To Sir....with Love Episode 23

TO SIR.....WITH LOVE

( M.Lusei Palian)

.........XXIII........

Tlangval chuan, " Tu emaw khan min lo pui lawk teh u" a ti leh a. An zinga mi pakhat chuan a rawn pui a. Mahriati chu zo tak chuan a pawm phei a,a bike bulah chuan a din pui a,
" I lo hlang zo a ngem? Khawi a bag kha ka lo ak ang"

" Aw...khawi ka lo hlang a nge"

Mahriati pawh chu duhthlang thei a ni tawh lo. Chu pa chu haw hle mahse, a ke chu a na ut ut tawh mai si! A mittui chu a hnam hial a. A la khur der der a. Damdawi-In lam chu an pan ta a.

Tlangval chuan inthiam lo tak chung chuan,

" Ka tihpalh aw....a pawi ka ti takzet.. a pawi hle mai! Min ngaidam rawh aw..."

" I va han tlan chak em em ve" vin tak aw khur der der chuan a ti a,

" Ka tlan muang thiam lo..."

" I va a ve"

" Eng a?"

" Eng mah"

" Tu nge i hming?"

" I hriat kher a ngai lo..."

Damdawi-In chu an thleng ta a. An bul hnaia lo awm te chuan an lo pui a. Tlangval chuan Mahriati chu zo tak chuan a pawm nawlh a, Casualty lam chu a pan pui a.

Dr. Mapuii chuan Mahriati, Hruaia duat lai, tlangval dangin an rawn pawm lawp lawp mai a hmuh chuan mak a ti hle a. A phone chu a phawrh a, thla a lo la ve ta tlat! A hlim viau lawi! A mak a ni, mi nat laia lo hlim tlat thung chu....

An ni pahnih lah chuan an hmu der si lo! Mahriati lah chuan Damdawi-In thlen vat a, țhut hahdam a duh avang chuan a lo kuah let ve ta thung a. Chu tlangval chuan a duhzawng tak hmeichhia a hmu in a inhria. A tawk chauhin a kawlh a, tin, a nu hnap bawk a. A bula awm chu a nuam a ti. Mak thei ngei mai! Chu tlangval lah chu a che a zei thlarh reuh a. Tin, a hmel lah chu a fai vang a, a thar sar thung a. Nula tana ngaihzawn awm tak a ni ve hrim hrim bawk a tin ni...

Damdawi-In khuma a mut tir chuan duty te chuan a khup hliam chu an lo buaipui nghal mawlh mawlh a. Doctor chu an ko nghal a...

" Hei..I chhungte phone no...khawngaihin min lo hrilh.."

Na chhawkna chuan an Jection dawn a. A khelah an Jection dawn avang chuan, tlangval chu an lo va chhuah tir a. An jection zawh chuan a lo lut leh a...

" Hei...phone no. Chu"

" Heih....ka ni lo, engah nge min sut ringawt a.. I va a ve.."

" Kawng laiah alawm i kal, kawngsirah kal ta che.."

" Min hel mai ta che..."

A pa phone no. a pe a, chu tlangval chuan a phone nghal a, thil awmzia a hrilh a, ngaihdam a dil nghal a. A ma chhungte pawh a phone ve nghal a. Casualty ve deuh reuh ah chuan tlangval chuan a țhutpui ve ran a. Mahriati chu School uniform nen a la ni a, a mal chu a lang thui deuh dawn a hria in tlangval chuan a jacket chu phelh leh in a khuh țha ve ngei a. Mahriati pawn mak a ti ve hle a. Mi pangngai tak chu a ni ve a ni.

Rei lo teah Pa Hmaa te nupa leh Ruatsanga chu an rawn thleng nghal a. Tlangval a sutu chuan thupha alo chawi mawlh mawlh a, Chu tlangval nu leh pa te pawh an lo thleng chawpchilh ve leh nghal a...
Electic Department a SDO Pu Rinliana fapa Andrew-a alo ni a. Chu tlangval Andrew-a chu a ni Mahriati su tu chu...Phaia lehkha zira an dah.. a zawh hnu in Coaching class a kal a, a rawn chawl lawk a lo ni. A bike a awmbo san vang vang chu test in alo tlan kual a lo ni a.
.

Mahriati khup hliam chu an tifai a, damdawi te an hnawih a. A ruh a sawh a, na a ti hle mai. A thlan fim a far zawih zawih a, a chak ber chu țah chhuah hawm hawm a ni. Sir Hruaia a bulah awm se a va ti tak em! A ke lah chu a vung chak em em mai lehnghal a, Nu Kimi rilru chu a na em em a, sawi mai ai hian a na a ni. Ruatsanga chuan a nau sutu chu ben a hnek mai hi a duh a, mahse ngaihdam dil mawlh mawlh han ben hram chu niin a hre chiah si lo! Mit a hmu tute sawi dan chuan Mahriati chu kawnglaiah a kal miau mai si a. Chu chu a pawi ta a ni. Andrew-a chuan Mahriati ke vel an buaipui lai chuan a kut ah alo dawn a, Doctor in a rawn endik lai vel chuan kut thlan dupin Mahriati kut chu alo chelh ve thung a. Mahriati lah chuan na a tih em avang chuan a kut a hmer tih pawh alo hre lem lo. Nu kimi chuan Mahriati thlan tla te chu a lo hrufai thung a.

