31st JULY (UNCHAINED MELODY) EPISODE-45

31st JULY(UNCHAINED MELODY)

M.LUSEI PALIAN

EPISODE-45

( Episode 45 hi a tawpna tura ka ruahman mah ni se, ala tawp thei dawn hauh lo mai, a buaithlak a ni. In duh dan a nih chuan ti leh zel ang hmiang.

Joseph lah hian min pawtna tawh nasa mai si a. Ka phur et et tawh a nia. Hei hi zo phawt ang aw.)

 Chu a mi zawn rawn tlan phei chu Hruaia chuan alo hmu vat a, a lo nuih sak a. Hruaia pawh a hah ve hle thova, a taksa pum chu a huh a, a thlan te chu ala dir zawih zawih thei hial a. Hah tur a ni, chau tur a ni reng a ni. 

Vawiin ngei hian an la Final dawn zui a! A hahdam hman ngut a ngem le?

Mahriati te ṭhian hovin Hruaia lam an pan chu Rinpuia chuan alo hmu reng a, a awmna a hla si, a lo insehruh ve ngar ngar a. A thik em em si! Dini te ṭhian ho lah chuan an lo hmu der lo. 

Hruaia chu mi mit fukna a ni a, chu chu Mahriati chuan a hre ve reng a. Chuvang tak chuan mi zinga hnaih lutuk chu a ngam tawh lo a ni. A mah zawk hi alai lutuk dawn. 

Hruaia bul ava thlen chuan va kuah bawrh bawrh chak mah se a ngam si lo.  A second man pawn a hrethiam tawh a, dressing room lam chu an pan ho ta zawk a.

 Muani leh Dini pawh chuan an zui ve ta a. Dressing room chu an pan ho ta zawk a. An ri laih laih mai. Hruaia chu an lo au luai luai a. A ni chuan nui var var chungin a bye bye ta a. Entute lawm hlawh tak a ni ve hrim hrim atin ni.

An khelh zawh hian midangin Semi final an khel ve leh anga, chuta chak zawk zawk chu Hruaia hian Final a tum dawn a ni.

.....

Pi Liani Sikul kai pawh chuan a fapa a ngaihtuah leh hle tawh a. Amah chang a ni lo, Pu Lala pawh chuan a hnathawhna hmunah a fapa chu a ngaihtuah ve hle tho mai. A ni hi chuan a fapa thil tihtur a hre kiau mai si a. 

Mahse, mipa fa a ni a, amah chu a ring tawk viau lawi thung a. Tin, Chakber ni lem lo mahse a dawttu tal a nih a ring fan a. A pa pasalṭha kha a chhun riau a, he a fapa hian, chuvanga ngaihtuah lutuk lo chu a ni reng a ni. In lam leh ram lamah pawh ni se hlauh em em a nei lo tlat hi mak a ti ru viau zawk ṭhin. Chak ngei tur chuan a ring ve tho a ni.

A hnathawhna hmun aṭang chuan a rilru in a ṭawngṭai sak ve reng a. Chuvang chuan a hahdam deuh phah a. 

.......

Mafeli te pawh tluang takin an rawn tlan ve zel a. Mak tih deuh a nei a, chu chu tiang em em a khaw nuam panna kawng  chhe leh lutuk chu a ni. 

Fur lai vawkhniahzawn thlaah chuan chu an khaw thar kawng chu a chhe em em a. Dil te reuh te te ni awm hi a tam em a ni. Ama tawk chuan a rilru chuan a phun ve nuah nuah a. 

Aizawl lam apan tur thu hi a hma zanin a ni te a pa in a hrilhlawk vek tawh a. Zanriah pawh an lo kep dawn a ni. Thlen hlan a nghakhlel hle tawh a ni.

Nunmawia kha eng tin nge a awm zel ang tih te, Hruaia a dam ṭha angem le? Tih te chu a lunglai kaptu a ni. 

Hruaia a tawng leh mawlh mai hi a thinlung sawi nghingtu a ni si. Loh theih loh hian hmana an nunhlui mitthlaah acham si a. Ani, he Hruaia ngei hian kawng tam takah a chhan a, thil a zirtir a. Eng kim, theihai lawh dan thleng khan a zirtir si a. (Theihai hi lawh thiam loh chuan a hnai in min far a, chu chu vun hian a haw em em a ni.) A mit chu a chhing na a, a thinlung a chhing thei mawlh lo.

