LUNGRENG NGÂW..S-4..(3)...

LUNGRENG NGÂW...SEASON-4....3..

           ( PASALṬHA THANPUIA)


               M. LUSEI PALIAN

     
            .........      ...........     ..........

       An inmelh kual rang hle a, mihrang nun zir valte chuan an hriam an lo hlat hauh lo, thawm chu a rawn hnai zel a! Chutah le an hma a kawrte ah chuan thawm chu a tawp ta hmak mai le! Zamkunga ho chuan an han inmelh kual hrak hrak hlawm a, an ngawi ṭhap mai, thawm lo chhuak  leh tur chu an ngaichang a ni ber! Thanpuia chu a ding vat a, muzuk fei chu a hum vang vang a, a mitmeng fiah kak mai chuan thawm lo chhuahna lam chu a thlir vang vang a. Sa thawm a ni lo va, huai thawm lah a ni hek lo, hringmi thawm a ni ngat mai! Ramchhuaak dang an awm em ni aw? An lam pan chuan thawm chu a rawn hnai leh ta! Thanpuia chuan uluk fe chuan a thlir a, a hmu thei ta, an riahbuk lam chu mi pakhat hian a rawn pan mek a ni. Zamkunga ho chuan an hmanrua lo chuhin an lo ding kak ṭha hlawm a, midang chuan an la hmu thei lo na a, Thanpuia chuan a hmu chiang thei hle a, thawm pawh a chhuah lui tih chiang takin a hria a ni. An lam chu a rawn hnaih hle a, aw a rawn thian ta kharh kharh a, chutah hringmi rawl ngei chuan,

   " Pu te u, ral ka ni lo ve....in hmanrua kha khawngaihin dah kiang rawh u, ka rawn chhuak dawn e!! "  a rawn ti ta a.

   Thanpuia chuan mak a ti hle mai! Thla a eng tih a hai lo, mahse thawm rawn chhuahtu awmna a la hla angreng si, a rawn hmufiah em em in a hria a ni. Mi naran chu a ni hauh lo!

     Zamkunga chuan ring fe in,

" Rawn chhuak mawlh teh, tu nge i nih, heng hengah te eng i ti chu ni maw!?" a tizui zat a.

     An lam pan chuan thawm rawn chhuahtu chu a rawn hnai ta hret hret a, Silai chu a ak na a, pangngai tak chuan riahbuk lam chu a rawn hnaih ve zel a, mei en phak chin a rawn thleng ta! Pasalṭha Thanpuia te ho chu an thlir kual thuak thuak a, a hmel an lang chiang chu  a naupan hmel hle, Zamkunga han melh vang vang pah chuan,

     " Thangvela ka ni e, Chamtlang khua Lalsaia, Saingura khua ka ni a, Serzawl khua pan tur ka ni....kawng ka bo deuh a ni e!" rawn kal hnaih zel pah chuan a ti a. A hmel fel tak sam ṭha fe mai, nula tana tawrhhar tur chi a ni. A pian a dik thlap mai a, han en reng reng pawh chuan pasalṭha huaisen fe a ni tih a hriat hle a, a thusawi chu an awih hmel loh kher mai!

  Pazawna chuan, " Chamtlang a ni.... Ni tam tak kal lah ni, nangmah mai hian maw? Serzawlah chuan eng thil nge i tih dawn!?" rang fe chuan a rawn ti a. Chu tlangval hmel ngeng ngalh mai chu an thlir a. Tlangval chuan an mahni lam chu a thlir a, Thanpuia chu an melh vang vang a, chutah rawn ṭawngchhuakin,

    " Pasalṭha Thanpuia hmu tura kal ka ni a, Serzawl ramvalh chhung ka dai lut ṭep tawh ang chu maw...!?" a ti a, a hmelah chuan zamna hmuh tur a awm hauh lo. Zamkunga ho chuan an inmelh kual ta hrak hrak hlawm mai le!

   Aimawia chuan rang fe hian, " Pasalṭha Thanpuia i ti e lo!? Eng thu hla nge ni, nangmah maia chu chen chen i rawn kal tak le...! Serzawl ramvalh chin chu i rawn dai tawh e" a ti zui zat a.

