. A lo vah kual ve chu ring tho mahse Silai puak ri an hriat khan an khaw thil tawn tawh nen an ngaih a ṭha lo mai chauh a ni. Pasalṭha Chala hian Tualvum ho hi an rilru a dam kim ala ring chiah lova, ala vengthawng hle chu a ni. Tunah ngei pawh hian an ramvalh an thlthlai pah a ni reng a. Thangnghilhlova pawh chu a hawi kual nasa ve hle a. Riahbuk kawta an din kual ṭhap lai chuan Buktea ngei mai chu Sakhi paw bahlatin a rawn hei ha thla dap dap mai le! A rawn thirseh nui hui mai bawk a, rawn hnai zelin Raltawna bulah tak chuan an keuh dawp a. Han keuh pah chuan Raltawna chu an nek per nawlh mai bawk a, a ni lo inring chiah lo chu a per ve nawlh bawk a. Raltawna lah duai lo, rawn insiam remin a Silai chu an dah te te a, Buktea chu a rawn pawm chat a. Buktea lah chuan Thangnghilhlova te ho zawhna pawh chhang lem lo chuan Raltawna nen chuan an han inbuan zui ta rih a. Pasalṭha Chala pawh chuan ṭhuthmun remin nui sung hian vaibel pak mawlh mawlh pahin a lo thlir ve a.

        An han ṭang dun tak tak a le, an sang vawih tuar tuar mai a! An riahbuk tualah chuan an thum dun dut dut mai chu a ni. Inbuan na na na chu an thiam dun hle a ni, an vir dun zak zak a, an mawng te han tipoh in an han inkhual buan vei ṭhin, hmuhnawm tak a ni. Thangnghilhlova chuan changel hnah an sat zui zat a, a kir leh chuan an lo la inbuan a hmuh chuan hun ṭha a melh a, an han inpawm leh chiah chu an pahnih chuan man betin zo fe hian an Changel bul sah chhum chawi lawp mai a, chutah duhtawk ta mai lo chuan a la thing dun hrep mai chu a thlirtu pasalṭha Chala chuan mak a ti hle mai! Thangnghilhlova thahrui han neih zia chian a chak ru kher mai le! 

          Pasalṭha Chala chuan, " Khai le, khaw thim hma in Buka, sakhi mitdel kah hi i chan ang u hmiang!" nui duh hauh lo chuan  an ti chhuak a. 

     Thangnghilhlova chuan, " In hria maw chu....!" tih pah chuan ala pawm kang dun vu vu a. 

      Buka lah chuan, " Thanga...duhtawk teh, hei san a pe a nia!" tih pah chuan ring tak hian an vawih leh tuar mai a. Chutah meuh chuan an inthlah ta hlawm a. Raltawna pawhin Thangnghilhlova thahrui ngah zia chu mak a ti hle mai. Thaw hluam hluam chuan an ding ta a. Changel hnah han phah zui zat in sakhi chal lian ṭha zet chu an chan darh ta. Raltawna chuan a hneh sawh ngang mai, a rik hian a ri par par a, a bul hnaia ding te chu a nek sawn leh lawp ṭhin vei bawk nen an hlim hle a ni.Buktea lah chuan an vahrit chu alo puah san daih a, a ṭhiante han melh pah chuan, 

  " Zanin chu laipawng hnuai zawk thle lawl khawpin kan bar mai tur lah ni! A chhumna tur hi kan nei lo a nih hi maw le....Aw pu Khuanga te bel kha kan lo kensak lo a ni, an lawm zawk daih awm si a!" an ti ve leh khuk a. Mei a vur belh sauh sauh a,  a hawi kual a, chempui nen a liam ta vut a.

                ............      ..........    .........

     Tlai ni tla tur eng sen mawi phet chuan Chhawllentlang chu a ngaihla tawk lek hian a chhun hnim raih a. Favang boruakin a luh ṭan ta bawk a, a lunglen thlak ngei mai! Chhun lam ropuina han liam mai tur chu thinlunga thu chheprelh nei ṭun hian Tualvum lalnula Lalngovi chuan a thlir vang vang a.Hmangaihna zun hian a phuar zo ta niin a inhria a, Puklui tlangval amah rubotu, ani khapa sakhmel ngei kha hmuh chakin a kur vel a ni ta ber e. Puklui khuaah khan rei a cham hauh lo na a, a tunhma rilru a thlak ta dawr mai chu a ni. Hmuh theih hauh loh hian a chenchilh a, phuarna hrui hmuh tur awm hauh lo hian a phuar a, thinlung saltanna ata hi a chhuak thei tawh ngai dawn em ni! Hringnun hian hringnunah hian duhthlanna awm hauh lo hian hun a kalpui a, harsatna hmuna thinlung aṭanga ṭek lung te tak te lo piangchhuak, langchhuak si lo lunglenna hian hringnun mittui a ko chhuak awlsam ber!  Lalngovi zawng a zawltlingvawnnat mai dawn ni hian a lang ta! 

     Ni an inremna boruak kha hetiang hi a ni..Tualvum upa khabe sep sual ngai hauh lo Zikpuia chuan a thiam tawp aia nasa in Lal Saitluanga bulah Tualvum tan a inleih baw ta a. An lal nula tan ngat phei chuan a nun pawh dahkham hial a ngam a, an thil tihsualah ngaihdam a dil mawlh mawlh mai reng a. Laltawna inchhir thu leh an chan a chhiat zia an sawi zet zawng Sailo lal Saitluanga ngeng a chhun chiang hle a. An silai man pawh fung sawm lai pekirin a hmingin Sial eng emaw zat an inhlan ve a, an val upa te leh pasalṭhate pawh damin an kir tir a, Tuitun lui ngeiah remna sa ui an tan ta a ni. Tualvum khua hian Puklui lam hawi hian chengrang an chawi lehin a rinawm loh hial a ni. 

      Chhunlama ropuina chu hreh hmel zetin a pil dawn ta. Lalngovi tlai ni tla thlira ngawi renga a ṭhu chu tu emaw hian a darah a rawn vuan ta! 

      ( chhunzawm tur)