LUNGRENG NGÂW..S-4..(2)..

LUNGRENG NGÂW...SEASON-4....2....

           ( PASALṬHA THANPUIA)

               M. LUSEI PALIAN

       

             .........      ...........     ..........

       

           Seipui ropuina khum tur an awm thei hian a ring lova, tin, Serzawl thangchhuah pa thusawi nia an rawn thlen chuan a lai a ti na ngang mai le! A pasalṭha zia lo hle chuan a hria a, amah ngei chuan Serzawl khuaa va tlawm chu a tum ta...! An mi rin em em a naute, khawi lo kala a hruai ṭhin te chu rang fe in a lam khawm tir ta nghal a! Serzawl pan dan tur an rel dawn ta! Ralkapa Seipui khaw pasalṭha hi huaisen leh rorum tak a ni a, inmal beih thiam em em a ni. Chhak pawih do hian an kal ve lova, a han kal ho hming ṭha ta phian khan a beng a hawlh hle kha a nia, tunah a hming chherna tur awm dawn ta in a hria a. A phur surh surh hle mai, Hriangmual khabe sep sual ngai lo Zaluta hian ' Serzawl thangchhuahpa Pasalṭha Thanpuian a nau thu leh inmal beihpui a chak zia' an hriat meuh kha chuan tlan vang vang a duh hial a. Pawih ral an han do vanga hming ṭha viau pasalṭha ṭawng duh danah chuan a lawm lo hle a ni.  A ṭhui hruaite an lo thleng a, an thu hriat an han chai ho meuh zawngin an thu a rum tlang hle mai le! A mi rin tak Thatphunga chuan Lal hnena thuphung thlen hmasak ṭha a tih thu an pau pui ve a, awm an ti tlang hle chu a ni. 

       Seipui Lal hi Darpuilala a ni a, In za nufa khuaa inchhal niin lian an inti hle a. Darpuilala hian Serzawl rawn hmingthang ta thut kha a helh ve hle tho kha a ni. Zan lam zanriah bar zawha  lal in chuangkai tur chuan  Thatphunga te ho an inthlah ta hlawm a. Zaluta te ṭhian thum chu Ralkapa te inah chuan an thleng zui nghal a, Ralkapa hian hmundang pan buai lo turin a ti a ni. Pasalṭha ina thleng an ni bawk a, chawhmeh lam pawh an nei ṭha hle reng a, Sanghal thau chhoh hun a ni tawh bawk nen, Sanghal rep an lo chhum paw chiai mai chu Zaluta te ṭhian ho chuan an ei hnem hle a ni. Sanghal sarep a tui tawka an thur thlak, a tui mawm hmak mai duhtawka an han ei meuh chuan mitthi te hi an hlep vawng vawng zel mai a ni. Zalutan thu a vaivir hneh bawk a, Ralkapa lai a dam thei mawlh lo, Pawih ral um avanga hming chherna pasalṭha naupangte chu zirtirna pek hlak a tumruh hle a ni. 

        Zanriah eikham  meuh chuan Thatphunga te ho pawh an rawn lawr hma hle hlawm a, Zawlbuka kai hmasa turin an chhuak ta hlawm a. Seipui pasalṭha thlazar hnuaiah a huaisenna va inzar ṭawm tuma ṭawng hmang thiam taka va fuihpawrh an ni bawk a, an tlatlum nghal hle a ni. Zawlbuka mawi tawk an ṭhut hnu chuan Seipui lal in lam chu an pan tlang ta ṭham ṭham mai le! Seipui Lal Darpuilala Inah chuan pasalṭha Ralkapa chuan lawi luh an dil te te a, lalnu chuan lo chhawn vatin an han lawilut ta a, Seipui lal chuan a pasalṭha te chu a rawn thlek vung vung a. Thu pawimawh tak an rawn ken a ring hle a ni.

               .......   ........   .........