Eng tin awm zel ang maw?

.....

Dressing room boruak chu a ṭha hle a, duh aiin an tam mah mah a ni. An S.U hruaitu te chuan an fak awl lova, chutih rual chuan champion ngei turin an duhthu an sawi awl lo bawk si! 

Hruaia pawh chuan chhan ber tur pawh a hre tawh lova. Mahriati chu a melh leh ngawt ṭhin! 

Mahriati chuan Hruaia hian khel tawh lo mai se a duhtawh zawk a. Mahse a sawi ngam si lo! Hliam tam tak a neih belh phah ang a, chau takin a awm leh ang tih a hlau a ni.

" Hawh u...pawnah thlifim dawng ang u, " Puia chuan a rawn ti chhuak a. 

"Nia" tiin an lo chhang thuai a. 

Mahse Hruaia insil zo inhrufai chuan a duh ve tlat lo! Tuna  inhnek turte hi en a duh tlat, mak an ti hle a! Hall chhung boruak a lum tehreng nen. 

" Lo va tei harh r'u, tuna inhnek tur hi ka en ve duh tlat mai" tiin Hruaia chuan a chhang ta daih a. 

A second man chuan a hrethiam hle mai. Final a a tum  tur hi a hriatchian a ngai a, a chezia leh a awm dan, khelh dan engkim a hriat a ngai a ni.Chu chu Boxer te tih dan a ni reng si a. 

An hruai tumberin a duhtak si lovah chuan an ni pawh chuan inkhel en ve mai chu an ti ta a. 

Semi final thawhhnihna en tur chuan Hall ah chuan an lut ta a. 

Boruak ni hulh hulh hi Hruaia hian a ngaina lo hle a, mahse a en a ṭul miau mai si a. Boxing ring hnaih thei ang berah chuan an ṭhu ta a. 

Inhnek chu an ṭan ta. An thiam dun hle mai! An ri nghal zawt zawt a. An intum tawk hle mai!

 A chakzawk tur hriatthiam a har hle mai! An inhnehtawk fia fia hle mai. An thiam  dun nangiang mai! 

Round khatna a zo ta! 

An la inhneh tawk dun hle a ni. A fit pawh an fit dun. A chakzawk tur hi tuman an hre lawk lovang. Judge te pawhin point pek har an ti ve ngawt ang chu! 

Round hnihna an ṭan leh ta! 

Blue Corner Michaela chan a ṭha ta zawkin alang ṭan a. A ni hi a thiam phian mai. 

Zirtiri Residential College(ZRC ) lam a ni a, a pian a fuhin a hnek dan pawh a dik hle a. Tawrhhlelhawm tak tur chu a ni ve hrim hrim a ni.  

Entute an au nasa hle! ZRC lam an pawr hle a, round hnihna tawp lamah phei chuan Michaela chan hi a ṭha ta zawk a. 

Round hnihna a zo leh ta! 

Boxer pahnihte pawh an chau ve hle tawh a. Mahse chak zawk an la awm chuang lo. Chawlh hun hi a rei lo mah mah a ni. 

Round thumna a ni ta. Final round chu....

Boxer pahnihte an la ding khawng tlat! Michaela zawk chuan a hnek hnem malh malh hle mai! A tumpuipa chu a inveng thei ta ngang lo! A hmai ah chuan a dawng mawlh mawlh a. A hamtupa chuan a titawp rih! A ṭhat leh ṭhat loh a hriat loh ahamtupa chuan count ta! 

Aw a khel peih tawh lo! 

ZRC lam an thawm a ṭha. An thiampuipa Michaela a chak ta zawk.! Final an lut ta.! An va hlim em! 

Tlai lam dar thum ah Final an khel dawn a ni.

Hruaia chuan a tumpui tur chet dan kha alo zir ve ngar ngar a. A khelh thiam theihna turin, chu chu a tum a ni sa reng a ni. 

Puia chuan pawn lama chhuah a rawt ta a. An za chuan an chhuak tlang ta a! Pawna lo dingreng Rinpuia chuan a lo hmu reng a. Hruaia banah chuan Mahriati'n ala kai zui a! A rilru chu chhun ang maiin a na a. Phuba lak dan thiam taka a zawn a ngai ta a ni.

