To sir....with Love Episode 2

February 19th, 2019, 12:25 am

TO SIR........WITH LOVE
(M.Lusei Palian)

..........(II).........

Zanriah chu Mahriati chuan a buatsaih mawlh mawlh a. Nilai ni a nih avangin zan inkhawm an duh a, Mahriatin zanriah a buatsaih chhung chuan Hruaia leh Pu Hmaa chu an lo ti ti dun thung a. Pi Kimi chuan, " Bawihi pa, hei kan peih der a nia."

"Aw....kan lo phei"

Pu Hmaa chuan chaw ei lai chuan, " Hei, Bawihi nu kan inhnuai hi luah mai se ka ti deuh. A ruakin kan dah reng ringawt thova. In hrang luah lo mai se ka ti deuh na a, mahse amah hian a tum tlat si a"

Pi Kimi," A țha ngawt ang chu, Bawihtei hi lehkha a zirpui thei anga,..."

Chutih lai tak chuan Hruaia chuan Hriati chu ava melh a, Mahriati chuan alo en ve lai tak a ni si. A lai leh ta viau mai. Pi Kimi hian a fanu hawiher hi aman thiam țan. An mikhualpa nen hian an inmelh leh țhin tih hi a hre tlat. Engah teh lul nge a hriat lovang ni. A fanu duat a ni a. A tette ațanga a enkawl, a duhzawng leh duh loh zawng thlenga a hriatsak vek kha a ni. Tuna a hawiher danglam ta thut hi engtin nge a hriat loh teh lul ang ni.

" Pu Hma, in chhungkua hi eng zat chiah nge in nih?"
" E...a ni maw,hei ti hian ka țhiannu hi chu i hre thova,fa hi pathum kan nei a, mipa pahnih leh hei Bawihtei hi an ni a. A upa ber Lalruatsanga hian nupui a nei ngawt a, M.A kha a zir zawm ta lem lova. Saw lai kan khaw kawn lai deuhah sawn dawr an siam ve a. A nupui saw alo sumdawng mi phian a. Fa pakhat an nei a. A nau chu Lalngurliana a ni, a ni chu tunah hian M.Z.U Hostelah khuan a awm mek a. M.A a zir mek thung a. Hei Bawihtei kan ti leh mai țhin a, Vanlalhriatpuii hi a ni leh a. A ni hi class XI zo ve chiahin Kumin hian class XII a zir thung ang. In naupang tur a nih hi"

" Hruaia, Bawihtei hi tuetion pe rawh aw...Bawihte, Exam na a letter hmu ho kha lawmman a awm țhin ti raw.?"

A fanu chu a melh ralh a. A fanu mit meng lai lutuk chu a hmuh hmaih lo. A meng tal tap tap a...

" Ka duh teuh lo.... i duh leh nangman la rawh..."

" E khai! Kei te chu I U Hruaia hian tuetion min pe duh lovang."

An nui ho ta a. Pu Hmaa hian boruak a man țep a ni.

" Ka lo in ruahman danah chuan naktuk hian ka inluah tur chu kan tifai anga, chuan a tuk leh hian Aizawl lam ka pan thla anga, kar leh lamah ka rawn chho leh ang ka lo ti deuh..."

" Aw le a țha phian ang. Mahse nang mah chuan a buaithlak ang a"

"Hei Nu Kimi a awm alawm! Hmeichhe dang pakhat inhlawh tur awm se, a tawk mai ang"

" Naktuk chuan kan hman lovang a! Tlai lamah Kan leipui tur hal kan tum deuh si..Bawihte, i țhiannu saw eng nge a tih ang aw? In chhung hawlfai vel chu nula tihawm tak a ni a, i țhiannu nen In Sir luahtur chu in hawlfai pui dawn em ni?."

" Ka hre lo le, inkhawm pahin ka lo zawt ang."

Zan riah ei kham chuan Mahriati leh a nu chu inkhawm tur chuan an insiam a, Mahriati chuan a nu a kalsan a....Rinsangi a va sawm a, alo insiam zo tawh a. Chhun lam chanchin an sawi a, inkhawm tur mah ni se, an nui ring dun ngei mai. A chang leh kalpah chuan an insik dun a...

