LUNGRENG NGÂW..S-3...(34)...

LUNGRENG NGÂW...S-3...34 . ..

           ( PASALṬHA THANPUIA)


                  M.Lusei Palian

              ........    .........    ...........

      Chutih lai tak chuan silai rawn puak leh dawtin Pasalṭha Selzama.....thangchhuahpa mi leh sa a zam ngai lo chu a thinglubul tluk ve ta dawp mai le......!  Pasalṭha Thanpuia chu ring fe chuan a ṭe chhuak a! A lim hian a lim phei tawh a, a hnungah Aimawia te ho an rawn tlan ve mek a, pasalṭha Selzama tlu ta pawh an rawn hmu hman kha a ni.Rodawla pawh tun ṭum chu a rawn tlan chak ve hle mai! Pasalṭha Chhunthanga leh Thanpuia chuan Pasalṭha Selzama tlukna an va thleng a, an han enchian chuan a awmah tak ngenmu a lo dawng a, damchhuah pui theih chi a nih hmel loh hle mai! Ngenmu lah chu a tlang ni hian alang a, duh anga han lehkual ngam ni hek lo le, a khuh bawrh bawrh a, a ka leh a hnar aṭang chuan thisen a rawn chhuak ta! Pasalṭha Thanpuia mitmeng chu a sen hian a sen rum a, a uar pa chuan sar azam e an tih tur hi a ni ta! Pasalṭha Selzama chuan thei leh thei lo hian pawih ral awmna lam chu a kawk ngawt a. Pasalṭha Thanpuia leh Pasalṭha Chhunthanga chu an han inmelh a, Pasalṭha Hrangkhuma te pawh an rawn thleng ve ta!

       Pasalṭha Thanpuia thinrimna chu a so hian a so tawh a, meng sen ram chuan a ding chhuak a, chutah tlangval lam chu a melh ring takin,

  " Pakhat te mah zuah loh tur....an vaiin chimih barh tur, a ṭul chen chen kan um ang!Hma kan hruai ang e" tih pah chuan a chempui a hum a, fei lek chhuak bawkin pawih ral tawmna ṭhang pik lamah chuan rang takin a tlan phei nghal a, Darphawa tlakna chu a melh zeuh hman ṭawk a. Pasalṭha Chhunthanga chuan pasalṭha Hrangkhuma melh in, " Darphawa lo buaipui r'u" a ti a, rang taka inherin tlangval ho nen  chuan  Thanpuia chu an  um zui nghal a.

        Pawih ral lam pawh an talbuai ta, an tlan hah nen silai sawhna hun an nei tawh bik lo! An lam pan chuan lusei tlangval huaisen tak tak an rawn tlan phei ta! An milu lak chem an lo phawrh sap sap a, chulai ṭhangpik hmunah chuan an innuai dawn ta a ni. Thanpuia lim phei ta kha, Sechal kawlh tawh laklawh tum neia tlan ang mai hi a ni a.Pawih val pakhat lo ding chhuak chu a fei chuan an khawh a, a thahrui zawng zawng bakah thinrimna nena khawhchhuak a ni bawk a, a khawh fuh chiang hle a, chu pawih val bakah a hnung a mi pawh a thil phei tel hial a ni. Pawih ral ho tawmnaah a zuang lut ta, a kut veilamin milu lak chem a hum a, a kut ding lamin Huaitawna chem pek a hum bawk a, a duhthalin ven thawn nei hauh lovin a chempui an vai ta tak tak a le, pui tak a ni pui tak.... pawih ral ho chu an darh chum chum thei hial a, an taksa bung hrang hrang pawh a leng chum chum thei hial mai.... Pasalṭha Chhunthanga leh Aimawia te ho an rawn thleng zui nghal a, an ni pawh nasa tak an ni.  Hetih lai mek hian tlangval ṭhenkhatin pasalṭha Selzama an lo buaipui laih laih a, ngenmu luhna chu a mah chuan alo hup bet a, an lo bial laih mai le...!  Pawih ral pathum chiah ding thei an awm ta, Hrangchin leh Thangchem pawh an la tel a. Pasalṭha Thanpuia chuan Hrangchin chu a pan nghal nalh a,

  " Pawih mawnghang pa, i tawpna ni a thleng dawn ta, pialralah ka rawng i bawl ang, i thil tih pawizia hi i hre dawn chauh..!" thinrim fe a ti chuan an insiam rem a. A mitmeng phei chu a rapawm thei hial a, Hrangchin pawh chuan a melh rei ngam meuh lo.... !

