LUNGRENG NGÂW S-4 ...(23)...

LUNGRENG NGÂW...SEASON-4....23...

             ( PASALṬHA THANPUIA)

                   M. LUSEI PALIAN

     
             .........      ...........     ..........

     Aimawia chuan ring fe in, " Nang, mi dawihzep lutuk pa....lo inring teh! I ngenmu in pawi a khawih thukzia leh ...!  I thil tih avanga kan buaina hi titawp ang hmiang!" tih pah chuan a chem chu an vai ngheng mai a. Chutih lai tak chuan Chalbuanga leh Pasalṭha Thangvela an lo inhmachhawn ve mek bawk a. Pasalṭha Mangvunga leh Thanpuia te lo inveh mek in, pasalṭha Chhunthanga hian sam fe in Pasalṭha Zalawma lu a la mek  bawk a,Zakima erawh a bona chin hriat a ni tawh lo.

     Pasalṭha Thangvela leh Chalbuanga te chu an hmuhnawm ngang mai le, an thiam pawh a inchen hial niin a hriat a, Thangvela chu a tuai deuh zawk ni hian a hriat na a, a chet dan phung a dik thlap lawi si! Aimawia te ve thung erawh tha ngah zawk leh tawnhriat ngah zawk chuan a nawr tawm hneh hle a, a chem han vai pah te chuan Ngurṭhuama hnungzangah chuan na fe hian a beng leh ṭhin! Chau hnapa chinphar a tum hle tih chu a hriat ngawih ngawih mai! Pasalṭha Thanpuia te pawh an intia dun bawk a, an daihrei hle dawn ni chuan a lang a Mangvunga chu a che ve thei phian mai! Mangvunga hi inmal beih thiam tak a lo ni ve nen a fimkhur hle mai, a che chu adik thlap zel.

 
      Pasalṭha Thangvela chuan thapui a chhuah ṭan a le, a chempui chu rang fe hian a vai chhuak ta zat zat a Chalbuanga chu a inveng zo ta lo. A ṭhingṭhi ta hnawk mai le, chu veleh rang zetin a chem chu an vai tle ta zawk a, pasalṭha Chalbuanga lu chu leiah a lir ta hlawl mai le! Hetih lai hian Pasalṭha Thanpuia te pawh an innawr na hle mai a, Mangvunga thahrui han ngah zia chu pui tak a ni. A chem han vai pawh a rik hian a ri fua fua thei hial a, Thanpuia pawh a inveng nasa hle mai! Chutah le, Thanpuia hian  a hun remchang liam tir mai a tum ta lo hle, hun remchangah he Seipui pasalṭha hi a dah ṭha vat a nih loh chuan  a chan a chhe ve thei tlat si! Thanpuia chu ṭhingṭhi zat in a chem a han vai ta a le, Mangvunga chem lek mek chu a ding ta zawt mai a! A  chem a thlauh a, pum chu a dawm ta vat mai a, Thanpuia chuan dinchhuah pah chuan an vai let leh zak a, Mangvunga nghawng aṭang chuan a lu chu a per ta nawlh mai le!

      Hetih mek lai hian pasalṭha Hualroa chuan Seipui leh Hriangmual tlangvalte a lo dah ṭha mial mial mai a. Serzawl lam hi mi pasarih lai nunna chan an awm a, hliam tuar pawh an tam ve hle bawk, an him kim seng bik lo a ni. Serzawl hian an awm hle hle lai a,  an lal fanu rawn rubo tute leh an chikhur rawn pawng zawnghnah nem ban ve ngawt tute chungah hian zahngaihna lan tir an ba miau lo a ni.

         Aimawia thinrim lutuk hah bawk si chuan Hriangmual lal fapa chu Pialralah a tir teuh ṭhin hle mai! Chem phek chuan a hem leh ṭhin a, chu lal tlangval chu a sen hian a sen thluah a, a duk rei rui tawh mai le! Aimawia chuan a ching chau ta takzet a, a kut za han hnawih zeuh zeuhna ṭhin lah chu bawksawp pui tham a ni hial tawh.Hetih lai hian Pasalṭha Thanchhinga te leh Hualroa ten tlangval la dam ho an dah ṭha kim ṭep a, pahnih khat erawh zuah ve ni se an ti duh chauh mai! Saisih ngaw chhung chu thisen luanna hmunah a chang zo ta, pa naran tan chuan hmuh a hrehawm viau ngei ang! Serzawl lam pasalṭha phanchang deuh ho hian Aimawia hi an dang duh hauh lo, an  Uichal ngam loh thlir ve tawp a.