.......

Mafeli pawh a inthing harh ṭan a. Seling an thleng ṭep tawh a. An driver chu kuhva heh a ti hle a. An ti ti a, tu emaw chanchin a hriat ve loh an sawi a. An nui leh huk ṭhin!  

Seling chu an thleng ve ta! Thingpui dawrah chuan an chawl ta a. Dawr kawtah chuan PCO hi a awm a.Mafeli chu lutin a nu leh a ni te a be ve ta a. An thlen chin te a hrilh ve zel a ni. 

A kawng ana urhin a hria a. Thlen hlan a nghakhlel hle a ni. Thlen vat vat a, inbual a chak tawh hle a ni. 

Damte'n an thleng ngei ang. 

....

College Zirlaite nghahhlelh tlai lam dar thum a hnai ta! 

Hruaia pawh dressing room lam a pan a hun ṭep a. Hall chhungah an lut muah muah a. Khawi zawk zawk pawhin chak zawk nih an tum ve ve a. 

"WE ARE THE CHAMPION" tih hla an sa ve ve a. An thawm a na in a boruak ava ṭang tak em!  

Dressing room ah a lut dawn ta! Mahriati chuan,

" Hruai, fimkhur nasa rawh aw.." 

" Hlau thawng suh, theihtawp ka chhuah ang" a ti a. 

Chutihlai tak chuan Janeti pa a rawn lang hlawl mai! 

" Hruaia...ka fapa..." 

A rawn ti ta..

" E he...ilo kal ve tak tak elo!" 

"Ka lo en ang che ka tih kha.. han nuai miah miah teh le...zam hauh suh, i hneh ngei ang" tih pah chuan Janeti pa chuan Hruaia dar ah chuan a beng thak thak a. 

" Ka lo va lut a nge, a hnaih berah che ka awm ang" a ti a. A kalsan ta a.

Mahriati chuan, " Hruai..." 

" Umnn....eng nge ni?" 

" Fimkhur rawh aw" 

" Aw le, min ngaihtuah suh, kal tawh rawh le" 

Chutihlai chuan a second man leh Puia pawh chuan an lo tur sek tawh a. 

Dressing room lam chu an pan tlang ta a.

 Hruaia chu a insiam hma in a falin a ṭawngṭai leh ta phawt a. A ṭhiante chuan an lo nghak ta rih a. 

Chumi hnu chuan a insiam leh ṭan ta a. A phur viau a, mahse a tilang hauh lo, a tumpui tur a hrechiang a. Amah lo ṭantu tur pawh a hrechiang ngang mai! 

A insiam zo ta. An sang mar kual vel a. 

Hall chhung boruak chu a ri luih luih a, a ṭang leh hle tawh a ni. A chakzawk tur an inrinsiak laih laih a. Rin dan thiam har an ti hle a ni. 

Michaela nge Hruaia?

ZRC nge HBC ? 

 A la hriat si loh le?  An la intum miau si lo le! 

Aurinna hmang chuan a nasa thei ang ber leh ring thei ang ber chuan Final a nih thu an puang a. A puangtu hian a thiam bawk a, boruak a siam thiam ngei mai.

Hruaia hming chu a rawn puang hmasa ta a. Ring a rawn pan lai chuan a mi lo hneh tawhte chu pui thei ang berin a puang tel nghal a. HBC lam thawm a ṭha ngei mai, an banner nen an lo ding a, kut an lo beng a. An lo chawimawi thiam em em a ni. Ring chhung a a luh dawn chuan Puia leh a Second man chuan ring chu an lo pawt kau a. Blue Corner ah chuan a ding ta vang mai! 

Aurinna hmang chuan a pawr thei ang berin Michaela hming chu a puang ve leh ta. A ni pawh a rawn chhuak ve leh ta. Ring a rawn pan pah chuan a mi lo hneh tawh te chu a puang leh ta char char a.  A second te chuan ring chu an lo pawt kau a, ring a rawn thleng ta! 

Entute an lo au dur dur a. Inhnek hmuhnawm an enchak a,an thlir chak tawh a ni. 

A hamtu tur  an rawn puang leh ta dum dum mai a. Inhnek hmuhnawm chu an ṭan dawn ta.....!