To sir.....with love Episode 11&12

TO SIR .....WITH LOVE
( M.Lusei Palian)

............(XI & XII) ..........

( Tunlai chu ka buai hle mai. WHATSAPP tih thawnthu nen ka kawp a, mahse manuscript vek a la ni a. Ka țhianpa alo post țhintu hian post rual lo mai ang a ti naa, rilru a luh lai hi chuh ve a ngai si a. Ka thawnthu ve te min hlutsak țhin tute inchungah hian ka lawm a, lawmthu ka sawi hmasa a ni. He thawnthu hi Volume 27 vel thleng tura duan a ni. Phone a type a nih avangin spelling mistake ah min lo hrethiam hram ang che u aw. A dik lo lai feedback ka dawng reng thei e.)

Hruaia phone chu a rawn ri ta a! A en vang vang a, phone pick up chu ava hreh tak em!

Mahriati chuan, " Tu nge a? " a rawn ti a.

" ka hre lo no.lawng a nia"

" I chhang dawn lovem ni? "

"Chhang rih lo mai ang, min tibuai mai mai ang."
A dik chiah a rawn tibuai dawn chiang Hruaia chuan tunge rawn call tu chu a hrechiang hle si a! Mahse Mahriati chuan Hruaia mitmeng tal deuh chu a hrethiam ve tlat, a hai lo a ni, a hmuh hmaih hauh lo.

" Sir, tu nge?"

Thu tak zawk leh tak ram chuan a zawt lehngat a. Hruaia chuan a chhang mai lo, a ngawi tlat thung a, Tv a channel chu a hmetsan ta thung a. Mahriati chuan rawn hnaih sauhin hnaih setah a mitmeng en ran chung chuan,

" Doctor ti raw?" A aw chuan ngaihno a bei tehchiam lova.

"Ka hre lo le,no.hlang a nia, kan han be chhin mai dawn em ni?"

Mahriati chu lehlam a hawi a, a ngawi ta vang vang a, Hruaia chuan rilru pe lo zet chuan Tv a en lui thung a. Țawng zai reng an rel lo! Khuavang kal lai tak tak a ni. Minute sawm hnu velah chuan Mahriati chu a rawn hawi phei a, heti hian Hruaia hnenah chuan a ti ta a.

" Sir, K.Lalremmawii, he hming hi i theihnghilh thei angem? Khawngaihin i be tawh lo thei angem? Ka rilru hi ka sawi thiam lo..."

Hruaia tan chhanna harsa ava ni tehlul em! Tihian a ti leh a,

" Nangmah hnawla kalsan a, nang aia midang thlang zawktu hi i thinlungah i cham tir reng dawn em ni..."

An ngawi vang vang a...

"Sir, kei hi engtin nge ka awm ve dawn...engtin nge ka awm tak ang..
Sir, zak thei lo min ti em? I hmel ka hmuh loh rei pawh hian ka nunkhua a har tawh si..."

Inthlahrung leh zak chung chungin a sawi a, hnuai lam a bih tlat thung a. A rilru erawh a kal thui a ni...

" Mahriat, i zawhna hi chhan a va har tak em! Tun dinhmuna chhan mai che hi a harsa khawp mai! Ni e, i bula ka intiam tawh angin englai mahin keimah avang hian i rilru hi na lo se ka duhber a ni"

" I tunhma nun chu nghilh leh nawhreh a harsa ang tih chu ka hria a, mahse i thinlunga hming awm tawh chu nghilh nan leh nawhreh nan min hmang thei mai lovem ni?" ...

Mahriati chuan sen awp awp leh zaktak chung chuan a huaisenna zawng zawng sawm khawmin a sawi ve a a ni. A ni reng alawm, a tana sawia mawi lo leh zahthlak tak a ni ve asin!

Mahse hmangaihna leh indona ah hi chuan thianglo zahthlak reng a awm thei lova, ramri kham chin lah a awm thei hek lo!