       Thanpuia chuan ring deuh hlek chuan,

  " U Aimawi, i kalpui tawh ang hmiang, Zawna kha a lo ngaihtuah awm lutuk a nge!" a ti chhuak ta a.

     Chu veleh Aimawia pawh a ding chat a, Thanpuia te lam a rawn hawi a, a mitmengah chuan sar hi a zam kulh e a tih theih hial mai! Chutah thawk lawkin Hriangmual lal tlangval sam zialah chuan a man lawk a, thu tam sawi lovin Pazawna te an dahna lamah chuan a hnuk ta! Lo dang tur leh dan han tum reng an awm lo, an thlir ṭhap a, an zui ve ta hul hul a, a zuitute pawh thisen kai lo aram an awm tawh lo! Aimawia chu a pen sau pawk pawk a, a mi hnuh lai hi hnuh ral raih a chak hle a ni. A ṭhiante ho chuan an zui thuai a, an thawm chu a ring hauh lo na a, an thinlung mangang thawm erawh a ri ring hle a ni.

 
         Pasalṭha Thanpuia chuan Khuavelchhingi nena an inbiakna a dawnkir lo thei lova. A thinlungah chuan a cham nawn awn awn mai le! An lo kal chak hle a niang, Pazawna thing lukhama a lo mutna hmun chu an thleng thuai a, Pasalṭha Chhunthanga chuan ring hauh lo, zawi chuang si lo chuan,

   " Lal fanu kha hmun dangah lo awmpui lawk teh u," a ti chhuak ta.

      Pasalṭha Thanpuia awm ve duh si, Saipuii hruai hran duh bawk si chu a buai ve hle a, chu thil meuh chu Thangbawnga chuan lo hrethiam in, Saipuii chu a lo hruai hrang ta!

         Aimawia chuan leiah chuan Ngurṭhuama chu an Tangkawng hem thlawrh a le... a che chang hlei thei tawh lo! Pazawna mitmeng chu a chau ta viau mai a, Aimawia chuan thinrim takin,

     " Zawna, le i chet a hun e, pasalṭha i nih kha....heng buaina hi hmehmit tawh rawh le!" a ti chhuak ta! Thangvela chuan hnehsawh fe in Ngurṭhuama chu an pawt hnai hrawk a, Aimawia chuan Pazawna chem chu a lo humpui a, chutah Thanpuia pawh inrawlh thuaiin Ngurṭhuama chu an lo chelh a. Chu thil meuh chu hmuh a nuam lo kher mai! Pazawna u Pahlira chuan anau ṭhiante thiltih dan a hmuh chuan ahlimin, ṭhian induhsakna tawp a ni tih a chiang em em a ni. Pazawna chuan ṭhen sak sakin a hna a hlen ta, tunah zawng muangin Pialral a pan tawh ngei ang le!

       Pazawna chu a khuh leh ta bawrh bawrh a, a hmel pawh a duk ta vek hial a, a ṭhiante chu an melh kual leh hlawm a. Aimawia leh Thanpuia thinlung chhung rum ri chu bengchheng tham a ni ta....! A ṭhiante chuan an rawn ṭhut chilh vat a, Aimawia chuan lungchhe fe in,

   " Zawna....ṭang ve ta che...!"an tichhuak a, a tawp lam chu a ri chhuak mang lo hial a ni. Thanpuia leh Aimawia chuan Pazawna kut chu an chelh ran a, chutah a tawp nan ti niawm tak hian Pazawna chuan chiang fe hian a ṭhiante an melh a, a thaw zui hawk a, Pialleia meng leh ngai tawh  lo turin a chhing hlen ta!   Pialralah a rawngbawl saktu turten an lo nghak ṭhup ang a, Thlahtea te pasalṭha Selzama te ho nen hlim fe in an awm ngei ang !

