To Sir....with Love Episode 15&16

TO SIR........WITH LOVE
( M.Lusei Palian)

...........(XV & XVI)..........

" Sir, Dorothy-i te nufa khan eng nge an rawn sawi a.....( a ngawi leh deuh vang vang a..) I rilru hi a inthlak lovang tih rin harsa ka va ti em...?"

Chu zawhna kher chu aw! Mahriati pawh chuan chu thu chu a huaisenna zawng zawng sawm khawm in a sawi ve a ni. A zak hnuhnawh em em a. Zakthei lo a ti ang tih a hlau ve si! Hruaia chuan a ar puah tum chu a dah hmak a, Mahriati lam chu a hawi nghal a, Mahriati mitmeng chu uluk fahran hian a en a. Mahriati chu alo ip chawih chawih a, a zak chem chem a Sir Hruaia hian a ngaihtuahna pawh hmutlang thei vek hian a hre hial a.

" Ka thlak tawh lovang.... ka tiam tawh che a... I hming hi ka thinlungah a inker tawh a VANLALHRIATPUII tih hi....chu hming chu a awm ka thinlungah hian a awm reng tawh ang, ka thusawi hi Khuanun hian min hriatpui se....ka dam a, ka awm ve chhung hi chuan i nat hi ka phal ngai lovang...."

Khawvêla nula vannei a va ni tehlul em! Chu thu han mawi em em zia chu aw! A ngaithlatu thinlungah chuan ava thawk na in ava ril em em ngai ve le! Țawngkaa ring ni miah si lo hian a ngaithlatu thinlungah chuan a ring a, țek tla ai pawhin a ring zawk mai thei asin!

" Sir, zakthei lo min ti em? Mahse....ka thinlung hi......a ka hre thiam..... lo... Dr. Mapuii ....hi alo lang leh si.....Sir...eng tin nge min ngaih... ( a mittui chu a hnai hle a, a țawngka pawh a ri chang chang a ni.)

A sawi dik chiah...Sir Hruaia hi a hmangaih hmasa ber a ni asin!

" Mahriat, i huaisen a, i rilru i sawi ngam hi....ka duhzawng tak i ni...asin"

" Ka rilru chauh hi maw i duhzawng ni a..."

" I taksa pum hian maw le Lungrun"...

A sawi rual chiah chuan Hruaia chu a tho va, Mahriati herhsawpa țhu bulah chuan a va kun hnai a, a hmuiah chuan a fawp ta vawng vawng a. Chu mite pahnih infawpah chuan tisa chakna reng reng hi alang tel lova, hmangaihna a Lungrun taka infawp an ni si a.

Nu kimi arawn chhuak thut a, a fanu Hruaian a fawp chu a rawn hmu hman a. Mahse a hmu lo der rih tlat! Sailo nufing ava ni tehlul em!
A hnu deuh chuan chhuak lo fe hian a khuh ta khak khak a... inhmangaihte chu a phu zawk a, an va han lai tak em! Mahriati chuan a hmui a hup ringawt a, Hruaia lah chu a lai ve em em tho mai, a ding hluai a, a tukhum thak lo pui chu a hiat a hiat a.

" In tui lum chu ava so har duh awm ve....kha mei lah chu arem a ni mai si a...." Nui țuh țuh chung chuan Nu kimi chuan a ti a.

" Ih...Ih...Nu..Lal Anu...a so...tawh"

"Nia...eng lo...hei kan puah dawn chiah a..." a tukhum chu a hiat leh ringawt țhin a.

" Ti r'u, inchhungah i puah zawk ang u hmiang...a eng nuam zawk a.." Nula leh tlangval lai dun em em te pawh chuan ar leh chawhtawlh chu an khai lut a, zui lo ngam hek lo...an zui lut ta a!

Inchhung choka ah chuan Hruaia chuan a puah zung zung a, alo hnehsawh em lah taka, pawnah Hruaia chuan ahan rawh a, a chhuah dawn chuan a melh ralh a, Mahse Mahriati chuan a rawh pui ngam tawh rih lo. A nu pawh chu a en țha ngam lova... a lai em em ringawt a, a țhu a, a țhi tu emaw țhi hawn sak chu a khawih leh ta niap niap a.