     Thanpuia chuan chu tlangval han chet dan chu a thlir uluk hle a, mi hlauhawm a nih erawh a ring hauh lo! Chamtlang lam aṭanga chu chen chen rawn kal ta chu thu pawimawh tak a ni phawt ang. Thanpuia chuan an melh vang vang a, chu tlangval Thangvela inti pawh chuan a thlir uluk hle hlawm mai! Rawn ṭawngchhuak ve lehin,

   " Ni e, han biak lawk ka duh mai a ni e, saw lai deuhah sawn riah ka tum zet na a, thing ah lawnin khua kan thlir a, in mei eng ka hmu ta si a, ka rawn pan thawr mai che u a ni e. A...hei in ramchhuak em ni, inva hlawhtling tawh awm ve le..?" a ti zui zat a.

       Zamkunga chuan Thangvela chu an melh vang vang a, " Tlangval, han ṭhu hahdam ve phawt teh, zanriah te i bar tawh em..?hei Pasalṭha Thanpuia chu kan zingah hian a tel ve reng a nia!" a tichhuak ta a. Thangvela pawh chuan Thanpuia chu a melh nghal thuai a, lusei  pasalṭha te pahnih chu an in melh vang vang mai le! Riahbuk tualah chuan iptepui nghatin a ṭhu ve ta a, han en mai pawh chuan sakawl pian ṭha ang mai hi ani a. A hawiher pawh a dik hle reng a ni. Chamtlang tlangval chu a rawn hawichhuak a,

   " A va tihzia lehzel e aw,  aw bar tawh e, Serzawl khua te innih chuan ka thla a ngam huai tawh e. Pasalṭha Thanpuia chu ka be fal thei em ang chu maw!? Karkawngah ka rawn thang rei phian tawh a! " a ti chhuak ve leh a.

    Zamkunga ho chuan Thanpuia chu an melh ṭhap hlawm a, Thanpuia pawh chuan Thangvela chu a melh vang vang a. Aimawia erawh a ngaih dan a nih loh hmel hle mai, a fei hum chu a la thlah hauh lo! Thanpuia chuan,

  " E....rem tehreng e, a pawimawh hle aniang chu maw? Ti rawh le,...!! " tih pah chuan pen chhuak nghal a. Chu Chamtlang tlangval Thangvela pawh rawn ding nghalin a iptepui leh Silai pawh la lem chuan Thanpuia chu a zui nghal zat a.  Aimawia chuan han melh liam pah chuan,

  " Kha tlangval kha mi satliah a ni hauh lo, a huaisen hle ang tih ka hria, Chamtlang khua aṭanga helai thleng thleng rawn kal ta chu aw...!" a ti chhuak a.

   Zamkunga pawh chuan, " A pawimawh hle turah ngai ang!" tih pah chuan Thanpuia te chu a thlir liam ta  ṭhak mai a.

           ..........    .........     ...........


       Seipui lal Darpuilala chuan thinrim fe hian,

  " Serzawl lal Lalbula chuan ' Seipui khumtu Lalbula ka ni e' tiin zai hla a sa ngei a maw!? A pasalṭha Thanpuia thu hla lah chuan Kan pasalṭha ngeng a chhun viau mai si, he thu hi a dik ngut a maw!?" thinrim insum fe a ti chuan Thatphunga te ho chu an melh kual a. A vaibel a fawp ri hrawih hrawih tawh mai!

    Chutah le Zaluta, Lut khabe sep thiama chuan, "Lalber, a dik vek e, heng thil zawng zawng hi kan lal fapa Ngurṭhuama va zin lai ngei a thleng vek lah ni! An pasalṭha chuan kan lal fapa pawh Zawlbukah a duh lo chung a lo bin ani awm e, thinrim rilru na takin asin an rawn kir ni! Kei, ka lainat pui riau a. Tin, in pasalṭha a nau na ṭawngkam tak hi na ka tihpui a, kan lal fapa Ngurṭhuama phei chuan a la na hle a, tunah pawh hian amah ngei rawn kal a duh hle na a, a sil awng rih a ni e!" an ti thupui vei khuk chu...Seipui lal ina awm ho chu an thum ta hak mai!