       Serzawl mihrangte pawh chuan insum har an va ti tehlul em! An thinlung ṭap thawm chu bengchheng tham a ni tak zet a, mipa, mihrâng mit aṭanga luangchhuaka mawi lo chu a luang chhuak a, an khap per ta sak sak mai le ! Pasalṭha, mihrângin a tihtur dik tak midang tana a nun chu a hlan ta a, ṭhian ṭha tana a tihtheih hlu ber chu a ti ta! Serzawl tan zawng channa ropui a ni, chu mihrâng..pasalṭha patuai zet zawng nghilh ni an nei tawh ngai lovang!

   
      Hetih lai tak hian pasalṭha Bukbawnga leh a naute pawh an rawn thleng ve ta, Hriangmual lal pawh an rawn kai ngei a, an taksa lang thei lai pawh a him tam bik lo! Pasalṭha Thanchhinga chuan a lo buaipui nghal zat a, Bukbawngan Pazawna an chân ta tih a hriat chuan a lai a na vawng vawng hle, hmanhmawh fe chuan Pazawna ruang awmna lam chu a pan nghal a...Pawih ral an beih ho lai ata tawh a huaisen zia a hrechiang hle si a. Pazawna chalah chuan an dek a:

   " Nungchang mawi leh tlangval tlawmngai, Pialralah chuan pasalṭha Selzaman a lo hmuak ngei ang che....! Aw....a va pawi tehlul em, I khaw tan i tihtheih sang ber i ti si! Ropui theih tawpin kan thlah ang che...!" a sawi zo chiah chu a vanvawr zawngin a silai an hmet puak dur a. A tuarna  hle mai..! Zamkunga chuan pachang takin a rawn hnem a!

      Hetih lai hian pasalṭha Hualroa chuan tlangval lamkal tur alo tir dawn chiah a, chutah an lam hawi pah chuan Bukbawnga chuan,

   " Tlangval.... kan lal hnenah chuan Serzawl ṭhawmmawl rinawm tak chu a tliak ta! Lal fanu tan a nun hlu tak a hlan... han ti kher ang che...! " a ti a.

         Pasalṭha Thanchhinga pawh eng ruai a ni bik lo! A fapa ang maia a en, an inah pawh ngampa  fe a rawn chuangkai ṭhin Pazawna ruang chu a thlir sek mai a. A lai a na hle a, a thinlung chu buaina leh manganna chhumpui chuan a zin hnan mep mep mai! Tlangval ho chuan hlang an han siam ta a, chulai hmuna tlu ta te chu an mut khawm a. Indona hian rah ṭha a chhuah ngai lo, an cho chhuah ni lovin hnehtu zawk mah ni se an inchan nual tho si a, chu erawh indona in a kentel a ni tlat mai si!

            Thanpuia chuan Saisih ngaw chu a thlir vang vang a, chu ni chhuak rawn ṭang tak hnuaiah chuan a nghilh dup thei hial a. " I nun a mi pawimawh tak te i chan pawhin" tih Khuavelchhingi thusawi kha a hre nawn awn awn mai a, Pazawna boralna chu amah avanga thleng ani tih a hre chiang hle mai si! Khuanu hian a chungah zah a ngai a, a remruat tidang in rem ṭha zawk a ruat sak ta a, chu Khuanu remruat danglam ta chu hriat fiah loh rual a ni ta lo! A thinlung ṭap thawm erawh a khap bet zo lo ṭep a ni. Serzawli chuan rawn hnaih hret hretin Thanpuia darah a kut a rawn nghat ta a, Thanpuia chuan a lo melh zawk a, Serzawli pawh a mittui alo tling ve pam mai le! An han inmelh vawng vawng a, thu tam sawi lo chuan an thinlung chhungril lungngaihna chu an inhnem tawn sak ta!

 
          Tlangval rual chuan kal an han rem a, an  khaw tana nun hlan ta te ruang chu an zawn ta. Han ṭawng thawm hriattur a awm lo, Saipuii pawh Zamkunga kiangah kal ve in Serzawl khaw lam chu ngui takin an pan ta hnak hnak a.

         Serzawl lal Lalbulan tlangval te ka aṭanga a fanu chhanchhuah a nih thu leh Mihrang an tluk thu a hriat chuan a vaibel dawn a seh ri rap a, Hriangmual lal chunga a thinurna a sang hle a, Seipui khua pawh a chimih duh ngei ang. Lal fanu an chhanchhuah thu chu a tlang thang nghal a, Pazawna leh mi eng emaw zah an tluk thu chuan Serzawl a ti ngui nghuai mai le! Khaw tana nun hlan ta te hmuak ngei turin khaw mipuite chu kawtchhuah lam an pan ta nguah nguah a.Hriangmual lal Laltawna pawh an hnuk dawr dawr tawh mai!