" Bawihi, I U Hruaia hi ka mi rin zawng tak a ni tih ka hrilh tawh na che a, fimkhur hle rawh aw...Hmeichhia hi kan dinhmun a tleu tawh chuan tlangrel leh mi hmuhsit kan ni tawh țhin a nia...."

An inzilhna țawngkam chu Sitting room lama awm Pu Hmaa chuan a hre ve pha chiah lova. Tin, a hriat hi an hlau nufa zawk a ni. Mahriati la lai lutuk chuan sawi mai tur pawh a hre rih lo a ni.

" Nu...ih...ih...eng.." a sawi zawm ngam rih lo! Hruaia a rawn lut a, ar rawhsa a rawn chawi lut a. Pa Hmaa arawn phei ve chiah bawk a. Hruaia chuan arsa chu a chan a, a hnehsawh bawk a. A zo thuai a.

" I va hnehsawh ngai ve le.... khatianga arsa chan thiam ka la hmu ngai miah lo" Pa Hmaa chuan a ti thlawt a. Hruaia lah chu a zah a la kaltluang a, a lai em em a.
" Ka zo..." a kut chu a sil a.

" Eng lo....ka zuk chhuk tawh mai ange aw, hei atlai viau tawh mai..."

" E... ni e, keimahni vang vek a ni, lawmthu sawi ngaihna pawh ka hre lo...zing ațangin chaw rawn chho nghal ang che..aw" Pa Hmaa chuan a ti a.

"Nia, mang țha u..." ati a, a chhuak vut a. Mahriati chuan a thlek zui na a, thlah chak viau mahse a ngam ngang rih lo. Nu kimi lah chuan Mahriati chu alo melh ve chiah bawk si. A nu chu a chhiahkhum ta ringawt a.

Mahriati chu mut hmunah a inngaihtuah a, a thinlungah chuan lungngaihna leh manganna hian hmun achang mawlh lo... Mahse Dr. Mapuii hi...
........

Tukțhuan ei lai chuan Pa Hmaa chuan, " Ngurtea te hi I nu kimi hian lo hmuak se....an lo thleng tlai lovang! Hruaia tlai lamah pawh lo haw tlai lo la...hetah hei sa lah ala tam a, i nu kimi'n alo bawl kep nghal ang che "

" Pu Hmaa, tlai lamah chuan chaw ei chhuahna tur ka nei tlat! Min hrethiam aniang chu..." Nu kimi chuan a fanu ke ah chuan a tlawh zeuh a.

" E he...! Khawiah ? I rawn haw har angem?"

" Dr.Mapuii nu a rawn kal a, chaw eiah min sawm alawm le... haw har lovang. Ngurtea te chu an rawn chho dawn si a..."

" E... va ei rawh a țha alawm, ni e Ngurtea ten an beisei si che a, rawn haw har lo hram la"

Tukțhuan ei kham chuan Hruaia chuan a bike chu a hrufai mawlh mawlh a.

" Ka rualin i lo kal dawn em?"

" Aih .... Rinsangi nen kan lo kal ang"

.........

Nu Sawmi te nufa pawh an inbuatsaih nasa ngang mai. Mahriati hian Hruaia sa duhber hi Sangha a ni tih a hria a. Pu Kaia te dil ami alo mantir thlap a...anthur nen a chhum dawn a ni.Mapuii te chu an hnaah an buai lutuk lem lova... hma takah a haw a, fai takin a inbual a, tlai lo thlen hun ava nghakhlel tehreng em! Nu Sawmi lah chuan alo hrethiam em em a, a lo fuih mawlh mawlh thung a. An nufa chuan rilru inpawh takin an titi dun a. Nu Sawmi hi Mahriati awmpui zawk tura lokal a ni na a. Hruaia a awm ve a, tlangval ala ni tih a hriat chuan tum dan dang a nei ta a. A fanu nen hian insuihzawm se a ti a ni. Tunah chuan Lecturer a ni tawh lehnghal si a! An pahniha bul țan țhat tir leh chu a tum bur a, a ni renga a thil tihah a hlawhchham ve mai mai ngai lo! Nu fing leh remhria a țul huna engkim huam leh hmang thiam a ni tlat!