" Mahriat, ka hmuh tirh ni ațang che khan ka ngaina nghal che a, i nat pawh ka phal ngai lovang...nang pawn i hriat kha...
Mahse ka zirlai naupang i ni si a, i hmalam hun hi ka tichhia ang tih ka hlau em a, ka theihtawpin ka insum țhin zawk asin!"

" A nih Sir, min hmangaih lo tihna em ni? Min ngaina ringawt a maw....min hmangaihin min duh ve hian ka lo hre ve țhin asin"..

Mahriati hnuk a ulh țan tlat a! A kun ta ngaih a! Hmangaihna avang hi chuan mittui awmna hi a hnai em asin!

Hruaia chuan Mahriati chu ava hnaih a, dim tein a khabe ah ava kuai chho a, a kut leh lamin a kuah bawk a, derna leh bumna awm hauh lo chuan,

" Hmangaihna ah hian hmangaihna avangin hmeichhe pakhatin ka lei aba țeuh a, min rul ta si lova, hmangaihna avanga ka leibatu a ni hlen ta a ni. Mahse maw.....ka ngainatna che hian hmangaihna; nangmah duhna leh ngaihsakna hi a keng tel zawk asin..."

Chu țawngkam chu ava mawi tehlul em! A ngaithlatu bengah zawng Van angelte zai ri ai pawhin a mawi zawk mahna!!!

" Ka thinlung hmunruak luahkhattu i nih duh chuan i thu thu le...mahse rinhlelhna hian ka rilru a la luah hneh em rih a.....Min hrethiam hrih ang che aw..."

" Sir, I tan....I tan chauh nun ka tum ang, Doctor-i ang chuan ka liamsan lovang che. Tin, hmangaihna leiba neih ve loh hram ka tum ange. Ka thinlung hi itan a ni a, midang tan chuan ka kalh na nge. A chabi erawh chu i kawl ta thung dawn a ni..."

Hmangaihna thlipui, midangte In lama tleh miah si lo chu Pu Hmaa te Inah chuan a tleh hian a tleh hem hem a. Inhmangaihte pahnih hmui chu a inchar mai ang tih a hlauhawm zawk hial a ni.A vawikhatna atan Mahriati chuan mipa a fawp ve ta vawng vawng mai! Ava han hlimin ava han lai si em! Mahse Hruaia chuan hmangaihna a,inneih hmaa ramri kham chin pelhcpui chu atum hauh lo, duh se chuan a thei ngei ang. Mipa tamtak pawh an insumthei kher lovang. Mahse Hruaia chuan mipa nihna leh mipa in an hmangaihte laka an tihtur a ni ngeiin a hria a, an hmangaih tak tak a nih ngai chuan......! Chu zan chu Mahriati leh Hruaia tan chuan zan chhinchhiah tlak tak, thinlung thawnthu leh thinlunga thil thupte puan chhuahna zan pawimawh tak a ni si a.

Pawn lama thawm a awm avang chuan thinlung inhmu em em pahnihte chu an tawlh hla ta dawrh a. Kawngka a rawn kik a, a lo luh chuan Pu Zikpuia a lo ni a, a rawn lut ta hlawl a.

" E khai a! In biahthu inhlan laklawh lai ka rawn tibuai che u a ni maw?...Bawihi i pa te an leng chhuak em ni?"

" Aw a Nu nen an leng..a"

" Bawihi, hei pasal nei rual i ni ve ta. A nu...A pa tih tawh loh tur ,hmanah pawh ka hrilh tawh che kha maw le aw..."

" Eng nge pawi...A nu leh A pa an ni miau va..."

" Hui ha, tunlai țhangthar te hi zawng an mak teh e aw....mitthi lumen pui lovin ka tlaivar an ti a, a thi ber an vui liam tawh pawhin mitthi inah ka leng an la ti a, mitthi inah kan zai a te an la ti ta deuh deuh a. Khawhar In awmzia pawh an hre tawh lo a nih hi maw le...Pu Hruai lo zirtir teh.. engkim aw( a nui var var a)"

" I chhe reuh, thil hi i sawi peih lutuk..."