Pu Hmaa leh Pu Rina te pawn lamah an lo inbe thung a. Pu Hmaa thawhpui VC member te pawh an rawn kal kim nghal a, boruak a țang lek lek a ni. Hmunpui lam pan a ngai a ngem le? Tih chu zawhna lian ber a ni ta a ni.


Mahriati chu nachhawkna in a chhawk țan ta deuh a. A khup mai alo ni lo, a ke artui pawh a vung tel tlat mai a, a duk raih mai a.Ruatsanga chuan Hruaia phone a tum a, alo Switch off si!


Mahriati chuan, " Nu ka phone ilo keng em?"


"Awi... Bawihi keng miah lo..."

" Nu..i phone ka lo hmang mai .."

Sir Hruaia chu phone a tum ta nghal a, switch off alo ti zel a, vai nu hlirin a lo chhang a, a thinrim takzet a ni.


Doctor chuan Mahriati a check zawh chuan Nurse chu a jection tir leh a, a ngaih a țha tlat lo! An X-ray khawl lah chu a chhe bawk si nen ! Dr.Mapuii pawh chu a awm ve reng na a, Mahriati chu a be chuang lem lova, ti nge abiak duh bik kher ang, he Sikul naupangte avang hian Hruaia khan a hawisan a ni lawm ni! Damlo mah ni se, a ngaihsak tehchiam lo, Mahse a rilru chuan pawi a ti ve thung lawi si! Hringnun hi zawng a mak țhin a ni.

Pawn lama ding Pu Hmaa te bulah chuan Nurse pakhat a tir a, a koh luhtir ta a( room hranah) Ruatsanga pawh chuan a pa chu a zui ve nghal a.

Doctor chuan, " Hmunpui lam pan mai teh u, a ke saw zai a ngaiin ka ring tlat!"

" E khai aw! A va zia lo ve...le.."

" Nachhawkna kan pe a, tunah chuan harh hrih mah se, a na a chhuah chuan a na lutuk dawn a. A rang lamin kalpui zawk mai rawh u" a ti leh a. Ruatsanga chuan Hruaia phone a tum leh a, ala tlang thei chuang lo..

.....

" Nu...U Hruaia hi a biak theih miah loh.."

" Bawihi, a buai lai a ni a niang"

" A buai lovang, vawiin hian an Exam zo dawn... chawhma ah.."

" Chu ti si, ti nge a biak theih loh aw..."

" Tu nge Hruaia chu?" Andrewa chuan a lo ti a,

" I hriat ve angai lo" Mahriati'n alo ti hmak a! A hawihai ngei mai...

" Bawihi, chutin mi an chhang ngai lo.... Hruaia chu Bawihi țhianpa hi a nia" Nu kimi chuan a ti a.

" Thianpa... thianpa han tih ah eng nge a awmzia..."

" An Sir ka tihna a nih kha, Aizawl ah a kal lawk a..."

Andrew-a pawh a ngawi chhunzawm ve mai a, Nu kimi chuan,

" Bawihi... tuar hram hram rawh aw..." alo ti ve mial mial a, Andrewa lah chu a inthlahrung telh telh thung a. Ruatsanga a rawn lut a, " Ka nu, ka pa in lo chhuak lawk teh a ti... taka U Hruaia ka be tlang thei miah lo..."

A nu chhan hma chuan, " Mama han tum leh teh " alo ti a. A awm ve reng a ni, na tawrh hi chuan thinlung hi a pangchang a, rilru ah min hmangaihtu leh kan hmangaihte an lang nghal vawng vawng țhin!
........



Pu Hmaa chuan a nupui hnenah chuan Hmunpui lam pan a ngaihthu a lo hrilh a, an mangang nupa hle a. Chhungkhat hnaite leh lainate an han phone kual a, Hruaia chu ala biak theih chuang lova....

Doctor berin a rang lama Hmunpui pan turin a ti miau mai si a. Rinsangi pawh Damlo chung chungin Damdawi-In lam chu a rawn thleng phei ve ta. Mahriati'n Rinsangi a lo hmuh chuan a lawm hle a.

Pu Rina te nupa pawh an inthlahrung ngei mai, an fapa neihchhun in mi pawi a khawih palh chu hrehawm an tiin na an ti hle a. Tin, a theih chen chen a insen an inhuam thu pawh an sawi lang ve chhen a.Pu Hmaa thung chuan rem a ti lo hle thung a, Pu Rina nupui Pi Mawii leh Andrewa chuan zui ve an tum ta nghal a. Pu Hmaa chuan rem a ti chiah lo na a, Aizawl kal an duhthu an sawi ri ve chhen bawk a. Zan riah ei hma law law chuan Aizawl pan tur chuan an inbuatsaih nghal a...


Hruaia motor Ruatsanga kawl chuan Ruatsanga leh a nu leh Andrewa te nufa chuan Mahriati chu Aizawl lam an kalpui dawn ta a ni.


Mahriati chuan a nu phone chu a hmang leh a, a lo la in Switch off si a, a rilru ana țan ta hle a, Internet a...thil tih dan kha hman an tum a, internet signal alo la chhe ve leh zel bawk si. A rilru a na takzet ta! A mah tihnat phal lo tu chu biak tlang theihin a awm lova, a na ta reng a, Darkar hnin vel a ni tawh, a la biak theih si loh...

KHAWNGE U HRUAIA hi a awm!? ?