Dr.Mapuii chuan Hruaia lo thlen hun a nghakhlel em em a, ala hma si a, Hmana T-Shirt an lei dun , uluk taka a dahțhat chu ala chhuak a, T-Shirt a an thu chhuttir inang chiah a an chhut tir *DEI GRATIA* tih chu a en vang vang a. A ha ta a, a sam pawh college an kal laia a phiar dan ( Hruaia duh danin) a phiar thlap a. Darthlalangah a inen chiah mai chu(h).... Tleirawlte hi a ang a. A nui sak a.

Hruaia phone a khur cher cher a," Hello...aw bang țep e..aw le tlai lovang"
Phone lehlam a mi chu Nu Sawmi a ni a, Hruaia chuan pawnah phone ahmang a, chutih lai tak chuan Mahriati sir ten lehkhabu an rawn lak tir chuan a thusawi chu a hre pha tlat. A ner sak a.......

........XVI.....

Mahriati'n Sir Hruaia te inbe thawm chu a hre ve hman tlat! A ner sak a, mahse eng mah sawina chi leh hun a ni rih si lo! A mal tawrh leh ta.. Sir Hruaia ti nge Dr.Mapuii te hian chaw eiah an sawm kher le aw. A U Ngurtea te lo haw dawn ni tak lehnghal nghal a!



Hruaia te pawh an bang fel ta a. Ruatsanga te Inah a kawi zawk a, Ruatsanga hi a nau hming ang chiah a nih avangin a ngaina a, a tlawhreng a, anni nupa lahin unau enin an en a. Mami chuan thingpui hang a rawn pek pah chuan,

" U Hruai, i haw phei țep tawh em? Ka nu khan Ngurtea te an lo thleng tawh a rawn ti a"

" Phei rih lovang, zanriah hi hmundangah ka ei dawn a"

" Khawiah nge i ei dawn a?"

" Dr.Mapuii te Inah...A nu alo chhova chaw eiah min rawn sawm alawm maw le, kal loh chi a ni si lo...."

Ruatsanga chuan," Chuvang chuan a ni maw nizan khan an rawn len a? School in kal ho em ni kha..."

" Aw High School leh Higher hi kan kal ho a"

" E...va ei rawh ! Hmelhriat ngah hi a țha a nia...Ei ngei ngei tur i nih chu.."

Mami chuan awmze nei tawkin,

" Rilru na kan awm ang a(h) " alo ti zeuh a. Ruatsanga chuan a nupui chu ngaihnobei lo zet hian a melh a. Mahse a hmu lo lui der ve tlat...

" Va ei rawh, haw phei har lo la, keini pawh ka nu in min rawn phone sek tawh mai..." a ti a. Ni e, rilru na an awm ngei ang.

Hruaia chu phur fahran lo chuan Medical Quarters lam chu a pan ta a. Dr.Mapuii inluah chu ava hmu mai a, a huphurh ve tho mai.... Thuruk inthup.... tihte kha a ngaihtuah chhuak a. Nu Sawmi'n rawn kal hma rawh a ti kha a ni si a. Kawtah chuan Bike chu a dah a. Kawngka chu kik a tum zet na a, door bell a hmu a, a hmet ta zawk a...

Kawta Bike inhung ri chu chhunglama lo awm chuan a hrereng a,lo lut har hi a ti tawh khawp mai...Door bell chu a ri ta a. Lo ding sa a ni bawk a, kawngka chu ava hawng ta a! A hmaah chuan a mi ngaihchan ber leh thuruk inthup hrilh a tum ngei chu alo ding a...