  Hrangchin chuan, " Lusei valte hian a sawi chauh hi em ni inthiam, tlangval lo hnai teh...i lu ka la khawp ang!"  a lo la ti ve chhar chhar mai. Chhaih thinrim a chet buai tir a tum ve hle mai le!

     Hetih lai hian Aimawia leh tlangval pakhat an lo inhmachhawn mek a, pasalṭha Chhunthanga chuan Thangchem chu a lo pan mek bawk a. Innuaina ropui a thleng dawn ta!

     Hrangchin chuan pasalṭha Thanpuia hnaih pah chuan an zuang vakin a milu lak chem an vai vak a, Thanpuia chuan a kut veilam a a chem humin sam fe hian a lo dang a, an intia dun bawk a an hmuhnawm hle mai, Thanpuia  chuan inher pahin a chem phek chuan Hrangchin hnung zang a hem ri thlawk mai le.... a ṭe ṭhawt hial a. Rawn insiam rem lehin Thanpuia chu an nawr let ve tak tak a, Thanpuia pawh a vai fuh teuh ṭhin kher mai! Pawih val rawn hruaitu pasalṭha hi a namai bik lo a ni. Pasalṭha Thanpuia chu an che ve leh tak tak a, a chem han vai chhuah te chu a dik hian a dik thlarh a, kut khinghnih a hmang thei chuan a chungnun tir zel chu a ni. Hrangchin lo indang chu a kut lehlama a chem hum chuan a hliam hman ta  zel  mai! Hrangchin zawng thisenin a bual ta! Na lutuk phei chuan ala hliam lo!  Thanpuia chuan a milu lak chem chu a bulah a vawm bur ta! An chetna hmun chu a pet hian a pe vuk a...Hrangchina chu an melh a,

   " Pawiha, Pawih mawnghangpa...ṭang ve deuh ta che.... chuti maiin i nunna ka la dawn lo!" a ti ṭeng chhak a. A thinrimna a thuah hnih em a ni, he pawih pa hi a hleh a hleh ral vek a duh hial a ni.

       Hrangchin pawh rawn hawi thi sungin,
" Lusei dawihzep ho... ka tlawm ngai lovang, keimah Hrangchina, Hrangchin bengpeha ka ni ngai e...!" a la ti ve chhar chhar a.

    Hetih lai hian Aimawia chuan a tumpuipa chu a chem khak per sakin a awmah chem phekin a hem sak a, a chem dah thla in a rem lai laiah na fe fe hian a lo tum zawt zawt a. A lunga awi thei bik lo, an hruaitu pasalṭha an lo kap a tin ni! Aimawia han chhaih kualpa chuan nunna reng a nei tawh lo, Aimawian an Savawm mai chum tak tak mai chu...tawrh chhuah zawh rual a ni lo. Aimawia lah chuan la duhtawk hek lo, a la ri mial mial a, Rodawla chuan inla vengva fe a lo dan a tum ve a, Aimawia chuan khua hmu hek lo, na fe hian a lo bin zui dawp a, hmelma lam emaw ati ni!  Rodawla tla leh chuan pawih ral chem thlauh lo la tung va  chu a ban ah an tai thla a le   a ruh khawih telin a ri rap mai a...a ṭe rawng rawng mai! Hei ngat zawng, a pangngai loh pui rei ngawt ta ve ang le...!

      Pasalṭha Chhunthanga pawh chuan Thangchem chu a chhaih buai hle mai, a che hlei thei tawh lo. He Thangchem tan hian pasalṭha Chhunthanga zawng a khirh mah mah a ni, pasalṭha Chhunthangan a khup kawiah an kik sak a, rum fe a melh pah chuan zawhna hrang hrangan zawt a. A chhan ṭhat loh chuan a kik leh hmiah zel, a duhang chhanna a hmuh kim chuan a samzialah a ṭham a, pasalṭha Selzama lam a pan pui ta. Pasalṭha Chhunthanga hian a samah a ṭham kang phei a ni ber zawk a, pasalṭha Selzama hian a hnuk chah sak se, pialralah a rawngbawl sak se a duh a ni.