          Chhirbi mual hmun nuam lai, kawrte kamah chuan Serzawl mihrangte chuan riahbuk an han sa ta a. Tlangval chak ṭhe ṭhaw an ni bawk a, Zamkunga chu an zinga upa ber nih manah  sa therhlo zawngin an vah tir thung a, an buai hle hlawm a. Sam fe hian zan hnih khat riahna tur buk chu an khawr pum nghal a, zan lama tuah tur thingro te an pu khawm ta zung zung a. An riahbuk sakna hi a hmun in a zir bawk a, a nuam an ti hle mai! Mei han chhem hluahin a khu chuan chulai ram vel chu an han ur thiang a. Riahbuk thing an ngah ta tih chuan vaibel te zu in an han ṭhu chawl a, chutih lai tak chuan Khiangzawl ram lama silai puak thawm an hre ta! An rin ai daih chuan Silai rikna chu a hnai a, Zamkunga rawl ngei chuan heti hian kal raihin hlado a rawn chham ta,

  " Val rual e, kan kalah khan e,

     Zingah khuanu a ṭap ai law,

     Bahsam e, hniar kai le maw,

     Len niin e, val maw ka than hi le....!" 

     Chu veleh Hlado rawl rawn rikna lam pan chuan Thanpuia te ṭhian ho chu an liam ta nghal a, an rinaiin an kawng zawh pawh a mar phian thui vak lo an kal hnu chuan  Zamkunga leh a sanghal kah chu an va hmu ta! An hlim ta kher mai, chu Nghalpui lah chu a lian phian mai a, Aimawia chuan an thlek vung vung a, 

  " A mit a del chu a ni em lo maw? Zawna, Thana han chian teh u. Ka awih lo tawp mai!" an tih chuan le, an ri huk hlawm a. 

   Zamkunga chuan rang fe hian, " Ramvachal te hi chuan chang kan han tum raih a, sa te chu an lokal zut zut mai maw le!" tia a chhan ve meuh chuan Aimawia leh Thanpuia chuan hriatchhuah an nei rang hle mai! An lo khi vei suk a.

    Pazawna chuan, " Riahbuk a hla lem lo bawk a, kan zawn thleng theiin ka ring tlat....Thingtuai kan sat a nge!" tih pah chuan a inher vut a, hlam thum awm vel a mi Khiangtuai mar zet hi a sat zui nghal a. Thanpuia chuan hrui alo chhat ve thung a, Sanghal ke a phuar mawlh mawlh in, a zawh meuh chuan zawn tur chuan an inpeih ta! Aimawia leh Zamkunga hma lamah an ṭang a, a lo rit phian mai! Kawngchhuk deuh hlekah chuan Pazawna chuan an nawr lui sak ṭhin a, Aimawia chu a rum deuh nghat zel  chu a ni. Hmuam da hun chhung vel an kal hnu chuan Riahbuk an thleng ta,  Aimawia chuan an thingtum ro nghah vei sawk a.Pazawna leh Thanpuia han melh pah chuan, 

  " Ṭhian ṭha chu ni lo ula chuan...!" a ti deuh nghat a, a chhunzawm duh ta lova. An nui leh ta hak mai! Changel hnah sat zung zungin an sa chu an han chan ta a. Zamkunga chuan Tul tur a lo suih thung a, an buai tlang hlawm hle a, an phe vat vat  mai a ni. Aimawia chu an hawi vual vual a, 

  " Thana....ka bel ken kha min nuihzat ti raw?" a ti chhuak leh khuk a. Amah lah chu a nui duh der si lo, Thanpuia lah chuan sam fe hian, 

   " Zawna a niang, ka nuih awm pawh ka hre lo ka ti!" a lo ti zui a, chutah meuh zawng an nui tlang ta dar dar mai le! 

   Zamkunga chuan, " Ka tleirawl hruaite ho hi inlo tlangval ve ta nek mai, ka thu in awih ngat chuan lawmnu te delh dan ka hrilh mawlh ang che u...!" a rawn tichhuak a, chutah le....rang fe hian Aimawia chuan,

  " U Zama hian a hria a nia, hre deuh mai a nia...han ngaihtuah u la, ruah thimpui khalh zat hian kum tin....!" an ti hman chauh a, chung pasalṭha nun zir valte chu an nui zo ta. Chhirbi mual mawng khiangzawl hnaih lamah meuh zawng an nui thawm chu a thang  khawk thei hial a ni.  