Kawngka rawn hawngtu Hruaia'n a hmuh meuh chuan a rilru a kal thui kher mai! I hiau leh.... hmanlai nun a ngaihtuah chhuak mai ni lovin mitthla ah a rawn inlar sup sup a. A hma ading T-Shirt hak mawlh mai chu aw...

" Hi....Mr. Renthlei"

" Ka tlai mah mah em ka pi Doctor..."

" Eng tik lai mah, eng hun lai mah hian i tlai ngai lo" awmze nei tawk a melh pah chuan alo ti a.

" Doctor....ka rawn luh i phal tawh em? Nge tah hian min din tir reng zawk dawn em ni...."

Inchhung lam ațang chuan khuh thawm a awm khak khak a, hrawk za a khuh chiah pawh a ni lo!

" Sorry.... lo lut rawh..tihpalh lutuk Mr.Renthlei" awmze nei tak chuan a siai sak a.

Vanlalhruaia meuh pawh a rilru a buai a ni, tuna ahma a țhu hi Dr Mapuii ni lovin hmana alunglai kuaitu Mapuii kha a ni tlat! Mahse a thinlungah hmeichhe dang pakhat a awm tawh tlat.... chu hming erawh zawng a paih chhuak thei tawh ngai lovang. Tin, paih chhuah hi a tum lo, phatsantu ai chuan la phatsan lotu chuan a thinlung a luah tawh zawk si a. A thinlung ațanga paih chhuah chu a thiang lo tawh zawk si a!

Nu Sawmi chuan, " I va rawn thleng hma ve Hruaia...."

" Nia...rawn thleng hma la in ti si a....tin, hei University zirlaiin Survey an rawn nei dawn a, min rawn rawn an tum a. ... min lo nghak dawn si a, ka haw vat angai ang...a pawi ka ti hle mai.."

"Aaaa....chutiang mai mai an lo nghak ve mai dawn che alawm."

" An buai khawp ang, hun an nei rei si lova, .... tunah pawh hian min nghak reng tawhin a ni ka rin ni..." Hruaia hian chhuanlam remchang tak a nei hi alawm em em a ni.

Nu Sawmi nufing ta ngang chuan hunbi kal dan tur a ngaihtuah a, a inthiarfihlim rih a ngai tih a hre tlat a.

" Mapui, Pu Siama te In luahah chuan ka han dak lawk ange aw.... ka rei lovang...hei Hruaia lah hi a hmanhmawh si a.."

" Aw le, han rei lo la.." Mapuii chuan a ti tak na a, rei viau mahse a pawi ti lo!

Hemi te nufa thiltum hi Serafim ho pawhin an hre tlanh hial ang chu! Tin Dr.Mapuii Zirlai awmpui pawh a țhiante inah chaw ala ei dawn zui... ta deuh deuh chuan aw....

Mapuii țawng tuma a an zuau lai chuan Hruaia phone a rawn ri a,....Uai Mahriati a ni tlat mai....a pick up a.

"Hello! E...aw le, aw....haw har lovang..min lo nghak mai se... E...aw le, an thiam ang ang khan lo ti rawh se....ka rawn thlen ve leh ka rawn enpui ang .aw..aw le"

Mahriati te nufa hian Hruaia Dr.Mapuii te Ina chaw a ei tur kher hi chu an ngaih a țha chiah lo ve ve. An sawi chhuak lo ve ve thung a. Mahse tuna mi kha Nu Kimi rawn call tir a ni ve tlat! Thil thlen dan hi amak tial tial a nih hi maw!!

" Tu nge a?"

" Mahriati a nih kha"

" I school naupang kha ti raw?"

" Aw ni e, A ute a nia, zirlai ka puih tur te chu...an lo thleng tawh a, min nghak a nih chu..."