        Tlangval ho chu an kal chak hle mai, Aimawia te leh Thanpuia te ho pawh chuan an ṭhiana ruang chu an zawn a,ṭawng zai han rel pawh an awm meuh lo, kawtchhuah an thleng dawn ta, chutah le Pasalṭha Bukbawnga chuan mitthi hlado ngei mai chu lungngaihna a khat thinlung zawng zawng chuan an chham ta a,

    " Ni khi e, tla rawng rawng la,

     Khua kip ngui law ka duhin e,

     Zan thim e, zing na sel law..

      Farmei e ennan kan runah e" an ti kal raih a, a chengrang rawl a au tir ta! Chu thil meuh chuan mittui a va ko chhuak nasa tehlul em!

         Kawtchhuah a lo hmuaktute  chu an khap per sak sak a, an thinlung a rum ve nasa hle mai! Lal fanu Saipuii erawh a nu nen an inhmuh veleh an inkuah chat a, an inhnit dun hlawp hlawp mai! Serzawl lal Lalbula meuh pawh a na ve hle a ni, Hriangmual lal chu a pan ta..... Chutah thu tam sawi lo chuan an beng hawi sawk a. Chu lai hmuna han dah ṭhat nghal mai chu a duh rum rum a. A insum ta hram hram zawk  a ni.

           Dan pangngai chuan mitthi te chu an thlah liam ta! Pazawna te tualah chuan Kawkvahai an phun a, thli in an chhem te chuan a ri tluar tluar a, tuman chu thil chu an thlir ning thei  lo.A thlanah lah hai theih miah lovin an hmelma te lu a tlar ṭhut a. Thanpuia leh Aimawia thinlung erawh a dam thei meuh lo a ni. Nithum lai a liam hnu chuan Seipui lam upa te pawh Remthu sawiin an rawn lang ta! Hriangmual lal pawh an chhuah tawh a, khaw han indin thar leh chu an tan a huphurhawm hle ngei ang le! Pasalṭha Chhunthanga te pawh chi teng turin an chhuak tawh a, Thangvela te pawh an khaw lam an pan ve  tawh bawk a. Pasalṭha Thanpuia lah a nun a ruak tawlh tawlh ni hian a lang a, Aimawia pawh a tla hrang nalh rih a.

        Hetih lai hian Upa Phirtuala chu che chhuak thuaiin a tupa Thangchhuahpa tan palai hna a thawk a. Ani meuh han che chhuak ta chu an rem rang hle a, amaherawh chu Ni thar lama lawi tur chuan an inbe fel ta! Hun la kal leh hlek se an duh a ni.Thanpuia pawh chuan hun thawl deuh hlek a la mamawh a ni. Saipuii lah lo inbuatsaih  ru viau  tawh a,  hun a kal muang hle in a hre hial a ni.

       Pazawna te an thlahna pawh ni tam fe a liam leh tawh a. Chu zing ni chhuak sarah chuan Kawtchhuah lungdawhah chuan thangchhuahpa  Thanpuia chu a ding vang vang a, a thinlung kawmin a phun sap a. Lungreng ngaw a pan dawn ta, Fangfar pukah chuan lo nghak rengtu an awm tawh ngei ang! Lungreng ngaw aṭanga dama a kir leh a nih ngai chuan Serzawli nen hmalam hun an chhiar dun tawh ngei ang.Amah erawh chu Khuavelchhingi nen inremna an nei tawh a, hetianga inrem tawhna hi bawhchhiat a thiang si lo. Eng thil nge a chungah thleng dawn a, nung dam hian a kir leh ang em tih chu a hre lo takzet a ni.

      Lungreng ngaw lam pan chuan a pen chhuak  ta!

      ( A TAWP TA)

  ( LUNGRENG NGÂW...ṬHEN 1 bik chu kan zo ta! Hun kal hret se, ṬHEN 2 na hi a la awm  mai thei! In phur dan a zir a ni tawh ang chu...!)