Pu Hmaa chuan zial chu a zu khu veng veng a, Hruaia hnenah chuan, " Zial i zu ve em?"

" Aw...zu zeuh zeuh...Hei ka nei ve e.."

" Hei hi zu teh a tui a nia, Vai ho zial sa hi chu a tui lo, Bur uk rim a nam, hei hi zawng a tui zek a nia."

" Nu-i, han zial sak teh.."

Chutih lai chuan Pi Kimi țhiannu Pi Rovi alo lut a.

" Țhiani, i hman tawh em? Kan Țhuamțhiani pawh thupui hawng turin nilengin a inbuatsaih an tih chu..."

" E lokal rawh, hei ka hman a ni mai.."

" E heu! Hei khawi lam khual nge ni leh ta pek a?.... Nang ni hi zawng khawtlang hruaitu tih takah Khualluta te, Khualluti te in ni ringawt mai a...."

"Lo țhu teh, hei Bawihi te Zirtirtupa tur a ni e."

Hruaia chu ava chibai a, Pi Rovi chuan," Ka hmuh tawh hnu i ni ngat mai..."

" Ni e, hei kan inhmu chu a nia lawm..."

An nui ho ta a...

Pu Hmaa chuan inleng a nei a, Hruaia chuan phone a khawih a khawih a.

" Zial leh kuhva ka va lam ange"

" E...va hawi khawthawng rawh... Mama te dawr pawh chu va tlawh la, dawrah chuan an awm nghal a. Va zawng chhuak tak teh...Ruatsanga a nih kha..."

"Ni e, ka va tei chhuak ange"

Inkhawm bang chu an rawn phei hlawm a, Hruaia chuan zawn ruk a nei ngei mai. Mahse ala hmu lo.... a phone chu a rawn khur char char a... pick up ngei ngai chi a ni tlat!

Uluk takin a kil lamah chuan ava bia a. Ruatsanga te dawr lamah chuan alet leh a.

Mahriati leh Rinsangi an lo awm a.

Ruatsanga chuan, " Phone chu i hmang thei em?"
" Hmang thei e."

" Kan khua hi signal a chhe riau a.. kan inah saw chuan a țha tho mai.."

Mahriati chuan chhang chu alo hum a.

" Zing hmeh tur, chhang hi Sial deuh a awm chuan ka lo la ange. E....naktuk chhunah pawh kan mamawh ang.... Chhang tui chi kan neih loh chuan Hmunphiaha min vaw duh mai te hi an lo awm ange.."

Mami, Ruatsanga nupui chuan nau awih pah chuan polythene alo pe a. A tui deuh deuh tur chu a la nual a.

Rinsangi leh Mahriati chu an lo in melh ngar ngar a.

" Kan lova haw ang" an chhuak dun ta daih a.

Ruatsanga nen chuan an la ti ti a. College a ankal laiin hmun khatah an lo kal țhin alo ni. An innel ta phian a. A ti ti kotlangah Mami chu alo dak a. College rap ve zuai a nih avangin lo insawi luh phet a tum ve țal a....

Rinsangi, " Hriat, in mikhualpa hi ka duh ta riau mai! A man ka ti e"

" I zak lo!!! Dinga'n a hria ange aw"

" Ui ha... Kan Sir tur a ni bawk si..."

Mahriati chuan a sawi ngam loh a țhiannu in a sawi mai chu huaisen hi a ti bik khawp mai...

A dik alawm, an mikhualpa hi danglamna tak a nei. A ngaina țan tlat!

In an thlenga, a pa chuan inleng alo la nei a..." I U Hruaia i rawn hmu em?"

" Aw...Mama te Inah a awm"

" Bawihte, rawn haw pui tur alawm"

" A duh dawn ngawt ngawt em ni?"

Kawmthlangpa Pu Zikpuia pa ti ti thiam khabe sep sual ngai lova alo awm a.A rawn țawng ve ta..mah se Hriatpuii hian a ngei tlat....Nupui a ngah tawh em alawm!