         Pasalṭha Thanpuia chuan Hrangchin, chin bengbeha chu an nuai leh ta tak tak a le...a tawm tawk tawk a, Hrangchin a inveng zo ta lo, a darah chuan Thanpuia chem chu a inthiat ta vah mai le... Hrangchina pawh a changel  awn riai riai a, a tlu thum ta dup mai! Thanpuia bulah chuan Pazawna rawn ding vatin,

   " Pasalṭha Selzaman a hnuk chat rawh se...Thana...Thana...!" tih pahin Thanpuia mitmeng sen rum chu a va sawi a. Thanpuia pawh chuan Pazawna thusawi chu a hrechiang ngang mai! Han thaw ve hawk hawkin Hrangchin chu a pan a, a puanvenah leh a chhip ah khaiin pasalṭha Selzama lam chu a pan phei pui ta! Hrangchin pawh a ṭe phei rawng rawng tawh a. Pasalṭha Selzama bul an va thleng chu... Pasalṭha Chhunthanga chuan pasalṭha Selzama kuta chem lo hum puiin Thangchem an lo dah ṭha mek a. Chutah Thanpuia chuan Hrangchin an dawm bet ve leh a, pasalṭha Chhunthanga chuan Selzama kut chu dawmpui zelin an dah ṭha fel ta! Pialralah Pasalṭha Selzama rawng an bawl ngei ang le...!

       Pasalṭha Selzama pawh harsa ti takin a nui ve suk a, a khuh leh ta, Thanpuia chu an melh vang vang a, a ni pawh a kun hniam thuai a, Pasalṭha Selzama chu harsa ti fe hian a ṭawngchhuak a,

  " Thana...thang....chhuahpa...( an khuh leh rih a) tunah zawng..... Serzawl....hi....m....himna.....i kut.....i kutah....a awm ta....! Hmei....hmei...thai....Za...Zaii.....kha....lo ....en ......chhawm.....dawl ...la.....  ka....ka... hun...a....thleng.....e..!" a nui lui a, a khuh bawrh bawrh a,  Pialral lamtluang a pan ta! Pasalṭha Thanpuia pawh a insum thei lo... a pa ang maia a en ṭhin Pasalṭha Selzama chu a pawm bet ngawt ngawt a. Pasalṭha mit aṭanga chhuaka mawi lo chu aluang chhuak a, a khap per ve sak sak mai le!

      Pasalṭha nungchang mawi leh himna hlu ber, pasalṭha hote zah kai em em, hotu nih tlin em em mai chu a liam ta maw! Fapa a nei si lo....! Chutah Thlahtea nu hmeithai Zaiin a bel a, tunah zawng eng tin nge an awm tak ang le...! Pasalṭha Thanpuia thinlung chhunga ṭap thawm chu au chhuah pui chakawm khawp a ring a ni. Aimawia leh Pazawna te biangah pawh chuan mipa mit aṭanga chhuaka mawi lo chu a luang ve tho mai le!

         Pasalṭha Hrangkhuma te chuan Darphawa chu a tlakna li aṭangin an lo la chhuak tawh a, a ni meuh zawng a thihna a tui dul em a ni! Bawkmual val rualte an ngui hle mai, an Darphaw a liam ta! He Darphawa meuh hi chuan Pialral kawtchhuaha Pawla pawh an han tudai ngei ang le! Bawkmual tan pawh channa nasa tak ava ni tehlul em!Darphawa leh pasalṭha Selzama ruang chu zah takin an han en a, sawi tur an hre meuh lo a ni. Pasalṭha Chhunthanga chuan,

 " Kha Thangchem inti sawi dan khan an ni ho chauh hi an ni awm e, an lal te thu lova rawn rammu an ni tih kha a pha hauh lo va. Heti hi kan ni ta si....ro han neih dan tur hriat thiam ava har ve le...!" a ti chhuak ta a.

      Pasalṭha Hrangkhuma te lam pawh an lo ngui ve hle mai le! Rodawla lah a dang var pap a, tlangvalten a ban hliam an lo tuam sak mek a, a ban dinglam a la ni zui nen, a ṭhen a ṭhen mai le!  Pasalṭha Chhunthanga chuan Thanpuia bula han kun hniam pah chuan a hriat tawk lek chuan,

    " Pasalṭha....ro han nei rawh le, ral tam tak kan that a, kan mang tak vek hi... inti pachang teh...i naute an hrilh hai lutuk dawn e. Puitling taka i awm a ngai a nia!" a ti a.
   