" I school naupang kha i ngaina viau ti raw?" ( Hmanah school ankal dun laiin Hruaia hian ngainatna ah hian lainatna leh hmangaihna atel tih a sawi kha a hrechhuak a)

Hruaia'n a chhan hma chuan a phone chu a rawn ri leh a, a thawhna Principal a ni thung a,

" Hello Sir, E... aw le, ka va lawm em! Aw le theihtawp ka chhuah ang.... Aw le Sir...ka lawm e"

" Ti nge i phone hi arik reng a....eng mah a sawi theih loh..dah silent rih mai la..... tu nge ni leh pek a?" tum bar hian a ti a.

" Kan Principal a nih kha..."

" Chuan ka zawhna che kha min la chhang miah lo, Mahriati hi i ngaina ti raw?" A ti leh ngat a. Hruaia chuan ala chhang duh bik miah lo!

" I inchei dan chu(h) ..... DEI GRATIA .....chu le" ati daih thung a.

" Mawh.....Hruai..min la chhang lo, Mahriati chu i ngaina em?"

" Aw.... ngaina e.."

Dr. Mapuii chu a mit sulh a! Karei leh...a hlauh rilruk ang ngeiin Hruaia thinlung chu midang tan a inhawng ta em ni le? Mahse a inthunun leh vat a,

" School naupang ngainat biktak han neih chu a țha dawn em ni? ( a ngawi leh deuh a...) Taka In Principal chuan eng nge a rawn sawi a?"

" Nia... Ni e..hei MCS Exam ve ka tum a, leave ka dil a, min rawn phalsak a nih kha...ka lawm kher mai..."

Dr. Mapuii chu a nghing lawih a, mualpho loh nan țhutthleng ban a vuan a, a thlah leh thul....A heh a pet fan fan a, Hruaia hian MCS nih a tum a maw...a chhan a hria. A hrechiang lutuk tlat! A thinlung chu thir ling a vih ang mai hian a vilh ngaeih ngawih a! A ni reng dawn asin! Hruaia chuan Mapuii chu a en miah lo thung a.

" Eng tikah nge chhuk i tum a? " a aw chu a ri ring lo
....

" Karleh tawp lam a niang..."

" Hruai, MCS nih kher a ngai em ni? Hei hna țha tak i nei tawh tho si a"

Chu zawhna tak chu Hruaia tan chuan mupui ( Silai ulhbun mupui) a kah ang mai a ni a.Hman ațanga a thinlung natna sawichhuahna hun chiah chu a ni. Chu hun țha chu bawhpelh hi a tum bik miah lo!

" I zawhna chu a chhanna asei dawn khawp mai.... I ngaithla peih dawn em ni" Mapuii chuan chhuat lam chu a bih ngaih a, a meng reng na a, engmah a hmu miah lo! A ngaihtuahna ava kal thui tak em!

" Sawi rawh..... ka lo ngaithla ang e..." ati chuai raih a.

"A bul țanna ber tur pawh ka hre lo na a, a ngaihthlak dan i thiam mai dawn nia aw...
High School ka kal lai hian țhian hmeichhe pakhat nu hnap mai hi ka nei țhin a. A pa aboral tawh nghe nghe a, chuan kei ka nu hi a boral ve tawh tho a. Chuvang chuan ka ka ve țhin a,a tirah chuan naupang dangten an chhaih țhin avangin ka chhan ţhin a. Ka in ngaina in kan inhrethiam tawn em em țhin! Kan inngaina telh telh a, nge keimah hian ka lo ngaina lutuk zawk ( Hruaia chuan alu a dawm a, a aw a thian leh te te a) a uniform pheikhawk te hi bal se ka tihfai sak thlap țhin a! A ni lah chuan eng he hu ah a ngai lem lova...! Zonal sport kan neihte hian Football te, Hockey te ka khel ve țhin a. Ka inthlakna thawmhnaw kengin a sir ațangin min lo au ve chiam zel a. A lo țang ve em em țhin. A birthday hi 31 july a ni a, kan pahnih chauhte hian kan lawm dun țhin a. Kungfu shoe kha ka duh em em țhin a, ka bun țhin! Vawikhat chu tlanga ka hruaiin kan lawn dun a, Kungfu shoe chu a bun ve chak tlat a, a chi loh ka tih pawn a bun lui ta a, a thawl si a, an tawlh thlu tak tak mai chu aw....( Mapuii chu a rawn nui chhuak hak a...) Air gun kah zirtir tura kal kan ni a, tlangah chuan air gun kah chu ka zirtir ta a. Chumi țum chuan ka pa chemte ka pai a, a hriam em em a. A tiang tur ka sah sak a. Tawlhthluk leh a hlau si a. Thing te deuh ka sat chu alo awm hnai lutuk nen chemte chu a tleu a, a kut chu ka sat ta a ni.( Mapuii a hawi chhuak thei tawh lo, chhuat lam a bih a, a mittui chu a sur hian a sur a. Hruaia lah chu lehlam a hawi lui tlat si a!) A kut chu a thi nasa hlea, ka kawr hak lai ka pawt thler a, ka tuamsak ta a. A țap pur mai a, chumi țum angreng a inthiamloh ni chu ka la nei lo. A kut chu tunthleng hian ala ser ang ka ring( Mapuii chuan a kut ser chu a en a, a kut serah tak chuan a mittui chu a far leh a. Ni e a far ang chu...Hruaia chu a ngawi vang vang a. A hnu deuh chuan a sawi zawm leh ta a.)