" A nih Chawngtinleri naute thingpui hang kan in dawn em ni?"

Mahriati chuan thingpui hang a thlit sak a. An inho ta a...

An inzawh chuan Pu Zika chu a ding hluai a,

" Thupui hlapui inla vai zo lo tlat, hawh awi ka zuk mu ta'nge...mut tui, mang țha u le" ati a, a chhuak zui ta nghal a. An en dun ha a, awmze nei fe hian an in nuih dun sak a.

A chhuah hnu rei lo teah chuan inhmangaihte pahnib chu an inhnaih leh sauh sauh a, a biang leh biang chu a insi leh rial țhin a. An tv endun film in a zir bawk em a ni.." A walk to Remember" tih Mizo țawnga lehlin an endun a. Hruaia chuan a phone chu adah silent tlat thung a.

" Sir, Teachers Day hi kan lawm dawn em?"

" E ka hre miah lo, kan la sawi ho miah lova...enga ti nge"

" Ih...hmang ve ila"!

" Kan lo la sawi ho dawn nia, Higher velah hi chuan an hman vak ngai pawh ka hre lem lo asin!"

" Nia,mahse hman ve a chakawm ve alawm"

" Lehkha ila zir miah lo Lungrun, i zir țan dawn em ni?"

"Ui ...a tlai tawh e"

" Tlai hleinem, tlemte tal bih teh, nakinah kan fate ila zirtir dawn asin...!"

" Nangman i zirtir mai ang chu..."tih pah chuan Hruaia biangah ava piai ta zeuh a.

" A nih leh Tv kha lo en rawh aw,,,,A nu te pawh an lo haw țep tawh ang"

A room lamah chuan a luhsan ta a! A thinlung a hlim veng vsng thung a. A hlimna hian parfung a chawi angem le?

................

Mapuii chuan Hruaia lokal ring takin a nghak fan fan a. A rei a tih em avang chuan a phone ta ringawt a. Mahse alo la pick up lo zui lehnghal a. A thinrim lutuk chu a puakkeh lo chauh a ni. Ama roomah chuan inbual fai sar in a vei vei a, a tukah lah a nu chu a rawn chho tawh dawn si a! Thil hriatchhuah a nei thut a, Hruaia nen hian a nu remruatna avanga ințhen an ni a. A nu a huatna apung sauhva,mahse a nu a ni miau si! Shakespeare a thawnthu Hamlet ti a...Aw derdep i hming chu hmeichhia a ni si maw? A tih kha a hrechhuak zawk a.

Mapuii chuan Joseph Zaihmingthanga hla 'Van a duai' tih chu a ngaithla a. A rilru a kalthui kher mai! Hruaia chu message ava thawn țhin tak na a, a reply lo mai pawh ni lovin a seen pawh a seen lo!!!

Ngaihtuahna thar a nei thut a.....
,
...........XII.......

( Ka phone hi type ahar telh telh mai, a battery lah hi achang hian a kal țha duh lo vel a. WHATSAPP tih thawnthu ka ziah laiin ka rilru ah KIR ZAI I REL LO'NG MAW tih hman deuh a ka ziah kha a chhunzawmna a awm vang vang thung a. TO SIR...WITH LOVE hi ala thui dawn si a, a rual chuan Story pahnih ka post thei ngang lo a ni. Inchhiar duhzawng a nih chuan keia kutchhuak ve tehlul hi min lo chhiar sakin min lo like sak ve țhin dawn nia aw

M.Lusei Palian)