"Bawihi, mikhualte chu han inti tatu em em mai la, a țha a ni mai. Hmeichhe ho zawng, a tirah min han ngei phawt a, a hnuah min duh leh em em a. Mi in an rawn intih tatu hma in lo ta chei tawp rawh, kamding te chu chhuah mi ni nghal lo chuan..."

" I zak lo...."

" I ti rawk a, nakinah miin an chhuhsak ang che a nge.."

" Bawihtei pawh a lo nula țan a niang, a hawiher a danglam ta..."

An nui dar dar a..

" Lal apa...LAL APA... i va sual ve?" A țap țep a.

Bike arawn ri a. Pi Kimi a rawn lut a, a hnungah Hruaia alo lut ve nghal a.

" LAL ANU....." a țap țep a...

" Eng ti zia nge Zika? In lo fiam leh pek em ni?"

Hruaia chuan, a chhang hawn chu dawhkanah chuan a dah a. Mahriati lo tum bur chu a va melh a.

Mahriati chu alo țek leh chiai tawh a.An thusawi kha a ruk tak chuan țha a ti hle tho...

Room hran ve ve ah chuan inthlak turin an nufa chuan an lut ta a....

........II.......
Cont..

Pu Zikpuia phawk a chhuak țan a. "Khawi maw kan kamdingpa chu i han in sat kak ang hmiang.."

Hruaia chuan a chibai ve mai bawk a. A hmel leh a țawngkam ațang chuan a mizia tur awm chu a hrethiam nghal mai a.

" Kan khaw ropui lai leh nulate hmel țhat lai taka kamdinga i rawn awm ngat mai chu aw..... ka thik rum rum che ka ti.."

" E khai! Hlauthawng re re suh, kei ve tehlul hian Phai vapui ianga hmel țha pawh hmu ila, țhian țha a bak ka chhuah leh hlei lo'nge"

" Iau! Bawihi pa, hei kan nauva hi a chhawn chhaih tlak ve fu mai... lam thaipui tak hi ka nap riau mai ka ti..."

" Kei ve hi zawng Awithangpa khaw chhuak ve lem si, a thluk hi zu han thiam hlei thei lova."

" Awithangpa khua i nih ngai chuan zanlawn puk leh mualnuam i chuan tawh ngei dawn chu a..."

" E khaih khaih! In ti ti ka hre thiam ngut nang, Lawma pa( Pu Zikpuia hi Lawma pa an ti țhin) a ki han thlak teh u"

Mahriati chu pindan ațang chuan a rawn chhuak chiah a. A lang thar sar mai a, nula lian lampang a ni bawk nen , a incheina hi a inhmeh hliah hliah hian a hriat bik a. Tlangval tam takte suangtuah a ni reng a, tlangval chang ni lo, pa ho hlei hlei hian an thlir ning lo a ni. Nula hmel țha nu hnap mai a ni. A nu hi Sailo niin a pa hi Pachuau a ni thung a. Hmeichhe luhlul zet a ni ve re re!

Pu Zikpuian alo hmuh chuan, " I hiau, Chawngtinleri nau, i mawi hluan e..." tia an fak zeuh chuan an nui ho ta ham ham a.

" Bawihi, thingpui han chhuang teh le, hei i pa Zika a rak chul tawh a nia...A tui chi khan aw"

Mahriati chu choka lamah a phei a. Thingpui lum tur chuan! Chhuan lam siamin Hruaia pawh choka lamah chuan a phei ve a...

" I țhiannu chu naktuk chuan a hman dawn em?"

" Ka hrilh ngei a, mahse ka zak e, a tk char char a..."

" A ho e mai! Min bawhthlu nawk nawkte pawh an awm alawm."

" Sawi tawh suh" a va chhiah khum zeuh a.
An mitmeng a intawnga sawifiah hleihtheih loh hlimna hian Mahriati chu a tuam vel a. A boruak chu tun hma a a tawn ang a ni hauh lo. A hlim a ni.