       Khaw thim hma deuh chuan an chan zo ta! Pazawna chu an hawi kual a,

   " Khaw thim hma....khaileng leh Beai hi kan tlar lawk a nge aw....! Ramvak sa...chhum chhungin...!" an ti ve deuh kher a, a liam zui ta. 

      An sa channa Changel hnah han thenfai pah chuan Aimawia chuan chhawlthawh hlado an chham a, uluk taka thianfaiin an hnu chu an han thian a. An sa te pawh an rap siamah chuan an hlang kai ta! Aimawia zawng zanriah buatsaih pahin a zai leh lung lung tawh a, a hlim tih chu a hriat hle a ni. Sanghal kawchhung leh sa tui lai chu a bel lian kenah chuan an so nghawr tir barh barh a, a rim a tui ṭan hle tawh mai! Unau hmel hai velah chuan Pazawna pawh rawn kirin Tarlilu a rawn pu a, Tarpilu hi a zawng thiam viau ṭhin reng a ni. 

       Meipui an han chhep a,Zanriah an buatsaih ta, Zamkunga bar hun chu an nghak  ṭhap a, Zamkunga pawh chuan hrethiamin chaw an bar a, satui mawm hmak chu an hawp ri hrawi a,  zanriah an han kil meuh chu le, an chawlak a na hlawm hle mai! An hma zawn a kaw chak leh hle hlawm a, Pazawna leh Thanpuia pawh an ṭang hle ni tur a ni, ṭawng zai an rel thei lo a chha a ni e.  

            .......   ........  ........

        Seifate tana hun bi hriltu leh a mawina chhuahsaktu van lam mawina Chhawrthlapui chuan Serzawl khua chu a ngaih la tawk lek hian a chhun eng riai a. Lal fanu Saipuii chu luhkasangah an ding vang vang a, chu zan thiang taka Siar indi te chu a thik ṭan rum rum tawh mai! Ramvachal te hi chuan ram lam hi an ngaina em em si a, khawchhunga an awm lahin zan tin an rawn chuangkai thei bik hauh si lo! Thinlunga riak rengte ṭuanna mual apiang hi an bengverh mai ṭhin a lo ni! Eng tin hun hmang ve ang maw tih dawn chung hian hunbi hi an hmang liam zel mai zawng a ni.  

    Saipuii inchhung a dai luh chuan a nu chuan a bula ṭhu turin alo hui vat a, nufing chuan an fate awm dan tur leh nawmsakna tur thui tak an dawn pui ṭhin a. Serzawl lalnu pawh chuan a fanu chu thupui sawi pui a tum ta! An khaw daingul nen hian sawisep tam hma a thupui vaipui an ngai takzet in a hria a, lalnu hian sawipui a duh viau ṭhin na a, hun remchang a hmu mai ṭhin lo a ni. A dik reng mai, lal in hi zawng thu eng kim luhna a ni miau si. Lalnu hian a fanu hi duhhau paha zilh ruk a tum a ni.Zawi sap chuan an nufa chuan an titi ta keuh keuh mai! 

          .......    .......   .......

      Chu zan thla eng zamin chhirbi ngaw a rawn khawh lut raih mai chuan mihrangte thinlung chu a ruk tak chuan a sawi ve hle mai a.Thanpuia pawh a iptepui ak in inthiar chhuanlamin ngaw hnuai lam a pan ta! Zamkunga ho chuan sarep an ur a, zanriah an duhthawh hlawm a ni, an inthiar ta  sek hlawm  mai! Thanpuia chuan a ṭhiante thawm hriat phak loh chin a thlen chuan a iptepuia a lungmawi, lasi nula hmel ṭha lui eltiang pek ngei mai kha an lek chhuak a, chutah le..a hnung lam aṭang chuan ke pen  thawm a hre ta, rang tak chuan an leh hawi a, mahse Chawngmawii a ni ta hauh lo mai le..! 