Mapuii chuan a nu hnena engkim sawi a, hrilhfiah a Vanlalhruaia neih theih dan tur ruahman pui tur chuan a rilru a siam fel ta a! Ni e a nu hian tihsak duh loh a nei miah lovang , a tihsak duh leh ngei awm si a! Nu thil tithei tak a ni ve reng reng a, Mapuii hna pawh hi a buaipui a a tihpui thlap a ni a, hna a nei ta a ni. Sawrkar lamah ni se Minister hmelhriat loh a nei lo, a hmelhriat leh amah hretu chu a tamzawk an ni tlat a ni. Anu hnena Hruaia chungchang thlen chu a tum ta zawk a! A nu chuan engkim a tifel leh thei mai ang , a nu lo thlen hun chu a nghakhlel leh ta viau thung lawi a. Duhzawng leh it zawng neih theih nan hian rilru hi a vakkual thui theiin alo va chak si em aw! Mahse Hruaian a message pawh ala hmu lo chu a rilru chu a dek na deuh chu a ni. Mu chung chuan earphone in 'Vanlalsailova'n Kir zai i rel long maw! tih asak chu a ngaithla a. Thil a hre chhuak thut a, fb lamah a lut a, Hruaia Wall chu a tlir mai mai a......Ui...Ui...

An thlalak dun hmana mi chu a hmu thut mai, mak a ti a, a rilru ava thar tak em! An thlalak ni leh hunte chu a nghilh si lo!
Hruaia hian ala nghilh bik lovin ala vei ve chiang mai!
Dr.Mapuii beiseina mei nung che che chu chhem alh tharin alo awm leh ta!...

..........

Pu Hmaa te nupa leng pawh an lo haw ta! Nu Kimi a rawn ri lut lang lang a. Hruaia chu țhuthleng seia mu chingin Tv a lo en a..

"E...Khawnge Bawihi hi? Kan rei i ti em?" Nu kimi chuan a ti nghal a.

"Ti love....a room lamah lehkha a zir a nih kha..."

" Thingpui te alo lum che em? ( Ring deuhin Mahriati room lam hawi chuan) Bawihi hei I U Hruaia hi thingpui te lo lum teh....I pa pawhin a in duh ang aw" a ti a.

Pu Hmaa chu Hruaia bula țhuthlengah chuan a rawn țhu a." Hruaia, kan Ayush Doctor nen hian in lo inhria a ni maw?"
a ti ta thut mai a. Nu kimi chu alo ip chawih a, Hruaia chu a melh nghal a...Hruaia chuan hawi chhuak lem lovin,

" Aw hre țhin e. K.Lalremmawii a ni a, School kal ho țhin kan ni e" tiin pangngai takin a chhang a.

" E...alo ni maw, a nih tak chu maw le" a ti a. Engmah chu a sawi zui leh lem hlei lova. Hruaia chu a tho huai a, chutiang bawkin Nu kimi pawh a tho ve huai tho a. Thingpui siam mek Mahriati pawh alo ner sak sak ve tho a.

"LAL ANU...in lo va haw har ve a? Sir hian lenna tur a nei a, an lo phone an lo phone asin.." Awmze nei tak hian Hruaia melh ralh chuan a ti a.

" E khai aw! Hruaia ti nge i sawi mai loh aw..." Pu Hmaa chuan a ti a.

" A tlai ta deuh si a ni maw? " ala ti zui a.

" E ! Keive tehlul hian lenna tur ka hre ngut lo ve, a ti ve mai mai a nih kha.." a ti let ve thung a.

Mahriati chuan thingpui a rawn sem a, a hang bawng hnute pawlh chuan ... Hruaia thingpui tur chu a paw țha bik ngei mai..! A nu chuan a lo hmu ru reng si a. A nui ru var var a.

Thingpui an in zawhhnu rei vak lovah chuan Pu Hmaa chuan, " Taka, Hruaia hman deuh khan MCS Exam ka tum ve deuh i ti em ni kha?"

" Aw tum ve deuh e, ka nau khan thil țul min lo tihfel sakin alo buaipui a, thla leh mai khian kan Exam hman ka ring, kumin chu Exam hun an sawn an sawn mai a nih hi..."

" MCS Exam leh kher a ngai em ni? Hei hna țha tak i nei tawh tho si a?" Nu kimi chuan a ti a. A ti tak na a, MCS nih a tum chhan hi hrechiang ve viau hian a inhre tlat a ni...