     Pasalṭha Thanpuia hian Pasalṭha Selzama ruang chu a la ṭhutpui reng a, pasalṭha Chhunthanga han melh chung chuan a ding chhuak ta! Tihian thu a sawi ta....

    " Pasalṭha Selzama ruang hi Serzawl kan thlen ngei tur a ni, hlang han siam ula... karkawngah kan chawl lovang,ral lu kha a tam thei ang ber ak u la, pasalṭha Selzama thlanah kan khai ang....pialrala a rawng bawl turin..! Serzawl banpui a tliak ta! ( Pasalṭha Hrangkhuma te lam an melh a) Darphawa pawh ropui taka thlah liam in duh ang a, a ṭul chuan Pawih nawr turin kan rawn thawk chhuak leh ang!" thinrim fe chuan an ti a.

       Hetih lai hian Bawkmual lamah pasalṭha Hrangkhuman tlangval a lo tir tawh a. Aimawia chuan Serzawl tlangval pahnih chu an en a,

    " Serzawl lamah a theih anga chakin lo va liam u la, kan Lal Lalbula hnenah chuan Serzawl ban ropui ber chu a tliak ta, va ti ang che  u, a theih anga rangin min rawn hmuak leh dawn nia!" a ti a. Zika te ṭhiandun chu rang fe hian an liam zui ta a!  Chawntui val te leh Bawkmual valte chuan hlang an siam ta a! Pasalṭha Thanpuia zawng a ngawi ngal  a melh ngai a la melh ngar ngar mai chu  a ni. Aimawia leh Pasalṭha Chhunthanga chuan ro an nei ta mah zawk a.  Hlang an han siam zawh chuan  uluk takin pasalṭha te pahnih chu zawn turin an siam fel ta a. Pasalṭha Chhunthanga leh Aimawia hnenah chuan pasalṭha Hrangkhuma chuan lawmthu a lo hrilh mawlh mawlh a, an ni pawh an Darphawa an chan ta si! Helaia Darphawa pawih ralin an kah hlumna li, a  tlakna hi Darphaw tlak li tiin an vuah zui ta a ni.(Tun thlengin Darphawtlak li an vuah zui ta) Tlangval ho an inpeih fel chuan Pasalṭha Thanpuia chuan zawn chu a chuh nghal a, an kal ta vang vang a. Bawkmual dai an pan ta a, an kal chak bawk a, an thlen chuan hmana pasalṭha Selzama hova an chhante khan an lo hmuak dul mai a. Darphawa leh pasalṭha Selzama ruang chu puanin an lo khuh a, an mittui pawh a lo sur nasa hle hlawm a. Bawkmual lalnu phei chuan a puan thul khung meuhin pasalṭha te pahnih ruang chu a lo tuam a, Pasalṭha Selzama ruang chu an en a,

   " Mikawl pasalṭha te hotu, i tel lo chuan i khua Serzawl meuh pawh a ngui nghiai ang le....Nun hloh khawpa chhan tlak em ni kan nih le ..! Hringlang tlang aṭanga rawn thlirin Hawilopar i thliak anga, lunglohtui i in dawn si a maw....!" an ti khur zawih zawih a. A pasal Ṭhalura chuan a lo vuan vang vang a..


     " Lusei mikawl te u, ka chhuang hle mai che u, kan tana nun hlante hi nghilhni kan nei tawh lovang! Tluangtein va kal ang che u..!! " a tichhuak ve ta a.

    Bawkmual lam chuan an pasalṭha Darphawa chu an ṭah nasa ngei mai! Khawchhung an pan chu a ṭap ṭhei zawng zawng an ṭap ta emaw tihtur a ni hial a.

      Bawkmual lamah pawh chawlh chi ni tawh hek lo le, Chawntui valte leh Serzawl val te chu an kal leh nghal vang vang a. Pasalṭha Thanpuia chu chhawk an han tum ṭhin na a, a lo duh tlat lo..! A kal miah miah mai a ni. Pasalṭha Selzama ruang Serzawl han thlenpui chu ava hreh tak em! Hmeithai Zaii leh pasalṭha Selzama nupuiin an lo ṭah khum ngei dawn si a. A hawi ngam dawn em ni!?