Mahse ka duhzia leh ka hmangaih thu chu ka hrilh ngam ngai lova, amah lah chuan a sawi ngai hek lo. Zan tin ka mut hmunah chuan ka hrilh tawh ngei ang ka ti țhin a...."

" Hruai, a tawk lo maw....khawngaihin...Khawngaih takin"

" khawngaihin min sawi zawh tir zawk rawh, i zawhna ka la chhang kim lo K.Lalremmawi" Mapuii chuan a hming puma a ko chu ala na kher mai....! Mahse Hruaia'n a hming puma a koh chuan a thil tih tur a ti ngei țhin. A sawi zawm leh a..

" Tichuan Higher Sec. Kan zawh chuan College hranah kan kal ta daih a, kan inhmu khat ta em em a. A chang chuan an college ah te ka va thlah țhin...



College chu kan zo ta ve ve a, Ni khat chu ka thinlung thawnthu leh ka hmangaih thu hrilh tur chuan an In ah chuan ka va kal ta a. Ka kal lama ka thinlung hlim zia kha...! Ka va kal ta ngei a, ka thinlung ngaihtuahna ka hrilh chiah chuan maw.....( Mapuii a insut țan a)
Hmangaih dang kei ni lovin MCS val ngat a lo nei dawn tih thu min hrilh ta a ni. Chumi nia ka thinlunh hliam natzia chu i hrethiam kher lovang . Chu ka hmeichhe ngainat leh hmangaih țhin chuan min lo hmangaih ngai si lo! Chu hmeichhis chu ka theihnghilh a ngai ta a ni. Ka tluk loh MCS val chu tu nge a nih ka hre lo na a, MCS nih ve ngei tumna hian ka thinlungah hmun aluah hneh ta em em a ni. Chuan ka hmangaih țhin chu chu MCS val nen chuan an innei dawn tih chu ka hriat hnuhnung ber a ni ta...a chanchinah chuan.."

Hruaia pawh a hnuk a ulh ve tho mai. Mipa mah nise insum har a ti.

" Chuvang chuan MCS...." Mapuii chuan a pawt chat ta a,

" A tawk! A tawk... a tawk e, VANLALHRUAI...."

Mapuii chu a insut hlawp hlawp a.

" I zawhna ka chhang thui mah mah em ni Doctor." A ti chang fak a.

" Hruai, Vanlalhruaia .... PASAL ka la nei lo......kan inneih hma kar khan Bike in a accident a, ka pawh chhawn lovin a boral asin!"

Dan rual lohin a mittui a tla a, a Room lamah a tlan lut nghal a.....

Pasal ala nei lo maw....!!!

" Tuma nupui ka ni lo" tia a sawi lai kha a hrechhuak uai uai a, .....

Hruaia chu a ding hluai a.