Pu Hmaa chuan," E khai! Exam ngei ngei rawh. Kei Civil Service hi ka ngaihsan zawng tak an ni asin.."

" Ni e, vawi khat na reng reng chu Exam ve hi ka chak deuh a ni, mahse kan tling ve ngut lovang"

" Tling lo mahla hei hna țha tak i nei tawh tho alawm, thlaleh ni engzat velah nge in țan dawn a, i awm loh chuan kan khua ava har dawn ve" awmze nei taka A fanu Mahriati melh pah chuan a ti a.

" Thla leh ni sawm 10 vel khian kan țan ang, ni 8 vel khian chhuk ka tum deuh a. Motor hi chu Ruatsanga'n lo enkawl leh mai se ka ti deuh a,amah pawh ka la hrilh lem lo"

" A nih chu maw le"

" Sir, i awm loh daihte chuan tu nge i subject rawn la anga?" No taka melhin a ti a. Mahriati hian MCS exam a tum tih hi a hre daih tawh a.

" E .... midang an tam alawm, ka lo haw leh vat dawn alawm "

Sana a chek a, hunbi a kal a, a kal lai ading duh si lova. Inngai tak pahnihte pawh an in mang țha a hun ta mai si a! Hruaia pawh a haw thla ve ta a.

Hruaia chu khumah a mu a, a phone a en a, message alo awm tuar a. A chhiar ta dan dan a. A reply angem le?

Reply loh chu țha zawkin a hria a. Amu ta a, a mut hmunah chuan a inngaihtuah nasa hle. Hmanah Mapuii tunah Mahriati.... engtin nge a tihzel ang le.

A diktak chuan K.Lalremmawii hi a thinlungah ala thi bik miah lova...a thi lo asin! Mahse pasal neihsanna thinlung tak khan, kha thinlung kha Hruaia thinlungah chuan ATOM BOMB angin a tla a, a puak darh a, tun thlengin ngai a awh leh thei rih lo asin ! Bomb hian a thawk na țhin em asin! Mahse thinlunga thil inziak tawh hming chu nghilh hi a harsa a, theihnghilh kan duh hi kan hrereng a, hriatreng kan tum hi kan nghilh si țhin alo ni. A tan K.Lalremmawii hi nghilh ni a awm si lo, kumsul tam veiin țhal, favang lenkawl en fe hnu pawhin tawnmangah tal a la tawng țhin si a!

....

Mahriati chu mutpah chuan a inngaihtuah neuh neuh a,a thinlung chu lawmin a khat a. Mahse Sir Hruaia hian ti nge MCS Exam ve kher a tum le aw? A zin bosan dawn tih a hria a, la hla deuh mahse ni tin a hmel hmu lova awm hi a duh lo teh asin! Engtin nge a awm anga, engtin nge lunglen a tawrh tak ang. Mut pah chuan nichin lawka a hmui, a hmangaihin a fawhna chu a liak a, chu a hmui a heh chu alei chuan a liak huh a, a va han hlim leh si em! Chu hmui chu a hmangaih leh an Sir Hruaia ngei khan a fawp a ni si a. Tin, Sir Hruaian a mah khawih chhiat a tum miah lo maite mak ava ti tak em! Rinsangi sawi dan kha chuan mipa te hian an bialnu te chu mutpui/ khawihchhiat an tum zel kha a ti si a.Sir Hruaia hian a tichhia in a ring lo MIPA DIKTAK a ni a ti sap a. A ta ni turin thu an thlung tawh a, a kianga a awm nghenga awm veng veng a pangchang taka awm ava han chak em! Chu aia chak chu a nei lo, mahse ala naupang si a, B.A tal lo passed ve tawh ila tihte a ngaihtuah a, a muhil mai thei lo a ni.