     Lasi nulaah pawh a duhawm berte zing a mi, an lalnu Chawngtinleri nau chu an rawn pen var ta hai hai mai le. Chu nula hmel ṭhat zia leh a khuavang chhinchhiah han awmna fuh em em zia  te chu Serzawl khua a phunchiar ber leh thil sawisel hrat ber Rengphunchiara pawhin sawisel tur lai a hre hauh lovang le! Chu lasi nula chu lo hnai zelin pasalṭha Thanpuia chu an melh a, a mitmeng te lah chuan zawlaidi an pai tel hial niin a lang! Thanpuia chuan han sawi mai tur a hre hauh lo, hmuam ṭun chuan a dang der a ni ber e. Chutah Lasi nula chu a ṭawngchhuak hmasa ta ...

   " Pasalṭha, a pawi ka ti khawp mai! Chawngmawii chu chhim tawpah ka u in a tir chhuak a, i mi kohna kha ka rawn chhang ta mai a ni, i tum loh tak ka rawn chhuak erawh a pawi ka ti....!" a awka chhuak mawlh mai chuan zun han nei hial a, hei kher zawng a fuh em a ni. 

     Pasalṭha meuh pawh a intipachang vei ngial a, a aw an thian te te a, 

  " I rawn lang hrim hrim chu ka lawm e, ka lawm tak tak e....Aaa...ṭhu teh!" a ti bah ta nak mai! Hetiang nula hmel ṭha hmaah meuh chuan pasalṭha thangchhuahpa pawh a ṭawng fuh thei bik lo a ni e. 

      Chu lasi nula ṭhat famkimna sawi fiah senlohi chu a tawrhhar zawng hian  an nui har har a, a ṭhatna chuan lui kawisarih a en thei hial ngei ang a, a nui ri te chuan lung hi a dum hliah hliah mai a ni. Pasalṭha Thanpuia chu an melh a, 

    " Lungreng ngâw ah khan kan tan huaisen takin  i ding tawh a, kan ngaihsak em em reng che a ni pasalṭha....! Hei i tana mi pawimawh tak i chan a, i tuar  hle tih pawh kan lo hria a, pawi kan ti hle mai! Tunah zawng lungdamin awm la... i tan chuan kan ran vulhte hi phal takin kan hlan ang che...!" a ti chhuak ta! Pasalṭha Thanpuia pawh a thu hriat chuan a tilawm hle mai! A lawm hle tih chu a hmelah a lang chhuak a, chu nula bula lawmthu han sawi mai dan tur erawh a haihchham takzet a ni. Chawngtinleri nau chu an melh leh dek dek a, 

     " Ka lawm e...lawmthu han sawi mai pawh ka thiam lo a ni!" tih pah chuan an melh nawn leh sak a. Chawngtinleri nau hmelṭha-i chuan hmel hlim tak chuan, 

     " Pasalṭha, i bula awm a nuam hle mai! Naktukah Khiangzawl ramah chuan va vak ang che, Nghalphusen lian tak i kap dawn nia, mahse fimkhur hle ang che aw.... ka ṭinsan rih ang che aw...!" a tichhuak ta a. Pasalṭha Thanpuia hian chu nula bula han awm chu nuam a ti hle na a, a rilru erawh a inthiam meuh lo a ni. Lasi nula chuan nui sang chungin a liamsan ta a. 

        Thanpuia inthiar chu rei an ti hle na a, a ṭhiante chuan an sawichhuak lem lova, an sarep chu an ur tluk tluk mai a ni. Titi chho lehin an hlim hle a ni, Thanpuia an let meuh chuan Pazawna chuan rang fe hian, 

   " Kan rawn zawng hman ṭep che asin! Lunglen hi i va la na sawt ve, han sawi mai tur lah ni! " tih pah chuan an khuh vawih tuar a le... 

     Aimawia chuan rang fe hian, " Eh.... Zawna...han insum ve la ti nia!" a ti chhuak a. Chutihlai tak chuan a hma aia ring fe chuan Pazawna mawng chu ar ang a khuang lehnghal zat mai, ring fe chuan an nui a, an ṭin hak nghe nghe a. An han ṭhutkhawm leh lai tak chuan an lam rawn pan thawm an hre ta tlat mai...! An inmelh kual rang hle a, mihrang nun zir valte chuan an hriam an lo hlat hauh lo, thawm chu a rawn hnai zel a! Chutah le....! 

     

   

( chhunzawm tur)