       Aimawia chu Thanpuia bula rawn hnai in,
" Thana,  kan naute hi an ṭam lutuk a nge, tukṭhuan tal bar pui ang hmiang...!!"a va ti ta a. Chutah meuh chuan pasalṭha Thanpuia pawh a harh chhuak ve ta deuh a, an chawlhpui ta rih a. Pasalṭha Chhunthanga meuh pawhin eng mah a sawi lo, pasalṭha Selzama chu a ui hle a ni. Hetiang pasalṭha hruaitu nih tling huaisen leh rothap rorel sual ngai lo hi a tawng khat em a sin! A ni reng a a mah ang hi tawn tur an vang ngawt ang le!

       Pasalṭha Thanpuia pawh ṭawng zai a rel thei lo, lungngaihna chhumpui nasa tak chuan a nuai vel a ni, apa leh apa Zamkungan chin an han zawt a nga...aw. ... Hmeithai Zaii leh apa Selzama nupui mawlh khan eng tin nge an ngaih ang. Thangchhuah pa pasalṭha in i hum zo lo em ni!? an tih khum zawngin awm ngaihna a hre miah lovang le! Apa Selzama hian a hnuk chah dawn khan a nupui pawh sawi lovin Hmeithai Zaii kha a ni a sawi ni.....Aw..indona hian rah ṭha ava chhuah lo tak em!

      Reilo teah tukṭhuan chu an bawl zo a, an han bar ta a, bar mumal thei a bar pawh an awm lo! An ngui nghiai a, chung lama hringfate nun tinuamtu Chungturni pawh chuan pasalṭha Selzama chu sun ve niawm hian a nguai raih mai le! Tukṭhuan an bar zawh chuan rei chawl khawmuang lovin an kal leh ta! Rodawla pawh a hliam chu a na ve hle mai le... A thinrim em em a,mahse a dik bik vak lo kha a ni. Khawsik hlawrh hlawrh chuan Pasalṭha ruang chu a zui ve ta zel a, phuba la lak chu a tum ruh hle mai!


           Serzawl lal ina Pasalṭha Selzama tluk thu an han hriat meuh chuan an ngawi ṭhap mai! Lalbula chuan a vaibel dawn an sehkek rap a, rawl chhuah meuh chuan a ṭap chhuak ta.... " Serzawl banpui a tliak an ti maw...

            Selzam...puini lemang han der la,

           Hring han chang leh ta che maw...." a ti rawih rawih mai le!

        Pasalṭha Selzama boral thu chuan Serzawl khua ava fanchhuak rang tehlul em! Tlangval zawng zawngte chu an pasalṭha ruang hmuak turin an thawk chhuak ta! Pasalṭha Selzama nupui in a pasal chin a hriat meuh chuan a nghilh dup a,a fate lah an lo ṭap chul mai bawk nen, a ding khur ngar ngar a, ni khua a hre ta meuh lo...! Zaii mawlh mai chu a ni, ruang lah ala rawn thleng si lo, tual laiah a tlan kual ruai ruai a,

  "  Ka bungpui belh lai a tliak ta an ti maw,

     A zar hnuaiah muangten ka chawl asin!

     Ka sa em ni nuar ta, ka vai ruai e" an tih meuh zawngin nuho ava vel nasa teh lul em!
Pasalṭha Selzama nupui lah buaipui a ngai zui bawk si! An tawrh hi ava na tehlul em!


        Pasalṭha Thanpuia leh a hote Chawntui dai an thlen chuan, an lal Lalvura hovin an lo hmuak a, Pasalṭha Selzama ruang chu Thangchhuah puan in alo tuam a, Lalvura meuh pawh a insum thei lo....

   " Pasalṭha  puini lemang ham der la,

     Serzawl leh seifate muannan lokir rawh

     I nauten an la thlahlel che asin!" a ti chhuak ve raih raih mai le!  Chutih lai taka Serzawl mihrangte thinlunga ṭap ṭhawm chu bengchheng tham a ni ta! Chawntui khua chuan ui chung leh tawrhpui em em in an thlah liam ta.

    Chawntui tlangvalte chuan Pasalṭha Selzama ruang chu an zui ve nghal zat a. An khaw chhanhimtu pasalṭha te hruaitu a ni miau mai si! Serzawl panin an liam leh ta nguah nguah a. Pasalṭha Chhunthanga rin ai takin an ruang zawn chu a rimchhe har a, tin, thing rimna chi kawngah sat nualin an phel a, ruang bulah chuan an dah ve bawk a. Karkawngah zan pawh an riak lo, chaw an bar zawk zawk tihloh chu an kal char char kha a ni. 