" I duh duh hunah min bawhbet thei ang..."

" Ui....sawi tawh suh...Nangmah i nih kha... ti nge min lo chhan a?"

" Ka lo chhan loh che in, i tlu dawn asin!"

"Min tluk tir mai ta che...!"

" Mahriat, ka dam a, ka awm ve chhung hian na lo la ka duh a ni. Eng mahin tina lo che sela ka duh a ni...."

Mahriati chuan Ketli chu a melh a. Thingpui chu a so bawrh bawrh a. Mahse a off chuang lo... Chu mikhualpa thu sawi chu a rilruah a thum tluk tluk mai...

" Mahse, ka inrawlh lohna tur a nih a, i rilru ah thil dang a awm a nih chuan min hrilh dawn nia..I hmel hi ka mitah hian a mikhual miah lo a nia..."

( Ka inrin hma hian a thlawk chhuak reng mai...)

An ngawi dun vang vang a!

Mahriati nu a rawn phei a...

" Bawihte, off rawh..eng ti zia nge ni veng veng a?...."

Mahriati chu a harh zawt a,

" A la so țha lo deuh a, mahse kan off ange"

" Bawihte, khatiang so țha lo a nih chuan Gas kan va heh duh awm ve aw..."

A lai hle mai...! A inthiam lo viau nghe nghe... eng tin nge a bula thingpui so reng kha a hai theih le...

" Nu kim, naktuk chuan Rinsangi chu a hman dawn a ni awm e."

" A va tihzia ve..Bawihi te nen in pathumin in lo tifel thei mai ang. A pa hian Ser huana dah tur Chinai thi khu ala dah hnawk deuh a."

" Ruatsanga pawh khan ka rawn pui ang che min ti a.."

" Mama chu a hman ve ngut dawn em maw ni aw..."

Thingpui chu Mahriati chuan a siam a. Sitting room lamah chuan a chawi phei ta a.

Pu Hmaa te chuan Tv an lo en a, Zonet Zawlbuk an lo thlir a. A thingpui va sem lai tak chuan Tv fakna pakhatah chuan Hruaia alang tlat! A hmu mai lo...

Pu Zika, " Bawihi pa, khi en teh kan nauva kha a va ang ve? A ni ngat mai ka ti..."

" Iau! A va ang tak ve..., a nih dawn ngei khi..."

Mahriati chuan a thingpui sem pah chuan Tv chu a melh ve a. A ni chiang lutuk....A mah ngei a ni....

A pa te ho chu an phul hlut a!

" Bawihi, rawn tir phei teh...Ka sawi vang mai khan i inti tatu ta riau..." Pu Zikpuia chuan a ti a.

A zak lutuk chu a sen țawn țawn thei hial a. Choka lamah chuan a phei vat a.

"Ih...rawn phei teh an ti.."

A nu chuan, " A tu chu maw, keimah maw?"

" Aih..."

Hruaia chuan Sitting room lam chu a pan ta a....

Zawhna hrang hrang an lo zawt nual a.An zawhna chu țha tak zelin a chhang a...

Mahriati chuan room lam a pan a. Khumah chuan a mu a, a phone chu a khawih mai mai a.
Hruaia a rilru ah a awm thut a. Fb ah chuan Vanlalhruaia tih chuan a zawng nghal a....

A rawn lang țeuh. Hruaia chu a hmu nghal nalh a. A thlalak te chu a en a, a rilru ah..." Ka dam a, ka awm ve chhung hian na lo la ka duh a ni, eng mahin tina lo che sela ka duh a ni" tih chu a thum tlut tlut a...

Thlalak a en pah zel a, chu nula chu a hlim veng veng a ni.

I hiau! Het.....Hei hi tu nge? A phone chu a thlauh țep!

Thlalak a Hruaia bula ding nula chu amah ava ang ve. Mahse thlalak a mi chu a hmel țha in a changkang zawk....?

" I hmel hi ka mitah hian a mikhual miah lo" a hrechhuak nghal!

He nu hi tu nge????