       Seipui lal Darpuilala chu a ding chhuak thut a, a vaibel a pak par chuai a...a rum ta nghat mai le! Chhuat lam chu a bih ngur a, mahse han thlir chiang hmel erawh  a pu hauh lo thung, a upa te lah pasalṭhate an melh kual a,

    " Kan Bula chu a lo lian ta hle a ni maw!? A chikhur neih a chhuang ṭan hle ta mai.... Tlangvalte lo inralring se, chi teng tur anga chhuakin va nek u la, a ṭul leh leido kan nei mai tur lah ni!" a ti ta khur khur mai le!

     Chutah tak chuan Zaluta chuan inrawlh hun ṭha nia hria in rang fe chuan,

   " Lalpa, kan Lalfapa pawh a tel leh duh ngat ang, a lai kha a na em a, in phal leh in tlangvalte chu kan lo fin ve a nge!" inthlahrun hmel fe uicho hauh zawh hlim ang maia ṭit hmel fe chuan an ti ve leh a. Darpuilala chuan han melh lehin,

    " Hriangmual chu lo inring ve se ti nia, kan pasalṭhate an duh hunah chhuak se, a ṭul chuan ral lu rawn khai ngei  rawh se, duhtawk ang!" tih hmuk pah chuan a ṭhu ta a.
An belpui a zupui eng kak mai chu Haileng no chuan an khiat zui a.

      Zaluta chuan an lal fapa tirhna chu a hlen hle mai, heti a nih ngat chuan Seipui leh Hriangmual chuan Serzawl an nawr ngei dawn e. A ni lahin dinchhuah pui tham lawih hamṭhatna a tel dawn thung a, a lawm hle mai! A thu thlen han pawi tur zia leh anghawng nat dan tur hi hre ngat se chuan a pau ve lo tawp ngei ang le! Seipui lal inah chuan rei tak awm tawh lovin pasalṭha Ralkapa te inlamah chuan an let ta a. An chhuah hun tur an rel dawn ta a ni.

       Seipui lal Darpuilala hian Serzawl lal Lalbula khawsak tak dan chu mak a ti hle mai! Han awih lo dawn ngawt se, Hriangmual lal fapa beng hriata phuhchhuak ngei a nih hmel si! Hriangmual lal fapa meuh Zawlbuka pasalṭha in zak taka alo siam te phei chu mak a tiin a thinrim thar hle a. A zupui chuan a fan nghet telh telh a, a thinrim telh telh mai le! Serzawl khua chimih chu a duh ta rum rum mai.....An chikhur neih an chhuang hle  chuan a hria a ni.

        Seipui pasalṭha Ralkapa te inah chuan ropui an han rel a, Thatphunga chuan va run tura thawkchhuak an la nih chiah  loh avang chuan tlangval sawm ṭha chauh hruai ṭha a ti a. Tin, Hriangmual in an belh dawn phei chuan an ṭhahnem hle tho dawn a ni. Ṭul lai a ni lo bawk a, a tuk maia thawhchhuah an tum ta a. Heng pasalṭha te hian Serzawl khua chu muvanlai khaw chuana chuanin a ṭul leh milu khai haw an tum dawn a ni. An Lal thurawn ang chuan chi teng tur ang chuan an chhuak dawn a ni.

      ........     .........    ..........

       Thanpuia thui fe a kal hnu chuan hmun nuam lai deuh, thla eng zam in a rawn chhunna laiah a ding ta a, lehhawiin Thangvela chu an melh a. Ṭawngchhuak zui nghalin, 

     " Thangvela maw i hming kha... Vela han sawi ta poh che, eng tianga pawimawh nge a nih chu le...hei chen chen i rawn kal tawh bawk a!" pangngai fe chuan a ti a. A inring ru hle tho mai!
   
      Thangvela chuan  aw an thian leh te te a,

 " Aw ni e, han sawi ṭanna tur pawh  thiam a har hle mai, harsatna khirh fe ka hmachhawn mek a... ka ṭhiannu in nangmah rawn hmu tur che in min rawn tir ta a ni. A tawi zawngin sawi ta ila i puk hmuh chhuah....kha pukah ngei khan he buaina chinfel theih dan a awm a ni.  Min rawn pui tur chuan ka sawm ngam hauh lo che a, mahse kan dinhmun a khirh hle chu a ni.....!


   
  .( chhunzawm tur)