       Chu zana mahni dinhmun ngai rawn luahtu chhawrthlapui pawh a ngui nghiai a, Serzawl tawrhna ṭawmpuiin a nguai rawih hian a hriat a. Serzawl khaw chhungah zawng lenglen ar leh ṭhutmuan ar pawh a khuang ta hauh lo. An mihrang chu an sun ve a ni ngat mai! Serzawl khuaah chuan Darkhuang a ri thum vung vung a, Nuho leh paho lahin Pasalṭha Selzama te in an pan nguah nguah a. Tunah meuh chuan thlamuantu te chu thlamuan ngaiin an awm a, puitu chu puih ngaiin an awm ta! Zan a lo tlai zel a, Pasalṭha Selzama nupui pawh a awm hle hle thei lo, Zaii lah a vak kual ruai ruai a, ṭah hla a ngah leh ta telh telh mai chu a ni.
 

   " Zunleng ngaiin chhinzai kan rel ne maw,

     Kan rauthla leng ar ang a vai ruai e,

     Ṭhangril arkhuan hun a thlenin ka nuar leh ṭhin...." an ti a.

      " Aw..Selzam Rihtlangpui chu liam la e,

        I nau Thlahtea kha Pawlan a lo sai chuan,

       Hnam lenin han tudai rawh aw...."  an tih leh meuh chuan nuho zawng zawng chu a vel ta! Hritlang hauh si lo chuan an insut an insut ta mai, an lainat em em si a.

         Pasalṭha Thanpuian hma an hruai a, ramri lui an thlen hma chuan Pasalṭha Bukbawnga leh a nauten an lo hmuak a, a ri hak mai le, hlim vang erawh a ni lo chiang a ni. Rei chawl lovin an kal zel a, ṭawngzai rel an awm hauh lo, an kal chak hle mai!

        Varṭianah chuan Lungdawh an thleng ta ṭep mai le....Lungdawhah chuan Serzawl Lal Lalbula leh khaw mipui te chuan an pasalṭha chu an lo hmuak a, Pasalṭha Bukbawngan hma a rawn hruai a, an rawn hnai ta.! Lalbula pawh eng ruai a ni lo, nghilh dupin a inhre hial a.

    " Ka bungpui a tliak an ti maw....

     Ka Sutpui rinawm a tliak an ti maw....

      Zing vawn zawl ah a liam an ti!" lungchhe fe chuan a ti a, a khap per sak sak a. Chutah Pasalṭha Selzama ruang zawntute an rawn lang ta.  Zamkunga chu lungdawhah chuan a ding a, mittui tla zawih zawih chuan,

   " Ni khi e, tla rawng rawng la,

     Khua kip ngui law ka duhin e,

     Zan thim e, zing na sel law..

      Farmei e ennan kan runah e"

        An ti a, a silai an kap puak zui meuh zawngin mittui sur lo an awm ta lo. Pasalṭha Thanpuia thangchhuah tawh pawh a thinlunga ṭap thawm ring lutuk chuan a rawn hnawhna ta lutuk a, a ri ta rawih rawih mai le!

     Pasalṭha Selzama zawng thangchhuahpa a ni a, Rih dil pal tlangin Pialral kawng a zawh a ng a, Hringlang tlang aṭangin a rawn thlir leh ang a, Hawilopar thliakin Lungloh tui a dawt ang a. Hringlam reng a ngai tawh lovang, a Sazuk kah chungah a chuang ang a, chu Sazuk ki ah chuan Rulngan a invet ang a, a chunglamah muvanlai in kawlekin hma a hruai ang.A sakah tawhte thlarau nen chuan an ri phei hum hum ang a, a ral thah tawhten an lo hmuak anga, a rawng an bawl zui ang.Faisa hlir a ring tawh dawn a ni. Tin, Pialral kawtchhuaha Pawla pawhin bang awng aṭangin hlau tak leh zah takin a thlir duk duk ngei ang le....!

        Pasalṭha Thanpuia mittui far zawih zawih a, kal chu tu emaw hian a kutah a rawn chelh a. An hawi chhuak a, lal fanu Saipuii ngei a lo ni. Chu nula Serzawli chuan,

  " Pasalṭha, insum rawh aw....!" ngaih la tak leh tuarpui hmel tak chuan a ti a.


      ( A TAWP TA)