Chu zanah chuan mi pakhat mai ni lovin mi pathum laiin mutmu an tuah thei meuh lo a ni.. An suangtuahna țheuh chu an mahni tawkin an kawm hlawm a. Mahse hunbi khawngtu kal sual ngai lo chu a ri keuh keuh a. A kal zel si a. Hruaia chuan mapuii message chu a en nawn leh a...

" Thil tamtak avangin min ngaidam rawh aw...

Beiseina thamral siam tawh lo hram che ka tum asin" tihte chu a chhiar a chhiar a. Mahse Mahriati hi....

Hruaia chu a tho leh a, earphone ala a. A phone a Laldinpuia hla ' Beiseina thamral' tih chu a ngaithla a. A rilru erawh tuma hriatthiam phak a ni lo.

( Heti lai tak hi Beiseina thamral tih Laldinpuia sak ngaithla ching khan chhiar la, a mood ah Hruaia rilru hi i hriatthiam pui ngei ang)

..........

Zing țian bawar alo pauva, thlarau sual ten leilung an chhuahsan a, hringfate tan ni thar a rawn her chhuak ta a. Tukțhuan eikham chuan Hruaia chuan School lam a pan a, he School a a hna a zawm hnu hian vawikhat mah ala tlai lo! A hma chuan Mahriati hi a phur ve mai țhin a, mahse a țhianten an fiam nasa țhin a. Sir Hruaia rual hian a kal duh tawh lo a ni. Rinsangi nen an kal ta zel tawh a ni.

Mahriati te class ah hian Hruaia hi vawikhat chiah ni khatah a lut a. Mahse chumi ni tak chuan Mizo lecturer a kal lova, Hruaia chu a awl tho a. Mizo period ah chuan a zuk lut a.' The Taming of tbe Shrew' tih an lo zirlai a ni a. Sir Hruaia chuan a zirtir hneh hle mai! Shakespearea'n he thawnthu a ziah chhan a sawi meuh chuan tumah bengchheng reng hi an awm lo. Tin, a lehkhabu dang Hamleta thawnthu a ziah chhante a hrilh chho va. Shakedpearea'n fapa alo nei reng a a hming pawh Hamneta a ni tih zirlai te chuan an hriat phah a. Hamneta hi a nu hian a enkawl uluk tehchiam lo va, damdawi a pek sual avangin a boral ta a! Shakespeara rilru na lutuk chuan " HAMLET" tih lehkhabu a ziak ta a ni.... tihte an sawi phei chuan an ka ho a. Mizo subject la tur hian a it hian an it hliah hliah a. Hmangaihna chungchang a sawi phei chuan Rinsangin Mahriati ava kheuh leh zeuh zeuh țhin a. A rukin Mahriati leh Rinsangi hi an hlim a. An lawm a ni...
An insik sek mai a...

Ui tak chungin period an hmang zo ta...

.....

Dr. Mapuii pawhin zankhuaa inngaihtuahin a nu chu lo hmuah ngei a tum a! A chawhmeh duhzawng tak Sangha lo leiin a duh ang thlapin Thani chu a siam tir a, chumi ni chuan Sumo hi lo thleng har a ti hle a. Damdawi-In lamah an buai lem lo bawk a, hun chu kalmuang a ti hle a.

Atawp a tawpah chuan Sumo chu alo thleng ta a. ....

Hruaia chuan eirawng a bawl mawlh mawlh a, a buai tehreng nen a phone a rawn ri a, a va en a no.hlang a ni a. A en vang vang a, a pick up ta a..

" Hello, Vanlalhruai, zan inah hei Mapuii nen kan rawn leng dawn a,kan rawn tlawh dawn che...hetah i lo awm reng tih hei Mapuii hian a sawi chauh a, kan rawn phei har lovang"

Thu pe aw deuh hian a rawn ti a, tu aw nge tih leh tu nge tih chu a hrechiang em em a ni...

( A la ngaihnawm dawn chauh a nia, rin loh lam daihin thawnthu hi a inher lawp mai thei a nia.

Min lo like sak țhin a, fuihna thu hi ka dawng thei reng e)